မဲခေါင်၊ စက်တင်ဘာ ၂၉

ရှမ်းအရှေ့ဒေသတွင်းစိုက်ပျိုးပြီး တာချီလိတ်တွင် ရောင်းချရန် ပို့ဆောင်သည့် ရာဘာကား ၂စီးကို စ.စ.စ က တာချီလိတ်မြို့အဝင်၌ ဖမ်းဆီးပြီး နယ်လုံဝန်ကြီး၏ ညွှန်ကြားချက်ဟုဆိုကာ ပို့ကုန်သွင်းကုန်ဥပဒေ ပုဒ် (၈) ဖြင့် အမှုဖွင့်မည်ဟု ဆိုသည့်အတွက် မိုင်းတုံမြို့နယ်မှ ရာဘာစိုက်တောင်သူများ ဒုက္ခရောက်နေကြောင်း ရာဘာစိုက်တောင်သူများနှင့် နီးစပ်သူများထံမှ သိရသည်။

ရာဘာများမှာ မိုင်းတုံမြို့နယ်အတွင်းစိုက်ပျိုးပြီး တာချီလိတ်မြို့ရှိ ရာဘာစက်ရုံများတွင် ရောင်းချရန် စက်တင်ဘာလ ၂၃ရက်က မိုင်းတုံမြို့မှ ထွက်ခွာလာခြင်းဖြစ်ကြောင်း၊ စက်တင်ဘာလ ၂၅ရက် ညပိုင်း တာချီလိတ်မြို့အဝင် ဟွေရဲဂိတ်အကျော်တွင် စ.စ.စ ဦးဆောင်သည့်အဖွဲ့က ဖမ်းဆီးလိုက်ခြင်းဖြစ်ကြောင်း တောင်သူများနှင့် နီးစပ်သူတစ်ဦးက ပြောသည်။

“ရာဘာတွေက မိုင်းတုံကနေ တာချီလိတ်ကို ပို့တာပါ။ တာချီလိတ်က စက်ရုံတွေမှာရောင်းဖို့ပါ။ ဈေးမကောင်းသေးရင်လည်း ခဏ တာချီလိတ်မှာပဲလှောင်ထားမယ်ဆိုပြီး ပို့တာ။ နယ်စပ်ကိုလည်း မရောက်ပါဘူး။ မြို့အဝင်ပဲရှိသေးတာကို ဖမ်းလိုက်တာ။ ဒေသတွင်းစိုက်ပျိုးထားတဲ့ကုန် စစ်စစ်ပါ” ဟု ၎င်းကပြောသည်။

စက်တင်ဘာလ ၂၅ရက် ညပိုင်းက ယင်းရာဘာတင်ကား ၂စီးကို ဖမ်းဆီးကာ ယာဉ်မောင်းများကို အာမခံဖြင့် လွှတ်ပေးထားသော်လည်း စက်တင်ဘာလ ၂၈ရက် ညနေပိုင်းတွင် ပို့ကုန်သွင်းကုန်ဥပဒေ ပုဒ်မ(၈)ဖြင့် အမှုဖွင့်မည်ဟုဆိုကာ ပြန်လည်ဖမ်းဆီးသွားကြောင်း၊ ယင်းဥပဒေပုဒ်မဖြင့် အမှုဖွင့်ရန် နယ်လုံဝန်ကြီးက ညွှန်ကြားသည်ဟု စ.စ.စ က ဆိုကြောင်း နီးစပ်သူများက ပြောသည်။

မိုင်းတုံဒေသဘက်မှ စိုက်ပျိုးထွက်ရှိသည့် ရာဘာများကို တာချီလိတ်မြို့ရှိ ရာဘာစက်ရုံများသို့ ပုံမှန် နှစ်စဉ်နှစ်တိုင်း ပို့ဆောင်ရောင်းချနေခြင်းဖြစ်ပြီး ယခုကဲ့သို့ ဖမ်းဆီးခံရခြင်းမရှိကြောင်း၊ ကိုယ်တိုင်စိုက်ပျိုးသည့် ဒေသထွက်ကုန်များကို ယခုကဲ့သို့ ဖမ်းဆီးပြီး ပုဒ်မကြီးတပ်ကာ အရေးယူခြင်းကြောင့် တောင်သူများမှ များစွာထိတ်လန့်ရကြောင်း တောင်သူများနှင့် နီးစပ်သူက ပြောသည်။

“တစ်ခါမှ ဟိုဘက်ကမ်းကို မရောင်းဖူးဘူး။ သွားရလောက်အောင်လည်း ဒီကလူတွေ (ရာဘာစိုက်တောင်သူတွေ) က ပေါက်ပေါက်မြောက်မြောက် မရှိပါဘူး။ တောင်သူတွေက တာချီလိတ်ပဲရောင်းရတာလေ။ ဘယ်သွားရောင်းတတ်မှာလဲ။ အရင်က ရောင်းနေကြ အထောက်အထားဘောင်ချာတွေလည်း ရှိတယ်။ သက်ဆိုင်ရာက ဒေသထွက်ကုန်ဆိုတဲ့ ထောက်ခံချက်လည်း ပါတယ်။ ဒါတောင်ဖမ်းတယ်ဆို တောင်သူတွေက ဘာလုပ်စားရမှန်းမသိတော့ဘူး” ဟု ၎င်းက ပြောသည်။

ယင်းဖမ်းဆီးခံရသည့် ရာဘာများမှာ တောင်သူ ၅ဦးခန့်ပိုင်သည့် ရာဘာများဖြစ်ပြီး တန်ဖိုးအားဖြင့် ကျပ်သိန်း ၂၀၀ ခန့်ရှိကြောင်း၊ လက်ရှိတင် ရာဘာ၊ ကုန်ကားနှင့် ယာဉ်မောင်းများ အားလုံးအဖမ်းခံထားရသည့်အတွက် များစွာ အခက်အခဲဖြစ်နေရကြောင်း၊ ယခုကိစ္စကို နယ်လုံဝန်ကြီး သိရှိကာ အမှန်အတိုင်းကူညီဆောင်ရွက်ပေးစေလိုကြောင်း ရာဘာစိုက်တောင်သူများက တောင်းဆိုနေကြသည်။

#MeKongNews
#တာချီလိတ်
#ရှမ်းအရှေ့
#ရာဘာစက်ရုံ
#ရာဘာ
#မိုင်းတုံ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)