မဲခေါင်၊ မေ ၂
စစ်ပွဲအဆုံးသတ်ရရန် အမေရိကန်၏ နောက်ဆုံး ပြင်ဆင်ချက်များအပေါ် အီရန်က ပြန်လည် တုံ့ပြန်ခဲ့သော်လည်း အီရန်တို့၏ ကမ်းလှမ်းမှုကို ကျေနပ်မှုမရှိကြောင်း အမေရိကန်သမ္မတ ဒေါ်နယ်ထရမ့်က ပြောကြားသည်။
အီရန်တို့၏ တုံ့ပြန်မှုကြောင့် သံတမန်ရေး လမ်းမဆုံးသေးကြောင်းကို ပြသနေပြီး အမေရိကန်က အီရန်ကို ရေတပ်ဖြင့် ဆက်လက်ပိတ်ဆို့ထားကာ ထပ်မံ တိုက်ခ်ိုက်ရန်စဉ်းစားနေချိန်တွင် ကမ်းလှမ်းမှု ထွက်ပေါ်လာခြင်းလည်း ဖြစ်သည်။
ကြားဝင်စေ့စပ်ပေးနေသည့် ပါကစ္စတန်နိုင်ငံမှတစ်ဆင့် ကြာသပတေးနေ့က အီရန်တုံ့ပြန်မှုကို အမေရိကန်သို့ ပေးအပ်ခဲ့ကြောင်း ဒေသဆိုင်ရာ အရာရှိကြီးတစ်ဦးက ပြောကြားသည်။
ကျနော်တို့ အီရန်နဲ့ အခုပဲ စကားပြောခဲ့ပါတယ်။ ဘာဖြစ်လာမလဲ ကြည့်တာပေါ့။ ဒါပေမယ့် ကျနော် မကျေနပ်ဘူး”ဟု ထရမ့်က ယမန့်နေ့တွင် သတင်းထောက်များအား ပြောသည်။
ဟောမုဇ်ရေလက်ကြားကို ပြန်ဖွင့်ကာ စစ်ပွဲကို အဆုံးသတ်လိုက်ပြီး နျူကလီးယား ဆွေးနွေးညှိနှိုင်းမှုူများကို နောက်အဆင့်တစ်ခုသို့ ရွှေ့ဆိုင်းထားရန် ပြီးခဲ့သည့် သီတင်းပတ်တွင် အီရန်က အမေရိကန်ကို အဆိုပြုခဲ့သည်။
တနင်္လာနေ့တွင် အမေရိကန် အထူးကိုယ်စားလှယ် စတိဗ်ဝစ်ကော့ဗ်က နျူကလီးယားကိစ္စကို မူကြမ်းသဘောတူညီချက်တွင် ပြန်လည် ထည့်သွင်းခဲ့ပြီး ပြင်ဆင်ချက် အများအပြား လုပ်ဆောင်ခဲ့ကြောင်း သတင်းရင်းမြစ်တစ်ဦးက ပြောသည်။
အီရန်က သဘောတူညီချက်တစ်ခုကို အသည်းအသန် အလိုရှိနေသော်လည်း နိုင်ငံကို မည်သူတို့က ဦးဆောင်နေသည်ဆိုခြင်းကို သေချာမသိကြကြောင်း ဒေါ်နယ်ထရမ့်က ပြောကြားသည်။
သို့သော် သဘောတူညီချက်ကို အသည်းအသန် လိုချင်နေသည်မှာ အီရန်ဘက်က မဟုတ်ဘဲ အမေရိကန်ဘက်က သာ ဖြစ်ကြောင်း အီရန်က တုံ့ပြန်သည်။
ရွေးချယ်စရာတွေ ရှိပါတယ်၊ သူတို့ကိုသွားပြီး ဗုံးကြဲ၊ ဖောက်ခွဲတိုက်ခိုက်ပြီး ထာဝရ နာလန်မထူနိုင်အောင် လုပ်မလား။ ဒါမှမဟုတ် သဘောတူညီချက်ရအောင် ကြိုးစားကြမလား ဆိုတာပါပဲ”ဟု စစ်ဦးစီးချုပ် ဗိုလ်ချုပ်ကြီးများက ၎င်းအား တင်ပြခဲ့သော စစ်ရေးအစီအစဉ်များနှင့် ပတ်သက်၍ မေးမြန်းချိန်တွင် သမ္မတထရမ့်က ပြန်ကြားခဲ့ပြီး ၎င်းအနေဖြင့် ထပ်ပြီး ဗုံးမကြဲလိုဟု ဆိုသည်။
အေးကျော်
Ref: Axios
#MeKongNews
#ငြိမ်းချမ်းရေး
#သဘောတူညီချက်မူကြမ်း
#အီရန်
#ထရမ့်
