မဲခေါင်၊ စက်တင်ဘာ ၂၈
ရှမ်းပြည်မြောက်ပိုင်း၊ ကျောက်မဲမြို့နယ်တွင် ရှမ်းပြည်တိုးတက်ရေးပါတီ (SSPP/SSA) နှင့် ပလောင်ပြည်နယ်လွတ်မြောက်ရေးတပ်ဦး (PSLF/TNLA) နှစ်ဖက်တပ်ဖွဲ့ဝင်များ စကားများရာမှ ပစ်ခတ်မှုဖြစ်ပွားရာ TNLA တပ်ဖွဲ့ဝင် နှစ်ဦးသေဆုံးသွားသည်ဟု သတင်းရင်းမြစ်များထံမှ သိရသည်။
စက်တင်ဘာလ ၂၆ ရက်နေ့ ည ၈ နာရီခန့်တွင် ကျောက်မဲမြို့နယ် တော့ဆန်ကျေးရွာအုပ်စု မင်းကုန်းကျေးရွာတွင် ယင်းပစ်ခတ်မှုဖြစ်ပွားခဲ့ခြင်းဖြစ်သည်ဟု သတင်းရင်းမြစ်များကပြောသည်။
မင်းကုန်းကျေးရွာသို့ လူထုတွေ့ဆုံပွဲပြုလုပ်ရန် ရောက်ရှိလာသည့် SSPP တပ်ဖွဲ့ကို TNLA တပ်ဖွဲ့ဝင်အချို့က မှတ်တမ်းဓာတ်ပုံရိုက်ကူးရာမှ အငြင်းပွားမှုဖြစ်ကာ SSPPဖက်က သေနတ်ဖြင့် ပစ်ခတ်လိုက်ခြင်းဖြစ်သည်ဟု သတင်းရင်းမြစ်ကပြောသည်။
“SSPP တွေက လူထုတွေ့ဆုံပွဲလုပ်မယ်ဆိုပြီး ရောက်လာတယ်။ အဲ့ဒါကို နယ်ခံ TNLA တပ်ဖွဲ့ဝင် ၂ ဦးက SSPP နားတဲ့နေရာ တပ်ချတဲ့နေရာတွေကို မှတ်တမ်းပုံရိုက်တယ်။ SSPP ဖက်က မရိုက်ဖို့ တားတယ် နှင်ထုတ်တယ်။ အဲ့ဒါ တစ်ခါပြန်လာရိုက်လို့ သေနတ်နဲ့ ပစ်လိုက်တာ သေနတ်သံထွက်တာက ၁၀ ချက်လောက်ရှိတယ်။ TNLA ဖက်က နှစ်ယောက်သေသွားတယ်” ဟု ဖြစ်စဉ်ကိုသိရှိသည့် သတင်းရင်းမြစ်က ပြောသည်။
ယင်းသို့ ပစ်ခတ်မှုများကြောင့် တပ်ဖွဲ့ဝင်များ သေဆုံးသွားခဲ့သဖြင့် နှစ်ဖက်တပ်ဖွဲ့ဝင်များကြား စစ်ရေးတင်းမာနေလျက်ရှိကာ အပြန်အလှန် အင်အားဖြည့်တင်းမှုများလည်း လုပ်ဆောင်နေသည်ဟု သတင်းရင်းမြစ်ကပြောသည်။
“အလောင်းတွေကိုတော့ TNLA ဖက်က ပြန်သယ်သွားပြီ။ အင်အားတွေကတော့ နှစ်ဖက်စလုံး ဖြည့်ထားကြတယ်”ဟု ၎င်းသတင်းရင်းမြစ်ကပြောသည်။
SSPP နှင့် TNLA ၂ ဖွဲ့လုံးသည့် FPNCC အဖွဲ့ဝင် မဟာမိတ်များဖြစ်ကြသဖြင့် အချင်းများမှုကို ကျည်ဖောက်ဖြေရှင်းမှုများ မပြုလုပ်ပဲ အခြားနည်းလမ်းဖြင့် ပိုဖြေရှင်းသင့်သည်ဟု ရှမ်းမြောက်အရေး ကျွမ်းကျင်သူတစ်ဦးက ပြောသည်။
“ကျောက်မဲမှာက နှစ်ဖွဲ့စလုံးရှိတဲ့အပြင်ကို နယ်မြေထပ်တာတွေလည်းရှိနေတော့ အငြင်းပွားမှုတွေ အချင်းများမှုတွေက ရှိနေကြပါတယ်။ ဒါပေမယ့် ဒီလိုဖြစ်စဉ်မှာက မဟာမိတ်အချင်းချင်း သေနတ်နဲ့ပစ်ခတ်တာထက် ဖမ်းဆီးထိန်းသိမ်းပြီး ပြန်အပ်လိုက်တာမျိုး ပိုဖြစ်သင့်တယ်လို့ မြင်ပါတယ်” ၎င်းသတင်းရင်းမြစ်က ပြောသည်။
၂၀၂၅ ခုနှစ်၊ ဇွန်လ ၁၅ ရက်နေ့တွင်လည်း ကျောက်မဲမြိုႉနယ်၊ ဟူးဆွန်တောင်တွင် TNLA နှင့် SSPP အကြား ပစ်ခတ်မှု ဖြစ်ပွားခဲ့ဖူးပြီး အဆိုဖြစ်စဉ်တွင် TNLA တပ်ဖွဲႉဝင် ၂ ဦး သေဆုံးကာ ၃ ဦး ဒဏ်ရာ ရရှိခဲ့သည်။
#MeKongNews
#TNLA
#SSPP
#ပစ်ခတ်မှု
#သေဆုံး
#ကျောက်မဲ
#ရှမ်းမြောက်
