မဲခေါင်၊ ဩဂုတ် ၂၁
ပြီးခဲ့သည့် တစ်နှစ်အတွင်း ရှမ်းပြည်တွင် စစ်ရေးဂိတ်များမှ တဆင့် စစ်ကောင်စီက ပြေး၄ပြေးဟု သတ်မှတ်ခံရသူ ၇၈၂ ဦးအဖမ်းခံခဲ့ရသည်ဟု သိရသည်။
စစ်ကောင်စီ၏ ဩဂုတ် ၂၀ ရက်တွင် ကျင်းပသည့် ရှမ်းပြည်လွတ်တော်အစည်းအဝေးအတွင်း လုံ/နယ် ဝန်ကြီးဆိုသူ ဗိုလ်မှူးကြီး စိန်ဝင်းက လွတ်တော်ကိုယ်စားလှယ်၏ မေးခွန်းကို ဖြေကြားရာတွင် ယင်းအချက်ကိုပါ ထည့်သွင်းပြောဆိုခြင်းဖြစ်သည်။
စစ်ဆေးရေဂိတ်များနှင့် လေဆိပ်များတွင် PSMS စနစ်နှင့် မှတ်ပုံတင်များကို စစ်ဆေးရာမှ ဖမ်းဆီးရမိခဲ့ခြင်းဖြစ်သည်ဟု စစ်ကောင်စီ၏ ရှမ်းပြည် လုံ/နယ်ဝန်ကြီးကပြောသည်။
“ရှမ်းပြည်နယ်အတွင်း ပူးပေါင်းစစ်ဆေးရေးဂိတ်များနှင့်လေဆိပ်များမှ ၂၀၂၅ခုနှစ်မှာတော့ ပြေး၄ပြေးအနက် စစ်ပြေး ၂၁၁ ဦး ရဲပြေး ၁၇၀ တရားခံပြေး ၃၇၀ ဦး စုစုပေါင်း ၇၈၂ ဦးကို ဖမ်းဆီးရမိခဲ့ပြီး”ဟု ၎င်းကပြောသည်။
ထို့အပြင် တရားမဝင် ကုန်ပစ္စည်း ၇၂ မူးယစ်ဆေးဝါးမှု ၁၀၉ မှု တရားမဝင်နိုင်ငံခြားသား ၂၅ ဦး လိုင်စင်မဲ့မော်တော်ယာဉ် ၄၆ စီး လက်နက်ခဲယမ်းမှု ၆ မှုစသည်တို့ကိုလည်း ဖမ်းဆီးရမိခဲ့သည်ဟုဆိုသည်။
ထို့အပြင် နိုင်ငံသား စိစစ်ဆေးကဒ်ပြားနှင့်ပတ်သက်ပြီး ခရီးသွားလာမှု ခွဲခြားထားခြင်းမျိုး ညွှန်ကြားထားခြင်း မရှိကြောင်းလည်း ၎င်းကဆိုသည်။
သို့သော် လက်တွေ့မြေပြင်တွင်မူ ခွဲခြားမှုများ ရှိနေသည်ဟု မေးခွန်းမေးမြန်းသည့် ကွတ်ခိုင်လွှတ်တော်ကိုယ်စားလှယ် ဦးဌေးဝင်းလှိုင်ကပြောသည်။
“၅ မျဉ်းစောင်း ၈ မျဉ်းစောင်းဆိုရင် ရှမ်းပြည်နယ်ထဲကို မလာရဘူး စသည်ဖြင့် ကန့်သတ်တားမြစ်မှုတွေ ပြုလုပ်နေကြောင်း ခရီးသွားပြည်သူများ စိတ်အနှောက်အယှက်များစွာကြုံတွေ့နေရကြောင်း နှင့် တိုင်းရင်းသားပြည်သူများ၏ စိတ်ထဲမှာ နယ်မြေဒေသ ခွဲခြားထားသလို စိတ်ခံစားမှုကိုဖြစ်ပွားစေပါတယ်။”ဟု ၎င်းကပြောသည်။
ထို့အပြင် စစ်ဆေးရေးဂိတ်မှ ငွေကြေးတောင်းခံခြင်း ခွဲခြားခြင်းစသည်များကို သက်သေများနှင့်တိုင်ကြားနိုင်သည်ဟု စစ်ကောင်စီ ရှမ်းအစိုးရကဆိုသော်လည်း စစ်ဆေးရေးဂိတ်များတွင် ဖုန်းအသုံးပြုခွင့်ပိတ်ထားသဖြင့် သက်သေအထောက်အထားရယူရန် ခက်ခဲသည်ဟုလည်း လွှတ်တော်ကိုယ်စားလှယ်ကပြောသည်။
#MeKongNews
#ရှမ်းပြည်
#ဖမ်းဆီး
#စစ်ကောင်စီ
#စစ်ဆေးရေး
