မဲခေါင်၊ စက်တင်ဘာ ၂၉
ရှမ်းပြည်အလယ်ပိုင်း၊ ခိုလန်မြို့ အခြေစိုက် အရှေ့အလယ်ပိုင်းတိုင်းစစ်ဌာနချုပ် (ရလခ) အား လက်ရှိအခြေချထားသည့် နေရာမှ ဖယ်ရှားပေးခဲ့ရပြီး ကရင်နီဒေသ မြို့တော် လွိုင်ကော်ရှိ ဒေသကွပ်ကဲရေးစစ်ဌာနချုပ် (ဒကစ) ကို တိုင်းစစ်ဌာနချုပ်အဖြစ် တိုးချဲ့ဖွင့်လှစ်ခဲ့ရကြောင်း ခိုင်မာသည့် စစ်သတင်းအရင်းအမြစ်များထံမှ သတင်းရရှိသည်။
ရလခသည် ရှမ်းပြည်တောင်ပိုင်း စစ်ရေးအချက်အချာကျသည့် ခိုလန်နှင့် နယ်မြေများကို ထိန်းချုပ်ထားရာမှ စစ်ရေးပြင်းထန်နေသည့် လွိုင်ကော်သို့ ပြည်နယ်ကျော် ပြောင်းရွှေ့ရခြင်းဖြစ်သည်။
“လွိုင်ကော်ကို ရွှေ့မယ်လို့ သိရတယ်။ ဟိုမိန်းတို့ဘာတို့ အရင် ရလခလုပ်ထားတဲ့ဟာတွေက သံလွင်မြစ် အရှေ့ဘက်ကို တြိဂံတိုင်းနဲ့ ပြန်ထည့်မယ်နဲ့ တူတယ်။ တချို့ဟာတွေက တြိဂံတိုင်းထဲ ပါသွားမယ်။ တချို့ဒေသတွေကလည်း ရပခ က ပြန်ကိုင်မယ်။ ဒီတော့ လွိုင်ကော်ကို ရပခ လက်အောက်ကနေ ခွဲထုတ်လိုက်တာပေါ့” ဟု စစ်သတင်းအရင်းအမြစ်တစ်ဦးက ပြောသည်။
ယခု သတင်းမတိုင်မီက ကရင်နီပြည်ကို အရှေ့ပိုင်းတိုင်းစစ်ဌာနချုပ် (ရပခ) က ထိန်းချုပ်ထားပြီး ၎င်း၏ လက်အောက်ခံ လွိုင်ကော် (ဒကစ) ကွပ်ကဲနေခဲ့ရာ ယခုတွင် ရလခ က ထိန်းချုပ်သွားမည်ဖြစ်ပြီး စစ်ဌာနချုပ် အမည်ကိုမူ ပြောင်းလဲမှု မရှိနိုင်ဟု CDM ဗိုလ်ကြီးဇင်ယော်က သုံးသပ်သည်။
“မပြောင်းနိုင်ဘူး။ ရလခ ပဲ ဖြစ်လောက်တယ်။ ဘာလို့လဲဆိုတော့ အရှေ့တောင်နဲ့ အရှေ့ပိုင်းတိုင်း ကြားထဲမှာ ညှပ်လိုက်တာဆိုတော့ အရှေ့အလယ်ပိုင်းတိုင်း စစ်ဌာနချုပ်လို့ပဲ ထားနိုင်တယ်၊ ကျန်တဲ့ အခြားနာမည် မပေးလောက်တော့ဘူး၊ ဘာလို့လဲဆိုတော့ အရှေ့အလယ်ပိုင်းကို ရှမ်းတောင်ဘက်ကို သူတို့ ဆွဲချလာတာ” ဟု ပြောသည်။
အရှေ့အလယ်ပိုင်းတိုင်းစစ်ဌာနချုပ် (ရလခ) လက်အောက်ခံ တပ်ရင်း/တပ်ဖွဲ့များမှာ အခြေချစစ်ဗျူဟာများအနေဖြင့် စဗခ (လင်းခေး)၊ စဗခ (ကွန်ဟိန်း) တို့ဖြစ်ပြီး ခြေလျင်တပ်ရင်းများအနေဖြင့် ခလရ (၆၆) ခိုလန်၊ ခလရ (၉၉) လင်းခေး၊ ခလရ (၁၃၁) ကျေးသီး၊ ခလရ (၁၃၂) မောက်မယ်၊ ခလရ (၁၄၉) မိုင်းရှူး၊ ခလရ (၁၅၀) မုန်းစုတ်၊ ခလရ (၁၅၁) ကာလီ၊ ခလရ (၁၅၂) ကာလေ၊ ခလရ (၁၅၃) ကုန်းပေါင်း၊ ခလရ (၂၄၆) ကွန်ဟိန်း၊ ခလရ (၂၈၆) ဝိန်းကောင်၊ ခလရ (၂၈၇) ဝမ်ဆင်း၊ ခလရ (၂၉၄) တာဆန်း၊ ခလရ (၂၉၆) တာကော်တို့ ပါဝင်ကြပြီး ခြေမြန်တပ်ရင်းများအနေဖြင့် ခမရ (၅၁၄) မိုင်းကိုင်နှင့် ခမရ (၅၂၄) ကွန်ဟိန်းတို့ ပါဝင်ကြောင်း သိရသည်။
“နောက်တစ်ခုက အဲဒီ ခိုလန်နေရာမှာ RCSS/SSA အဖွဲ့က နယ်ခြားစောင့်တပ် ပုံစံမျိုးနဲ့ ဆက်ပြီးတော့ နေရာယူရမယ်တဲ့” ဟု CDM ဗိုလ်ကြီးဇင်ယော်က ပြောသည်။
လက်ရှိ ရလခတွင် တိုင်းမှူးမရှိဘဲ ဒုတိုင်းမှူး ဗိုလ်မှူးကြီး အောင်ကျော်သက် (အလုပ်သင် ၂၅) ကသာ ကွပ်ကဲနေကြောင်း ၎င်းက ပြောသည်။
ရလခ ထိန်းချုပ်ရာ နယ်မြေသည် SSPP ၏ ဗဟို ဝမ်ဟိုင်းနှင့် လှုပ်ရှားအခြေပြုနေရာများ ဖြစ်သည်။
#MeKongNews
#ရလခ
#ဒကစ
#လွိုင်ကော်
#ခိုလန်
#ဝမ်ဟိုင်း
#စစ်ကောင်စီ
