မဲခေါင်၊ ဇန်နဝါရီ ၁၈
အမျိုးသား ညီညွတ်ရေး အစိုးရ၊ ပြည်ထောင်စု ဝန်ကြီးချုပ် မန်းဝင်းခိုင်သန်း ဟာ ဒေါနစစ်ကြောင်းရဲ့ သင်တန်းဆင်းပွဲမှာ လက်နက် တပ်ဆင် ပေးအပ်ခဲ့တယ်လို့ သိရပါတယ်။
ပြည်သူ့ကာကွယ်ရေးတပ်မတော် တောင်ပိုင်း စစ်ဒေသ၊ အမှတ်(၃) စစ်ဒေသခွဲ၊ ဒေါနစစ်ကြောင်းရဲ့ မွမ်းမံသင်တန်း ဆင်းပွဲ အခမ်းအနားကို မနေ့က ကျင်းပခဲ့ရာ ပြည်ထောင်စု ဝန်ကြီးချုပ် မန်းဝင်းခိုင်သန်း တက်ရောက်ခဲ့ပြီး လက်နက်တွေ ပေးအပ်ခဲ့တာလို့ သိရပါတယ်။
ပြည်ထောင်စုဝန်ကြီးချုပ်က မိန့်ခွန်း ပြောကြားရာမှာ အမျိုးသား ညီညွတ်ရေး အစိုးရ အနေနဲ့ တစ်နှစ်တာ မဟာဗျူဟာ စီမံချက်ကို ရေးဆွဲ အကောင်အထည်ဖော်နေပြီး အောင်မြင်သင့်သလောက် အောင်မြင်နေပြီ ဖြစ်တယ်လို့ ဆိုပါတယ်။
စစ်ကောင်စီကို မြန်မာ တစ်ပြည်လုံးက တိုင်းရင်းသား ပြည်သူ တစ်ရပ်လုံးက တော်လှန်တိုက်ထုတ်နေတဲ့ အတွက် အာဏာရှင်တို့ နိဂုံးချုပ်တော့မှာဖြစ်ပြီး ပြည်တွင်း ပြည်ပ အင်အားစု အားလုံး ဟန်ချက်ညီညီ၊ စုဖွဲ့မှု အရှိန်အဟုန် ကောင်းမွန်စွာနဲ့ ရှေ့ဆက်နေနိုင်ပြီ ဖြစ်တယ်လို့လည်း သူက ပြောပါတယ်။
နိုင်ငံရေး၊ စစ်ရေး ထူးကဲသာလွန်တဲ့ အကျိုးရလဒ်တွေ ဖြစ်ပေါ် တိုးတက်လျက်ရှိပြီး NUG ခေါင်းဆောင်တွေဟာ တော်လှန်ရေး ရဲဘော်တွေနဲ့အတူ မြေပြင်မှာ တသားတည်းရှိနေကာ စစ်မြေပြင် လိုအပ်ချက်တွေ ဖြည့်ဆည်းပေးနိုင်ဖို့ စစ်ဒေသကြီးတွေ အလိုက် ပြင်ဆင် ဆောင်ရွက်လျက်ရှိတယ်လို့လည်း သိရပါတယ်။
တိုင်းရင်းသား မဟာမိတ် တော်လှန်ရေးအဖွဲ့တွေနဲ့ NUG ညီညီညွတ်ညွတ် စည်းစည်းလုံးလုံး ပေါင်းစပ်ညှိနှိုင်း လုပ်ကိုင်နေပြီး တော်လှန်ရေးမှာ အုတ်တစ်ချပ် သဲတစ်ပွင့် ပါဝင်နေကြသူတွေရဲ့ ဇွဲနဘဲကြီးမှုကြောင့် မကြာမီ တော်လှန်ရေး အောင်ပွဲ အသီးအပွင့်တွေကို ခံစားကြရတော့မှာ ဖြစ်တယ်လို့ ဆိုပါတယ်။
ပြည်သူ့ကာကွယ်ရေးတပ်မတော် ရဲဘော်တွေ အားလုံး ယုံကြည်ချက် ခိုင်မာစွာ ထားရှိပြီး အာဏာရှင်စနစ် အပြီးတိုင် ချုပ်ငြိမ်းရေးနဲ့ စစ်ကောင်စီကို အမြစ်ပြတ် ချေမှုန်းနိုင်ရေး အခု ကြိုးစားအားထုတ်နေမှုထက် ပိုမို အားစိုက်ထုတ်ပေးကြဖို့လည်း သူက တိုက်တွန်း ပြောကြားပါတယ်။
ပြည်ထောင်စု ဝန်ကြီးချုပ်ဟာ ဒေါနစစ်ကြောင်း တာဝန်ရှိသူထံသို့ လက်နက်တွေ ပေးအပ်ခဲ့ပြီး ပြည်ထောင်စု ဝန်ကြီးချုပ်ရဲ့ ကိုယ်ရေးအရာရှိက ဒေါနစစ်ကြောင်း သင်တန်းဆင်း ရဲဘော်တွေကို ဝန်ကြီးချုပ်ကိုယ်စား ဂုဏ်ပြုငွေ ၁၀ သိန်းကျပ် ပေးအပ်ခဲ့တယ်လို့ သိရပါတယ်။
ဒါ့အပြင် ပြည်ထောင်စု ဝန်ကြီးချုပ်နဲ့ တာဝန်ရှိသူတွေက သင်တန်းဆင်း ရဲဘော် တစ်ဦးချင်း သစ္စာရေ တိုက်ကျွေးမှု ပြုလုပ်ခဲ့တယ်လို့လည်း သိရပါတယ်။
သင်တန်းဆင်းပွဲသို့ ပြည်ထောင်စု ဝန်ကြီးချုပ် မန်းဝင်းခိုင်သန်း၊ အမျိုးသမီး လူငယ်နှင့် ကလေးသူငယ်ရေးရာ ဝန်ကြီးဌာန ဒုတိယဝန်ကြီး ဒေါ်အိသဉ္ဇာမောင်၊ တောင်ပိုင်းတိုင်း စစ်ဒေသမှ ဗိုလ်မှူးကြီးစောဖီးနစ်၊ တောင်ပိုင်းတိုင်း စစ်ဒေသ၊ အမှတ်(၃) စစ်ဒေသခွဲ၊ ဒု-စစ်ဒေသမှူး ဗိုလ်စောရှား နဲ့ တာဝန်ရှိသူတွေ တက်ရောက်ခဲ့တယ်လို့ NUG က ထုတ်ပြန်ထားပါတယ်။
ဓာတ်ပုံ – NUG MOD။
MK-003
