မဲခေါင်၊ စက်တင်ဘာ ၂၄
Probox၊ AD Van ကဲ့သို့ လူစီးယာဉ်များ၏ အမိုးပေါ်တွင် ပစ္စည်းများ တင်ဆောင်သယ်ယူခြင်း မပြုလုပ်ကြရန်နှင့် ပြုလုပ်ပါက အရေးယူမည်ဖြစ်ကြော်း ရှမ်းပြည်အရှေ့ပိုင်း၊ ကျိုင်းတုံမြို့ရှိ အမှတ်(၁၉) ယာဉ်ထိန်းရဲတပ်ဖွဲ့ ဒုတပ်ဖွဲ့ခွဲ(ရှမ်းအရှေ့)မှ အသိပေး ကြေညာထားသည်။
ယင်းစည်းကမ်းနှင့်ပတ်သက်၍ ယနေ့ စက်တင်ဘာ ၂၄ ရက်မှ စက်တင်ဘာ ၃၀ ရက်အထိ ပညာပေးကာလအဖြစ် ဆောင်ရွက်သွားမည်ဖြစ်ပြီး အောက်တိုဘာ ၁ ရက်မှစတင်၍ စည်းကမ်းဖောက်ဖျက်သူများကို အရေးယူဆောင်ရွက်သွားမည် ဖြစ်ကြောင်း ထုတ်ပြန်ချက်တွင် ပါဝင်သည်။
“ဒီအမိန့်ကတာချီလိတ်ကနေ မိုင်းဆတ်၊ မိုင်းတုံကိုဖြတ်ပြီး ရှမ်းတောင်သွားတဲ့ ခရီးသည်တင်ကားတွေ ဂရုစိုက်ဖို့လိုမယ်။ အဲလိုမှမတင်ရရင်လည်း ကားတွေ အခက်ကြုံကြရမှာ”ဟု ယာဥ်မောင်းတစ်ဦးက ပြောသည်။
ရှမ်းအရှေ့မှ ရှမ်းတောင်သို့ပြေးဆွဲနေသည့် ယာဥ်ငယ်များအနေဖြင့် ခရီးသည်သာမက ကုန်ပါတင်ဆောင်မှသာ တွက်ချေကိုက်ကြရသည်ဟု ၎င်းက ပြောသည်။
ယာဉ်မောင်းနှင်သူများအနေဖြင့် သတ်မှတ်ထားသည့် ယာဉ်စည်းကမ်းများကို လိုက်နာကြရန်နှင့် လူစီးယာဉ်များ၏ အမိုးပေါ်တွင် ပစ္စည်းများ တင်ဆောင်သယ်ယူခြင်း မပြုလုပ်ကြရန် ကျိုင်းတုံ ယာဉ်ထိန်းရဲတပ်ဖွဲ့က အသိပေးထားသည်။
#MeKongNews
#ကျိုင်းတုံ
#ရှမ်းအရှေ့
#လူစီးယာဉ်
#ယာဉ်ထိန်းရဲ
