ကော့ကရိတ်မြို့နယ်မှာ ဒီဇင်ဘာ ၁၆ ရက်နေ့က စတင်ဖြစ်ပွားခဲ့တဲ့ KNLA-PDF ပူးပေါင်းတပ်ဖွဲ့တွေနဲ့ စစ်တပ်နဲ့ BGF ပူးပေါင်းအဖွဲ့တွေရဲ့ တိုက်ပွဲတွေဟာ ၁၀ ရက်ကျော်ကြာလာပြီး မနေ့ ဒီဇင်ဘာ ၂၇ ရက်နေ့ ညဘက်အထိ ဆက်လက် ပြင်းထန်နေတာပါ။
ဒီဇင်ဘာ ၂၆ ရက်နေ့က ရွှေကြက်မင်းဘုန်းကြီးကျောင်းရဲ့ ဆွမ်းစားဆောင်ပေါ်ကို လက်နက်ကြီးကျပြီး သံဃာတော် တစ်ပါး ပျံလွန်တော်မူကာ သံဃာတော်တွေ ထိခိုက်ဒဏ်ရာရခဲ့ သလို အရပ်သားတွေ ထိခိုက်သေဆုံးမှုတွေ ရှိနေပါတယ်။
လေယာဉ်နဲ့ မနေ့က မနက်ပိုင်း လာပစ်သေးတယ်။ ဘယ်နားမှာလဲတော့ မသိဘူး။ ညီမတို့ အဝေးကနေပဲ မြင်ရတယ်။ နေ့လယ်ဘက်တွေလည်း ဝဲသေးတယ်။ ညနေဘက်လည်း လာတယ်။ ဘာတွေ လာကြည့်တာလဲ မသိဘူး။ တပတ်လောက်ပတ်ပြီး ပြန်သွားတယ်။ ညဘက်အချိန်တွေ ထိလည်း လက်နက်ကြီးတွေက ဆက်ပြီး ပစ်နေတုန်းပဲ
လို့ ကော့ကရိတ်မြို့ အနီး ကျေးရွာနေ ဒေသခံ တဦးက ပြောပြပါတယ်။
စစ်တပ်ဟာ အရင်က (၉၇) တပ်ရင်းနဲ့ လှိုင်ဝကုန်းပေါ်ကနေ လက်နက်ကြီးတွေ ပစ်ပေမယ့် လက်ရှိမှာတော့ အမြောက်တပ်တွေက မြို့ပတ်ပတ်လည်မှာ နေရာယူထားကြပြီး ကော့ကရိတ် အားကစားကွင်းနဲ့ ချောင်းတောင်နားက လယ်ကွင်းတွေမှာပါ အမြောက်တွေ ဖြန့်ကျက်ထားတယ်လို့ ဒေသခံတဦးက ဆိုပါတယ်။
တချက်တချက်ပစ် ရင်ဘတ်ပါ အောင့်တယ်။ ၁၂၀ မမတွေလေ။ ညီမတို့လို ကလေးတွေတောင် အဲ့လောက် ဖြစ်နေရင် သက်ကြီးရွယ်အိုတွေဆို ဘယ်လိုနေမှာလဲ။ သူတို့က တမင်ကို ပြည်သူတွေကြား နေရာ ဝင်ယူနေတာ။ ညီမတို့ အပိုင်းလည်း မလုံခြုံတော့ဘူး
လို့ မြို့နေဒေသခံ တဦးက မဲခေါင်သတင်းကို ပြောပြပါတယ်။
တိုက်ပွဲ အတွင်း စစ်တပ်ဘက်က အမြောက်တပ်တွေအပြင် လေကြောင်းကနေ Jet Fighter တွေ အသုံးပြုပြီး အင်အား အလွန်အကျွံသုံး နေတာကြောင့် နေအိမ်တွေနဲ့ အရပ်သားတွေကို ထိမှန်ခဲ့လို့ ထိခိုက်ဒဏ်ရာ ရသူတွေနဲ့ သေဆုံးသူတွေ ရှိလာတယ်လို့ ဒေသခံတွေက ပြောကြပါတယ်။
လက်ရှိအချိန်မှာ စစ်တပ်နဲ့ BGF ပူးပေါင်းတပ်ဖွဲ့က ကော့ကရိတ်မြို့ပေါ် အနှံ့ စစ်အင်အား၊ လက်နက်အင်အား ဖြန့်ကျက်ထားပြီး KNLA ပူးပေါင်းတပ်ဖွဲ့တွေနဲ့ တိုက်ပွဲတွေ ဆက်လက် ပြင်းထန်နေတာကြောင့် ကော့ကရိတ်မြို့နယ်ထဲက ဒေသခံ ထောင်ချီပြီး ဘေးလွတ်ရာကို အရေးပေါ် ထွက်ပြေး တိမ်းရှောင်နေရတယ်လို့ သိရပါတယ်။
