မဲခေါင်၊ စက်တင်ဘာလ ၂၃
ရှမ်းပြည်တောင်ပိုင်း၊ ပင်လောင်းမြို့နယ်၊ နောင်တရားမြို့နယ်ခွဲ၊ ပေါအင်အုပ်စု၊ ထီရုဲင်ကျေးရွာတွင် ကြက်သွန်စိုက်ရန် လယ်ထွန်နေသည့် ဒေသခံလူငယ်တစ်ဦးကို PNO ပြည်သူ့စစ်အဖွဲ့ဝင်များက မူးယစ်ဆေးဝါးသုံးစွဲသည်ဟု စွပ်စွဲကာ ရိုက်နှက်ပြီး သေနတ်ဖြင့်ပါ ပစ်ခတ်ခြိမ်းခြောက်ခဲ့ကြောင်း ဒေသခံများထံမှ သိရသည်။
ထီရုဲင်ကျေးရွာနေ ခွန်ကျော်ထွန်းကို စက်တင်ဘာလ ၂၂ ရက် ညနေ ၆ နာရီခန့်တွင် PNO ပြည်သူ့စစ်အဖွဲ့ဝင် တတင်နှင့် အဖွဲ့က လာရောက်ပြီး မူးယစ်ဆေးဝါးသုံးစွဲသည်ဟု စွပ်စွဲကာ သေနတ်ဒင်ဖြင့် အကြိမ်ကြိမ် ရိုက်နှက်ခဲ့ကြောင်း ဒေသခံများက ပြောသည်။
ရိုက်နှက်စဉ် ခွန်ကျော်ထွန်းက ခေါင်းကို သေနတ်ဒင်ဖြင့် ရိုက်ခံရပြီး လက်ဖြင့် ကာကွယ်ခဲ့သည့်အတွက် လက်တွင်လည်း ဒဏ်ရာရရှိခဲ့ကြောင်း သိရသည်။ ထို့အပြင် ၎င်း၏ ခြေထောက်အောက်ဘက်ကိုလည်း သေနတ်ဖြင့် သုံးချက် ပစ်ခတ်ခဲ့ကြောင်း ဒေသခံများက ဆိုသည်။
“အလုပ်လုပ်နေတဲ့သူတစ်ယောက်ကို မူးယစ်ဆေးသုံးတယ်ဆိုပြီး စစ်ဆေးမေးမြန်းတာထက် ရိုက်နှက်တာနဲ့ ဖြေရှင်းသွားတာပါ။ ဒီလိုလုပ်တာကြောင့် ရွာကလူငယ်တွေ အပြင်ထွက်ပြီး အလုပ်လုပ်ဖို့တောင် စိုးရိမ်လာကြပါတယ်။ အပြစ်ရှိ၊ မရှိကို ဥပဒေနဲ့အညီ စစ်ဆေးသင့်ပြီး လက်နက်နဲ့ အနိုင်ကျင့်တာမျိုး မဖြစ်သင့်ပါဘူး” ဟု ထီရုဲင်ကျေးရွာမှ ဒေသခံတစ်ဦးက ပြောသည်။
ဒေသခံများ၏ ပြောကြားချက်အရ ခွန်ကျော်ထွန်းသည် လက်ရှိတွင် ရိုက်နှက်ခံရသည့် ဒဏ်ရာများကြောင့် ခန္ဓာကိုယ်ရောင်ကိုင်းနေပြီး ပုံမှန်သွားလာနိုင်ခြင်းမရှိသေးကြောင်း သိရသည်။
ထို့အပြင် ပင်လောင်းနှင့် နောင်တရားဒေသအတွင်း မူးယစ်ဆေးဝါးသုံးစွဲသည်ဟု စွပ်စွဲကာ ဒေသခံလူငယ်များကို ဖမ်းဆီးရိုက်နှက်ခြင်းနှင့် ငွေကြေးတောင်းခံခြင်းများ မကြာခန ဖြစ်ပွားနေကြောင်း ဒေသခံများက ပြောသည်။
ပြီးခဲ့သည့် မေလ ၁၆ ရက်ကလည်း တကူးမွူးကျေးရွာမှ လူငယ် ၄ ဦးကို PNO ပြည်သူ့စစ်အဖွဲ့က ဖမ်းဆီးစစ်ဆေးခဲ့ပြီး မူးယစ်ဆေးဝါးတွေ့ရှိခြင်းမရှိသော်လည်း မူးယစ်ဆေးဝါးသုံးစွဲသည်ဟု စွပ်စွဲကာ ရိုက်နှက်ခဲ့ပြီး ငွေကြေးပေး၍ ပြန်လည်လွတ်မြောက်ခဲ့ရကြောင်း ဒေသခံများထံမှ သိရသည်။
#MeKongNews
#နောင်တရား
#ရှမ်းတောင်
#ပင်လောင်း
#ပြည်သူ့စစ်
#သေနတ်
