မဲခေါင်၊ စက်တင်ဘာ ၂၇
ရှမ်းပြည်တောင်ပိုင်း တောင်ကြီးမြို့နယ်နှင့်ကလောမြို့နယ်၊ အောင်ပန်း-ပင်းတယ လမ်းပိုင်းတို့တွင် ယမန်နေ့ (စက်တင်ဘာလ ၂၆ ရက်) က ယာဉ်တိုက်မှုများ ဆက်တိုက်ဖြစ်ပွားခဲ့ပြီး ၁ ဦး သေဆုံးကာ ၇ ဦးထက်မနည်း ထိခိုက်ဒဏ်ရာရရှိခဲ့ကြောင်း သိရသည်။
ယမန်နေ့ ညနေ ၆ နာရီခန့်က တောင်ကြီးမြို့နယ်၊ နောင်ထလီးကျေးရွာအနီး မြို့ရှောင်လမ်းပေါ်တွင် ဆိုင်ကယ် ၂ စီး မျက်နှာချင်းဆိုင် တိုက်မိခဲ့မှုဖြစ်ခဲ့သည်။
ဟိုပုံးမြို့နေ ဦးစောလှမွန် မောင်းနှင်လာသော Wave 110 ဆိုင်ကယ်နှင့် ဒုံခါရားကျေးရွာနေ ဦးအီညာရှို့ မောင်းနှင်ပြီး ဇနီးနှင့် ကလေး ၂ ဦး လိုက်ပါလာသည့် KENBO 110 ဆိုင်ကယ်တို့ အရှိန်မထိန်းနိုင်ဘဲ လမ်းအလယ်တွင် တိုက်မိခဲ့ခြင်းဖြစ်သည်။
ယင်းဖြစ်စဉ်ကြောင့် ဦးအီညာရှို့နှင့် မိသားစုဝင် ၃ ဦးတို့ မစိုးရိမ်ရဒဏ်ရာများ ရရှိခဲ့သော်လည်း ဦးစောလှမွန်မှာ သွေးထွက် သတိမေ့ဒဏ်ရာ (စိုးရိမ်ရ) ရရှိခဲ့ပြီး စဝ်စံထွန်းဆေးရုံ၌ ဆေးကုသမှုပေးနေစဉ် သေဆုံးသွားခဲ့ရသည်။
ဖြစ်စဉ်နှင့် ပတ်သက်၍ ပေါ့ဆစွာ မောင်းနှင်သူ ဦးစောလှမွန် (သေဆုံး) နှင့် ဦးအီညာရှို့တို့ နှစ်ဦးစလုံးအား တောင်ကြီးမြို့မရဲစခန်းတွင် အမှုဖွင့်အရေးယူထားကြောင်းသိရသည်။
အလားတူ ယမန်နေ့ ည ၆ နာရီ ၄၀ မိနစ်ဝန်းကျင်တွင် ကလောမြို့နယ်၊ အောင်ပန်း-ပင်းတယလမ်း၊ လှည်းရိုးရပ်ကွက် ဘုန်းကြီးကျောင်းဆိုင်းဘုတ်အနီး (ရွှေဘိုသူဆီဆိုင်မရောက်မီ) ၌ ကားနှင့် ဆိုင်ကယ် တိုက်မိသည့် ဖြစ်စဉ်တစ်ခု ဖြစ်ပွားခဲ့သည်။
အဆိုပါ ဖြစ်စဉ်ကြောင့် ဆိုင်ကယ်ယာဉ်မောင်း လှည်းရိုးရပ်ကွက်နေ ဦးထွန်းဦးတွင် ဘယ်ဘက်ခြေထောက် ကျိုးသွားသည့် ဒဏ်ရာ ရရှိခဲ့သ ဖြင့် ကလောဆေးရုံ၌ကုသလျက်ရှိခဲ့ကြောင်း သိရသည်။
အလားတူ ယမန်နေ့ နေ့လယ်ပိုင်းကလည်း တောင်ကြီးမြို့၊ ရေအေးကွင်းရပ်ကွက်၊ မြစိမ်းတောင်ဘုရားသွားလမ်း လမ်းအကွေ့တွင် ကောင်းထက်ကျော် မောင်းနှင်ပြီး လရောင်ထူး လိုက်ပါလာသည့် Wave 100 ဆိုင်ကယ်သည် အရှိန်မထိန်းနိုင်ဘဲ တစ်ဘက်ယာဉ်ကြောသို့ ရောက်ရှိကာ မျက်နှာချင်းဆိုင်မှ မြင့်မြတ်ထွန်း မောင်းနှင်ပြီး ရွှေထူးနိုင် လိုက်ပါလာသည့် Click-160 ဆိုင်ကယ်ကို ဝင်ရောက်တိုက်မိခဲ့သည်။
ထိုတိုက်မှုကြောင့် ရွှေထူးနိုင်တွင် သတိမေ့ဒဏ်ရာ (စိုးရိမ်ရ) ရရှိခဲ့သဖြင့် စဝ်စံထွန်းဆေးရုံသို့ ပို့ဆောင်ခဲ့ရပြီး ကျန် ၃ ဦးတွင် မစိုးရိမ်ရဒဏ်ရာများ ရရှိခဲ့သည်။ မဆင်မခြင် မောင်းနှင်သူ ယာဉ်မောင်း ကောင်းထက်ကျော်အား တောင်ကြီးနယ်မြေရဲစခန်းတွင်အမှုဖွင့်ထားကြောင်း သိရသည်။
#MeKongNews
#တောင်ကြီး
#အောင်ပန်း
#ဆိုင်ကယ်တိုက်
#သေဆုံး
#ဒဏ်ရာရ
