မဲခေါင်၊ ဇန်နဝါရီ ၁၃
စစ်ကိုင်းတိုင်း၊ ဆားလင်းကြီးမြို့နယ်မှာရှိတဲ့ ကျေးရွာတွေကို စစ်တပ်က အခုရက်ပိုင်း အတွင်း စစ်ကြောင်းထိုး မီးရှို့နေတာကြောင့် ကျေးရွာ ၁၀ ရွာဝန်းကျင်က ဒေသခံ ၁၀,၀၀၀ ကျော် စစ်ဘေး တိမ်းရှောင် ထွက်ပြေးနေရပြီး အခက်အခဲတွေနဲ့ ရင်ဆိုင်နေရတယ်လို့ ဒေသခံတွေထံက သိရပါတယ်။
ဆားလင်းကြီးမြို့ နမခ ကနေလာတဲ့ စစ်ကြောင်းဟာ ဇန်နဝါရီ ပထမပတ် ကနေစပြီး လက်ရှိအချိန်ထိ ကျေးရွာတွေကို အကြောင်းရင်း မရှိဘဲ စစ်ကြောင်းထိုး မီးရှို့နေတာကြောင့် ဒေသခံတွေ စစ်ရှောင်နေရတာ ၂ ပတ်ဝန်းကျင် ရှိလာပြီလို့ ဆိုပါတယ်။
“နေရေးအတွက် အထိုက်အလျောက် အဆင်ပြေပေမယ့် စားသောက်ရေး အတွက်က ဘေးကင်းနေသေးတဲ့ ကျေးရွာတွေက ပြည်သူတွေနဲ့ ကာကွယ်ရေးအဖွဲ့တွေ ဝိုင်းကူညီ နေပေမယ့် စစ်ရှောင်အင်အား များတာရယ်၊ ရက်တာရှည်လာတာရယ်ကြောင့် အခက်အခဲ ဖြစ်လာပါတယ်” လို့ Salingyi Border Task Force – SBTF အဖွဲ့ တာဝန်ရှိသူ တစ်ဦးက ပြောပြပါတယ်။
စစ်ကောင်စီ စစ်ကြောင်းဟာ ဇန်နဝါရီလ ပထမ အပတ်မှာ ဘင်္ဂါး၊ ဖောင်းကတာ၊ ကျောက်ဖြူတိုင်၊ မိုးကြိုးပြင်၊ ကိုင်းရွာ တွေက အိမ်ခြေ ၂၀၀ ကျော်ကို မီးရှို့ဖျက်ဆီး ခဲ့တယ်လို့ သိရပါတယ်။
ဒါ့အပြင် ဇန်နဝါရီ ၁၂ ရက်ကနေ အခုချိန်ထိ ပိုင်းတောင်ကြီး၊ ကျောက်မှော်၊ ဆားလင်းကြီးမြောက်ရွာ၊ ဖောင်းကတာ၊ ဆည်တဲရွာ တွေကို ဝင်ရောက် မီးရှို့နေကာ ပျက်စီး ဆုံးရှုံးမှုကို အတိအကျ မသိရသေးဘူးလို့ ဆိုပါတယ်။
“နမခ ကနေ ရေကြောင်းနဲ့ လာတယ်။ ပထမတစ်ကြိမ် စစ်ကြောင်းထိုးပြီး မီးရှို့တယ်။ Mi 17 နဲ့လည်း အင်အားဖြည့်သွားတယ်။ အဲ့ဒီစစ်ကြောင်းက ဆားလင်းကြီးမြို့ပေါ်ကို ပြန်ရောက်သွားတယ်။ ၁၀ ရက်နေ့ နမခ ကနေ ရေယာဉ် တစ်စီးနဲ့ လူလာချိန်းတယ်။ အဲ့နောက် လူချိန်းပြီးတော့ အခု စစ်ကြောင်းတစ်ခါ ပြန်ထိုးပြီး မီးရှို့တာဗျ။ အင်အား ၁၀၀ ဝန်းကျင်ရှိမယ်ဗျ” လို့ ဒေသခံ ကာကွယ်ရေး တပ်ဖွဲ့ဝင် တစ်ဦးက ကျေးရွာတွေ မီးရှို့ခံရတဲ့ အခြေအနေကို ရှင်းပြပါတယ်။
ဒီဇင်ဘာလ အတွင်းမှာ စစ်တပ်ရဲ့ မီးရှို့ဖျက်ဆီးမှုကြောင့် ဆားလင်းကြီးမြို့နယ်ထဲက ဆားထုံး၊ တောကျောင်း၊ လက်ပံကျွန်း စတဲ့ ကျေးရွာ ၇ ရွာမှ နေအိမ် ၅၀၀ ကျော် ဆုံးရှုံးခဲ့ရတာကြောင့် ဆားလင်းကြီး ဒေသကို အာရုံစိုက်ပေးကြဖို့နဲ့ စစ်ဘေးရှောင်၊ မီးဘေးသင့် ပြည်သူတွေကို ဝိုင်းဝန်းကူညီ ပေးကြဖို့ကိုလည်း သူက ဆက်ပြောပါတယ်။
ပြီးခဲ့တဲ့နှစ် နိုဝင်ဘာလ ၃၀ ရက်အထိ စစ်ကောင်စီတပ်ရဲ့ မီးရှို့ဖျက်ဆီးမှုကြောင့် စစ်ကိုင်းတိုင်းထဲက ပြည်သူနေအိမ် ၂,၇၄၉၆ လုံး ဆုံးရှုံးခဲ့တယ်လို့ Data For Myanmar က ထုတ်ပြန်ထားပြီး လက်ရှိ အချိန်ထိ စစ်ကြောင်းထိုး မီးရှို့တာတွေ ဆက်တိုက် လုပ်နေတာကြောင့် မီးရှို့ခံရတဲ့ အိမ်ခြေ အရေအတွက် ပိုတိုးလာနေတယ်လို့ ဒေသတွင်း သတင်းရင်းမြစ်တွေထံက သိရပါတယ်။
MK-009
