မဲခေါင်၊ ဧပြီ ၂၈

ဧပြီလနောက်ဆုံးပတ်အတွင်း ဖြစ်ပေါ်နေသည့် အပူပိုင်းမိုးသက်လေပြင်းနှင့် မိုးသည်းထန်မှုများကြောင့် ရှမ်းပြည်ဒေသအချို့တွင် သဘာဝဘေးဒဏ်များ ခံစားခဲ့ရကြောင်း ဒေသခံများထံမှ သိရသည်။

ယနေ့ ဧပြီလ ၂၈ ရက်တွင် ဖြစ်ပေါ်ခဲ့သည့် လေပြင်းတိုက်ခတ်မှုကြောင့် ရှမ်းပြည်အရှေ့ပိုင်း၊ မိုင်းတုံမြို့နယ်၊ မိုင်းကန်ကျေးရွာအုပ်စုရှိ ကျကျီးလုံကျေးရွာတစ်ရွာလုံးနီးပါး အိမ်အမိုးများ လေနှင့်အတူ လွင့်ပါပျက်စီးခဲ့ကြောင်း ဒေသခံများထံမှ သိရသည်။

ထို့အတူ မိုင်းတုံမြို့နယ်၊ မိုင်းဟန်ကျေးရွာအုပ်စု၊ နားကောင်းမူးကျေးရွာရှိ သတိပဋ္ဌာန်ဘုန်းကြီးကျောင်းလမ်းတွင်လည်း သစ်ပင်လဲကျပြီး လမ်းပိတ်ဆို့မှုများ ဖြစ်ပွားခဲ့သည်။

ပြီးခဲ့သည့် ဧပြီလ ၂၇ ရက် ညပိုင်းက လေဒဏ်မိုးဒဏ် ခံခဲ့ရသည့် တာချီလိတ်မြို့တွင်လည်း ယနေ့ ဧပြီလ ၂၈ ရက်၊ ညနေ ၃ နာရီခွဲခန့်၌ မိုးသက်လေပြင်း ထပ်မံကျရောက်ခဲ့သည်။

ယင်းကြောင့် ကျိုင်းတုံ-တာချီလိတ် လမ်းမကြီးပေါ်ရှိ ဟွေခိုက် (၅၂၆) ကွေ့တွင် သစ်ပင်များလဲပြိုခြင်းနှင့် သစ်ကိုင်းများ ကျိုးကျခြင်းတို့ကြောင့် လမ်းခဏတာ ပိတ်ဆို့ခဲ့ကြောင်း ဒေသခံများထံမှ သိရသည်။

ရှမ်းပြည်တောင်ပိုင်း၊ အောင်ပန်းမြို့တွင်လည်း ယနေ့ ညနေ ၄ နာရီခန့်က လေပြင်းတိုက်ခတ်မှုကြောင့် ပြည်ထောင်စုလမ်းနှင့် မြနန္ဒာရေထွက်ဦးလမ်းဆုံရှိ သီရိမင်္ဂလာအောင်ချမ်းသာစေတီတော် ထီးတော်တင်လှူပွဲအတွက် ပြုလုပ်ထားသော အဝင်မုခ်ဦး ပြိုကျပျက်စီးသွားခဲ့သည်။

မိုးလေဝသနှင့် ဇလဗေဒညွှန်ကြားမှုဦးစီးဌာန၏ မေလ ၄ ရက်နေ့အထိ ခန့်မှန်းချက်တွင် မိုးတိမ်တောင်များကြောင့် မိုးရွာသွန်းချိန်၌ လေပြင်းတိုက်ခတ်ခြင်း၊ မိုးကြိုးပစ်ခြင်းနှင့် မိုးသီးကြွေခြင်းများ ဖြစ်ပေါ်တတ်သဖြင့် ပြည်သူများအနေဖြင့် လုံခြုံသော အဆောက်အအုံအတွင်း နေထိုင်ကြရန် သတိပေးနှိုးဆော်ထားသည်။

#MeKongNews
#ရှမ်းပြည်
#မိုးသက်လေပြင်း
#သဘာဝဘေး
#တာချီလိတ်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)