မဲခေါင်၊ စက်တင်ဘာ ၂၀
“ဝ”တပ်ဖွဲ့ (ÜWSA) ဌာနချုပ် ပန်ဆန်းမြို့ ဟာကျုံးလမ်းရှိ ဂိုဒေါင်တစ်ခု စက်တင်ဘာ ၁၅ ရက်ညပိုင်းက မီးလောင်ကျွမ်းခဲ့ပြီး တရုတ်ယွမ်ငွေ ၁၀၀,၀၀၀ (ကျပ်သိန်း ၇၀၀ ဝန်းကျင်) ခန့် ပစ္စည်းဥစ္စာဆုံးရှုံးခဲ့ကြောင်း “ဝ”ပြည်တရားရေးကော်မတီ-WSP က ယမန်နေ့ညတွင် ထုတ်ပြန်သည်။
စက်တင်ဘာ ၁၅ ရက် ည ၁၂ နာရီခန့်တွင် ဂိုဒေါင် မီးလောင်မှုဖြစ်ကြောင်း သတင်းရရှိပြီးနောက် မီးသတ်ဝန်ထမ်းများနှင့် ကယ်ဆယ်ရေးအဖွဲ့များက လူအင်အား ၆၅ ဦး၊ မီးသတ်ယာဉ် ၅ စီးနှင့် ရေဖြန်းယာဉ် ၂ စီး အသုံးပြုကာ တစ်နာရီကျော်ကြာ မီးငြှိမ်းသတ်ခဲ့ရသည်။
အခင်းဖြစ်ပွားပြီးနောက် မီးသတ်ဌာနက နေရာစစ်ဆေးခြင်းနှင့် မျက်မြင်သက်သေများကို မေးမြန်းခြင်းများ ပြုလုပ်ခဲ့ရာ အဆောက်အအုံဟောင်းဖြစ်ခြင်း၊ လျှပ်စစ်ဝါယာကြိုးများ ဟောင်းနွမ်းနေခြင်းနှင့် ရေရှည်ပြုပြင်ထိန်းသိမ်းမှု မပြုလုပ်ထားခြင်းတို့ကြောင့် ဝါယာကြိုးထိတွေ့ကာ လျှပ်စစ်ရှော့ဖြစ်ပြီး မီးလောင်ခဲ့သည်ဟု ထုတ်ပြန်ချက်တွင်ဖော်ပြသည်။
အဆိုပါ မီးလောင်မှုကြောင့် လူထိခိုက်မှု ရှိမရှိကို ထုတ်ပြန်ထားခြင်းမရှိသော်လည်း ဂိုဒေါင်အတွင်းရှိ ပစ္စည်းများနှင့် အဆောက်အအုံပျက်စီးမှုများအပါအဝင် စီးပွားရေးဆုံးရှုံးမှုမှာ တရုတ်ယွမ်ငွေ ၁၀၀,၀၀၀ ခန့် ရှိခဲ့ကြောင်း ဆိုသည်။
မီးသတ်ဌာနက ယခုဖြစ်စဉ်နှင့်ပတ်သက်၍ ဆက်လက်စုံစမ်းစစ်ဆေးနေပြီး ဂိုဒေါင်များ၊ အငှားအိမ်များနှင့် အဆောက်အအုံပိုင်ရှင်များအနေဖြင့် လျှပ်စစ်ဝါယာကြိုးများကို ပုံမှန်စစ်ဆေးပြုပြင်ရန် လိုအပ်ကြောင်း သတိပေးထားသည်။
အထူးသဖြင့် ဟောင်းနွမ်းပျက်စီးနေသည့် လျှပ်စစ်ဝါယာကြိုးများနှင့် ပစ္စည်းများကို အချိန်မီလဲလှယ်ပြုပြင်ရန်၊ လျှပ်စစ်အားပိုမိုသုံးစွဲခြင်းနှင့် ဝါယာကြိုးများကို စနစ်မကျစွာ ချိတ်ဆက်အသုံးပြုခြင်းများကို ရှောင်ရှားရန် မီးသတ်ဌာနက အသိပေးထားသည်။
#MeKongNews
#ပန်ဆန်း
#ဝတပ်ဖွဲ့
#မီးလောင်
#ဂိုဒေါင်
#ယွမ်
