မဲခေါင်၊ စက်တင်ဘာ ၂၇

တောင်ကြီးမြို့နယ်၊ ဆောင်းဖိုးဒုံတခေါ့ရွာတွင် သမင်ဖြူရောဂါရှိသည်ဟုဆိုကာ ရွာမှနှင်ထုတ်ခံခဲ့ရသည့် အသက် ၇၂ နှစ်အရွယ် အဖိုးသည် ရွာအတွင်း နေအိမ်တွင် ပြန်လည်နေထိုင်ခွင့်ရရှိပြီဖြစ်သလို ဖြတ်တောက်ခံထားရသည့် သောက်သုံးရေနှင့် လျှပ်စစ်မီးများလည်း ပြန်လည်ရရှိပြီဖြစ်ကြောင်း သိရသည်။

အဆိုပါအဖိုးကို စက်တင်ဘာ ၁၉ ရက်တွင် ရွာသားများက ကျေးရွာအတွင်းမှ ထွက်ခွာရန် ပြောဆိုနှင်ထုတ်ခဲ့ပြီးနောက် အုပ်ချုပ်ရေးနှင့် ကျန်းမာရေးဌာနမှ တာဝန်ရှိသူများပါဝင်သည့် အဖွဲ့က ကျေးရွာသို့ သွားရောက်ကာ ဒေသခံများနှင့် တွေ့ဆုံညှိနှိုင်းခဲ့ခြင်းဖြစ်သည်။

ညှိနှိုင်းမှုအတွင်း သမင်ဖြူရောဂါသည် ကူးစက်တတ်သည့်ရောဂါမဟုတ်သဖြင့် အခြားသူများထံ ကူးစက်နိုင်ခြင်းမရှိကြောင်း ရှင်းလင်းခဲ့ပြီးနောက် အဖိုးအား ကျေးရွာအတွင်း ပြန်လည်နေထိုင်ခွင့်ပြုခဲ့သည်။

“ဆောင်းဖိုး ဒုံတခေါ့ ဖြစ်ခဲ့တဲ့ကိစ္စအားလုံး အဆင်ပြေပြေ ပြန်ဖြစ်ပြီ။ အဖေလည်း အိမ်မှာပြန်နေလို့ရပြီ။ ရေ၊ မီးလည်း အကုန်ပြန်ရပါပြီရှင့်” ဟု အဖိုး၏မိသားစုဘက်မှ လူမှုကွန်ရက်တွင် အသိပေးထားသည်။

ထို့အပြင် အဖိုး၏ နေအိမ်သို့ သောက်သုံးရေနှင့် လျှပ်စစ်မီး ဖြတ်တောက်ထားမှုများလည်း ရှိခဲ့သော်လည်း ယခုအခါ အဆိုပါကိစ္စများအားလုံး ပြေလည်သွားပြီဖြစ်ပြီး အဖိုးမှာ နေအိမ်တွင် ပုံမှန်ပြန်လည်နေထိုင်နိုင်သကဲ့သို့ ရေနှင့် လျှပ်စစ်မီးများလည်း ပြန်လည်ရရှိပြီဖြစ်ကြောင်း သိရသည်။

သို့သော် ညှိနှိုင်းမှုများပြုလုပ်ပြီးနောက်ပိုင်းတွင်လည်း အဖိုးအနေဖြင့် အိမ်အပြင်ထွက်ခွင့်မရှိခြင်း၊ လူစည်ကားသည့်နေရာများနှင့် ပွဲလမ်းသဘင်များသို့ မသွားရခြင်း၊ ဈေးမသွားရခြင်းစသည့် စည်းကမ်းများ သတ်မှတ်ခံထားရသည်ဟု ဒေသခံများက ပြောဆိုခဲ့ကြသည်။
ယင်းကြောင့် ရွာအတွင်း ပြန်လည်နေထိုင်ခွင့်ရသော်လည်း အဖိုးမှာ နေအိမ်အတွင်း၌သာ နေထိုင်ရသည့်အခြေအနေ ဖြစ်နေခဲ့ပြီး အကျယ်ချုပ်ချထားသကဲ့သို့ ဖြစ်နေသည်ဟု ဒေသခံတစ်ဦးက ပြောသည်။

ယင်းဖြစ်စဉ်နှင့်ပတ်သက်၍ ဥပဒေပညာရှင်တစ်ဦးက လူတစ်ဦးအား အိမ်အပြင်ထွက်ခွင့်မပြုဘဲ တားဆီးချုပ်နှောင်ခြင်းသည် အခြေအနေပေါ်မူတည်၍ ရာဇသတ်ကြီးဥပဒေပါ မတရားချုပ်နှောင်မှုဆိုင်ရာ ပြဋ္ဌာန်းချက်များနှင့် ငြိစွန်းနိုင်ကြောင်း ရှင်းပြထားသည်။

ဆောင်းဖိုးဒုံတခေါ့ရွာတွင် ယခင်ကလည်း သမင်ဖြူရောဂါရှိသည်ဟုဆိုကာ ရွာသားအချို့ကို ရွာမှ ထွက်ခွာစေခဲ့ဖူးကြောင်း ဒေသခံများထံမှ သိရသည်။

သမင်ဖြူရောဂါသည် အရေပြားအရောင်ဖြစ်စေသည့် melanin လျော့နည်းမှုကြောင့် အရေပြားပေါ်တွင် အဖြူရောင်အကွက်များ ဖြစ်ပေါ်သည့်အခြေအနေဖြစ်ပြီး ကူးစက်ရောဂါမဟုတ်သည့်အတွက် လူတစ်ဦးမှတစ်ဦးသို့ ထိတွေ့ခြင်း၊ အတူနေခြင်း သို့မဟုတ် အစားအစာအတူစားခြင်းတို့မှတစ်ဆင့် ကူးစက်ခြင်းမရှိကြောင်း သိရသည်။

#MeKongNews
#တောင်ကြီး
#သမင်ဖြူ
#အဖိုးအို
#နှင်ထုတ်
#ရွာပြန်နေ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)