မဲခေါင်၊ စက်တင်ဘာ ၂၃
Time မဂ္ဂဇင်းက အာဏာသိမ်း သမ္မတ စစ်ခေါင်းဆောင် မင်းအောင်လှိုင်နှင့် တွေ့ဆုံမေးမြန်းခဲ့သည့် အင်တာဗျူးကို မူလအမေးအဖြေပုံစံ မဟုတ်ဘဲ ဆောင်းပါးပုံစံဖြင့် စိတ်ကြိုက်ရေးသားဖော်ပြခဲ့သည်ဟုဆိုကာ Time မဂ္ဂဇင်းနှင့် သတင်းထောက် Charlie Campbell တို့ကို စစ်ကောင်စီက ပြင်းပြင်းထန်ထန် ပြစ်တင်ရှုတ်ချကြောင်း ယနေ့ စက်တင်ဘာလ ၂၃ ရက်တွင် သတင်းထုတ်ပြန်လိုက်သည်။
စစ်ကောင်စီ၏ ထုတ်ပြန်ချက်အရ စင်ကာပူအခြေစိုက် Time မဂ္ဂဇင်း အာရှဗျူရိုအကြီးအကဲ သတင်းထောက် Charlie Campbell သည် စင်ကာပူနိုင်ငံဆိုင်ရာ မြန်မာသံရုံးမှတစ်ဆင့် “The Future of Myanmar” ခေါင်းစဉ်ဖြင့် အင်တာဗျူးပြုလုပ်ရန် မေတ္တာရပ်ခံခဲ့ခြင်းဖြစ်ကြောင်း သိရသည်။
ထိုသို့ တောင်းဆိုလာမှုအပေါ် စစ်ခေါင်းဆောင် သမ္မတ မင်းအောင်လှိုင်က နေပြည်တော်၌ လက်ခံတွေ့ဆုံ မေးမြန်းမှုများ ပြုလုပ်ခဲ့သော်လည်း Time မဂ္ဂဇင်း အွန်လိုင်းတွင် ဖော်ပြရာ၌ မူလ အမေး၊ အဖြေ ပုံစံအတိုင်း မဟုတ်ဘဲ ဆောင်းပါးပုံစံဖြင့်သာ ရေးသားဖော်ပြခဲ့သည်ဟု စစ်ကောင်စီက ဆိုသည်။
ထို့အပြင် ဖြေကြားခဲ့သည့် အချက်အလက်များကို အမှန်တကယ် ထင်ဟပ်ဖော်ပြခြင်း မရှိသည့်အပြင် မလိုလားအပ်သည့် ရေးသားချက်များ၊ အခြားပုဂ္ဂိုလ်များနှင့် တွေ့ဆုံမေးမြန်းမှုများနှင့် သုံးသပ်ချက်များကိုသာ ဦးစားပေး ထည့်သွင်းဖော်ပြခဲ့ကြောင်း စစ်ကောင်စီက စွပ်စွဲထားသည်။
Time မဂ္ဂဇင်းနှင့် သတင်းထောက်တို့အနေဖြင့် ကနဦး ဆွေးနွေးသဘောတူညီချက်တွင် မပါဝင်သည့် အကြောင်းအရာများကို အလေးပေးဖော်ပြကာ နိုင်ငံတကာမှ အထင်အမြင်လွဲမှားစေမည့် အသုံးအနှုန်းများ သုံးနှုန်းရေးသားခဲ့သဖြင့် မီဒီယာကျင့်ဝတ်သိက္ခာကို စောင့်ထိန်းလိုက်နာခြင်း မရှိကြောင်းနှင့် စစ်ခေါင်းဆောင်နှင့် အင်တာဗျူးအပြည့်အစုံ မူရင်းအမေးအဖြေများကို စစ်ကောင်စီဘက်မှ ဆက်လက်ထုတ်လွှင့်သွားမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။
#MeKongNews
#စစ်ကောင်စီ
#မင်းအောင်လှိုင်
#အင်တာဗျူး
#စင်ကာပူ
