မဲခေါင်၊ ဇူလိုင် ၉

မိုင်းဖြတ်မြို့နယ်အတွင်း လယ်ယာမြေများဝယ်ယူပြီး ရွှေခိုးတူးနေသူများကို ကာကွယ်ပေးသည့် နမ့်ယွန်းကျေးရွာအုပ်စုမှ ပြည်သူ့စစ်ခေါင်းဆောင် တူးတူး (ခ) လင်းဇာနည်မောင်ကို ကျိုင်းတုံ၊ တြိဂံတိုင်းမှ ဖမ်းဆီးသွားကြောင်း ဒေသခံများထံမှ သိရသည်။

နမ့်ယွမ်းပြည်သူ့စစ်ခေါင်းဆောင် တူးတူး (ခ) လင်းဇာနည်မောင်မှာ နမ့်ယွန်းကျေးရွာအုပ်ချုပ်ရေးမှူး ဒါယေလှနှင့် ပေါင်းကာ လုပ်ငန်းရှင်များထံမှ ငွေအမြောက်အများယူပြီး ရွှေခိုးတူသည်များကို ကာကွယ်ပေးထားခြင်းဖြစ်ကြောင်း၊ မိုင်းဖြတ်မြို့နယ်အတွင်းရှိ ဆီမွန်းအုပ်စု၊ ဝမ်ပုံနှင့် နမ့်ယွန်းအုပ်စုမှ လယ်ယာမြေများကို ဝယ်ယူကာ ရွှေခိုးတူးခြင်းဖြစ်ကြောင်း ဒေသခံသတင်းရင်းမြစ်တစ်ဦးက ပြောသည်။

“နမ့်ယွန်းပြည်သူ့စစ်ခေါင်းဆောင် ကျိုင်းတုံတိုင်းမှာ ဖမ်းထားတယ် အမှုဖွင့်မဖွင့်မသိရသေးပါဘူး။ တကယ်တမ်းလည်း မိုင်းဖြတ်မြို့မှာ နမ့်ယွန်းပြည်သူ့စစ်တာဝန်ယူပြီး အခွန်ကောက်စားပြီး တရားမဝင်ရွှေတူးနေတာပါ။ လက်နက်အားကိုးနဲ့ တရားမဝင်ရွှေတူးနေတယ်။ တခြားတူးနေသူတွေကိုလည်း ကာကွယ်ပေးတယ်။ ပြည်သူအများပုံစံ (၇)အမည်ပေါက် လယ်ယာမြေတွေလည်း အများကြီးပျက်ဆီးနေပါပြီ” ဟု ၎င်းကပြောသည်။

လက်ရှိတွင် ပြည်သူ့စစ်ခေါင်းဆောင်ကို ဖမ်းဆီးထားသည့်အတွက် ရွှေခိုးတူးသည်များကို ရပ်နားထားသော်လည်း လယ်ယာမြေအများစုမှာ ပျက်စီးသွားပြီဖြစ်ကြောင်း၊ ထို့ကြောင့် အရေးယူမည်ဆိုပါကလည်း ထိထိရောက်ရောက်အရေးယူစေလိုကြောင်း ဒေသခံများက ပြောသည်။

ရှမ်းအရှေ့တွင် ယခင်က တောင်များ၊ ချောင်းများ၌သာ ရွှေတူးဖော်သော်လည်း နောက်ပိုင်းတွင် လယ်ယာမြေဝယ်ယူကာ လယ်မြေအတွင်း ရွှေတူးဖော်မှုများပါ လုပ်လာကြပြီး အများစုမှာ တရုတ်လုပ်ငန်းရှင်များဖြစ်ကြောင်း သိရသည်။

မိုင်းဖြတ်မြို့နယ်သည် စစ်ကောင်စီအစိုးရအဖွဲ့တွင် လဝက ဒုဝန်ကြီးအဖြစ် တာဝန်ယူထားသည့် ဦးလင်းဇော်ထွန်း၏ မြို့နယ်လည်းဖြစ်သည်။

#MeKongNews
#မိုင်းဖြတ်မြို့နယ်
#နမ့်ယွန်းပြည်သူ့စစ်
#ဒါယေလှ
#လင်းဇာနည်မောင်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)