ဒီဇင်ဘာ ၂၃ ရက်နေ့ကစပြီး ဧရာဝတီမြစ်အရှေ့ဘက် မြင်းခြံမြို့နယ်တွင်းကျေးရွာအခြေစိုက် စစ်ကောင်စီစခန်းတွေကနေ မြစ်အနောက်ကမ်းက ညောင်ကားယားရွာထဲကို တိုက်ပွဲမရှိဘဲ လက်နက်ကြီးတွေ၊ ဒရုန်းတွေနဲ့ ပစ်ခတ်နေတာကြောင့် ဒေသခံတွေ အိမ်မပြန်ရဲဘဲ အနီးဝန်းကျင် တောတောင်တွေထဲမှာပဲ ဖြစ်သလိုနေထိုင်စားသောက်နေရတယ်လို့ ဆိုပါတယ်။

အဓိက ကတော့ အစားအသောက်ခက်ခဲနေတယ်ဗျ၊ စားသောက်ကုန်လိုအပ်တယ်၊ ကျွန်တော်တို့လည်း ကူညီနိုင်တာတော့ ကူညီတယ်၊ နေ့စဉ်ရက်ဆက်ကြီးဆိုတော့ ကုန်ကျစရိတ် လူ ၁၀၀၀ ကျော်ကြီးဆိုတော့ နေ့စဉ် အလျဉ်မီအောင် မကူနိုင်ဘူးဖြစ်နေတာပေါ့၊ ပြီးခဲ့တဲ့ရက်ကလည်း ညမှ ထမင်းထုတ်တွေသွားဝေရတာပေါ့နော်၊ တောထဲမှာ စားဖို့ကအခက်အခဲဖြစ်လို့ဆိုပြီး လှမ်းပြီးအကူအညီတောင်းလို့ ဆန်တွေဆီတွေဝေပြီး အဲ့ဒီနောက်ရက်ကိုမှ ထမင်းထုတ်တွေ ၁၂၀၀ စာ ညကိုးနာရီလောက်မှပဲပြီးတာပေါ့

လို့ စစ်ဘေးရှောင်တွေကိုကူညီပေးနေသူ ကိုနွေဦး-(မြောင်)က ပြောပြပါတယ်။

စစ်တပ်ရဲ့ အချိန်အခါမရွေး လက်နက်ကြီးပစ်ခတ်မှုတွေကြောင့် နေရပ်မပြန်ရသေးတဲ့ ညောင်ကားယားရွာဒေသခံတွေဟာ အနီးဝန်းကျင်တောတောင်တွေထဲမှာ မိုးကာစတွေတဲထိုးပြီးနေကြသလို၊ သစ်ပင်အောက်တွေမှာပဲ အခင်းခင်းပြီးအိပ်ကြရတာတွေရှိတယ်လို့လည်း သိရပါတယ်။

တောထဲမှာ မိသားစုလိုက် သစ်ပင်တွေအောက်မှာ အိပ်ပြီးတော့နေကြရတယ်၊ ဆယ်ရက်လောက်တော့ရှိပြီ ဒါပေမယ့် ကြာဦးမှာ ဘာလို့လဲဆိုတော့ ရွာမပြန်ရဲဘူး၊ တဖက်ကမ်းကနေ လက်နက်ကြီးတွေနဲ့ လှမ်းလှမ်းပစ်တာနဲ့ အီနာဂါနဲ့ လာလာချတဲ့အတွက်ကြောင့် ရွာထဲမနေရဲဘူး၊ တိုက်ပွဲရှိလို့မဟုတ်ဘူးဗျ၊ သက်သက်မဲ့ပစ်တာပေါ့

လို့ ကိုနွေဦး-(မြောင်)က ဆက်ပြောပါတယ်။

မြောင်မြို့နယ်တွင်းက တချို့ရွာတွေကလည်း အခုလို စစ်ကောင်စီတပ်ရဲ့ လက်နက်ကြီးပစ်ခတ်မှုတွေကြောင့် ညဘက်ပိုင်းတွေဆို တောတောင်ထဲမှာ ရှောင်တိမ်းအိပ်ကြရပြီး မနက်ပိုင်းမှ ရွာထဲပြန်ဝင် အလုပ်လုပ်လို့ရတဲ့ အခြေအနေတွေရှိနေတယ်လို့လည်း သိရပါတယ်။

ဒါ့အပြင် စစ်ကောင်စီတပ်တွေဟာ စစ်ဘေးရှောင်တွေအတွက် သွားရောက်ကူညီပေးမယ့်အဖွဲ့တွေကိုလည်း လက်နက်ကြီး နဲ့ လှမ်းပြီးပစ်ခတ်တာတွေရှိလို့ စစ်ဘေးရှောင်တွေကို နေရာပြောင်းရွှေ့တာတွေ ထပ်လုပ်ခဲ့ရသေးတယ်လို့လည်းသိရပါတယ်။

စစ်ရှောင်ကူညီတဲ့သူတွေအနေနဲ့ စစ်ဘေးရှောင်တွေရဲ့ ကျန်းမာရေးအတွက် ဆေးဝါးနဲ့ လိုအပ်တဲ့ ပစ္စည်းတွေ စုဆောင်းပြီး ကျန်းမာရေးအဖွဲ့တွေနဲ့ အတူ ထပ်မံသွားရောက်ကူညီပေးဖို့ ရှိနေတယ်လို့လည်းဆိုပါတယ်။

စစ်ကောင်စီလက်အောက်ခံတပ်တွေဟာ အောက်တိုဘာလ ၇ ရက်နဲ့ ၈ ရက်နေ့တွေတုန်းကလည်း ညောင်ကားယား ရွာထဲက နေအိမ်တွေကို နှစ်ရက်ဆက်တိုက် မီးရှို့ဖျက်ဆီးခဲ့တာကြောင့် နေအိမ်အားလုံးနီးပါးမီးလောင်ပြာကျခဲ့တယ်လို့သိရပါတယ်။

စစ်အာဏာသိမ်းပြီး နောက်ပိုင်းမှာ မြန်မာနိုင်ငံတဝှမ်း အိုးအိမ်စွန့်ခွာထွက်ပြေးနေရသူ ၁ ဒဿမ ၄ သန်းကျော် ရှိလာပြီး စစ်ကိုင်းတိုင်းထဲမှာပဲ စစ်ရှောင်ဦးရေ ၁ သိန်းဝန်းကျင်ထိရှိလာနေတယ်လို့ ကုလသမဂ္ဂလူသားချင်းစာနာမှုဆိုင်ရာ ညှိနှိုင်းရေးရုံး (UNOCHA) က ထုတ်ပြန်ထားတဲ့ စာရင်းအချက်အလက်တွေအရသိရပါတယ်။

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)