မဲခေါင်၊ ဧပြီ ၂၈

တရုတ်ဘက်မှ အဝယ်လိုက်၍ မိုင်းလားတွင် ရာဘာစျေး မြင့်တက်လာနေကြောင်း စျေးကွက်အတွင်းမှ သိရသည်။

သင်္ကြန်မတိုင်မီက အကောင်းဆုံး ရာဘာအကြမ်းတုံး တစ်ကီလိုလျင် ၆ ယွမ်ခန့်သာ ရှိရာမှ ယခု သင်္ကြန်အပြီး ဧပြီလကုန်ပိုင်းတွင် အကြမ်းတုံးတစ်ကီလိုလျှင် အနိမ့်ဆုံး ၆ ဒသမ ၇ ယွမ်နှင့်အထက် ရှိနေပြီး အရည်အသွေး ကောင်းလျှင်ကောင်းသလို စျေးရနေကြောင်း ရာဘာကုန်သည်တစ်ဦးက ပြောသည်။

“တရုတ်ဘက်က အခု ဧပြီလဆန်းပိုင်းမှာ အဆွဲများလာတာ။ ရေများတာ အမှိုက်မသန့်တာတွေတောင် စျေးရလာတယ်၊ ရသမျှ ယူနေတယ်။ ဒါပေမယ့် စျေးက တစ်နာရီတစ်ကြိမ်လောက် ပြောင်းနေလို့ ရောင်းခါနီး သေချာ စျေးသိပြီး အရောင်းအဝယ် လုပ်ဖို့လိုတယ်”ဟု ၎င်းက မဲခေါင်ကို ပြောသည်။

ရာဘာမှာ အပင်သစ်မှထွက်သည့် အစေးမှာ ရေများပြီး အပင်ဟောင်းမှ ထွက်လျှင် ရေနည်းပြီး ကောင်းမွန်ကြောင်းနှင့် ရာဘာခွက်နှင့် အခြောက်ခံရာ၌ သဲ၊ သစ်ရွက်အမှိုက် စသည်များ နည်းပါးပါက စျေးကွက်လှကြောင်း ၎င်းက ပြောသည်။

ရာဘာအပင်မှအစေးကို နေမထွက်မီ မနက်အစော ၂ နာရီခန့်မှ စတင်ခြစ်ယူရပြီး ရလာသည့် အစေးကို ပုံစံခွက်များ၌ အခြောက်ခံပြီးမှ စျေးကွက်သို့ တင်ပို့ရသည်ဟု ဆိုသည်။

ရှမ်းပြည်အရှေ့ပိုင်းတွင် တစ်ဧကလျှင် အပင် ၂၀၀ နှန်း စိုက်ပျိုးထားပြီး အစေးကို တစ်ရက်မှ ၂ ရက် ၃ ရက်ခြား တစ်ခါခြစ်၊ တစ်ခါနားစနစ်ဖြင့် အစေးထုတ်ယူကြကြောင်း သိရသည်။

ကျွမ်းကျင်သည့် အစေးခြစ်လုပ်သားများ အနေဖြင့် ရှယ်ယာဖြင့်လည်းကောင်း၊ ထက်ဝက်စားဖြင့် လည်းကောင်း၊ အပင်စားဟုခေါ်သည့် ခြစ်နိုင်သည့် အပင်ရေအပေါ် မူတည် လုပ်ဆောင်ကြကြောင်း သိရသည်။

ကျိုင်းတုံဘက်တွင်မူ တစ်ကီလို ၅ ယွမ်ကျော် ရှိနေသော်လည်း လမ်းကြေးအခွန်အခနှင့် သယ် ယူပို့ဆောင်ရေးစရိတ်များကြောင့် တစ်ကီလို ၇ ယွမ်နှင့်အထက် ရမှသာ တွက်ချေကိုက်မည် ဖြစ်ကြောင်း ကျိုင်းတုံ ရာဘာကုန်သည်တစ်ဦးက ပြောသည်။

#MeKongNews
#တရုတ်
#အဝယ်လိုက်
#မိုင်းလား
#ရာဘာစျေး
#မြင့်တက်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)