မဲခေါင် ၊ မတ် ၂၇
ရှမ်းပြည်တွင် ဓာတ်ဆီ၊ ဒီဇယ်များ တစ်လီတာလျှင် တသောင်းခွဲကျပ် ပျှမ်းမျှဈေးဖြင့် ဝယ်သုံးနေရသည်ဟု ပြည်သူများက ပြောသည်။
စစ်ကောင်စီ၏ ရည်ညွှန်းဈေးနှုန်းမှာ ပျှမ်းမျှ ၆ ထောက်ကျပ်ဝန်းကျင် ဖြစ်သော်လည်း ပြည်သူများအမှန်တကယ် ဝယ်သုံးနေရသည့် ဈေးနှုန်းများမှာ ပျှမ်းမျှတစ်သောင်းခွဲကျပ်အထိ ရှိလာသည်။
ကျေးသီး၊ မိုင်းရှူး၊ လားရှိုး၊ မိုင်းကိုင်၊ မိုင်းနောင်၊ လဲချား စသည့်မြို့နယ်များတွင် ဓာတ်ဆီတစ်လီတာကျပ်အထိ ပေးဝယ်နေရပြီဖြစ်သည်။
“မနေ့က ၁၂၀၀၀ ကျပ်ပေးရတယ်။ ဒီမနက်ကျတော့ ချက်ချင်းကြီး ၁၅၀၀၀ ဖြစ်သွားတယ်”ဟု မိုင်းကိုင် ဒေသခံတစ်ဦးက ပြောသည်။
ထို့ပြင် လားရှိုးမြို့တွင် ဓာတ်ဆီ၊ ဒီဇယ် ဝယ်ယူခွင့်ရရန် ပြည်သူများသည် ညကတည်းကပင် ဆီဆိုင်ရှေ့တွင် ကြိုတင် တန်းစီနေရသည်။
“ဆိုင်ကယ်စီးတဲ့ ဝန်ထမ်းတွေက တစ်ပတ်ကို ၃ လီတာ တန်းဆီစရာမလိုပဲ ဝယ်ခွင့်ပေးထားတယ်။ ဌာနဆိုင်ရာ အကြီးအကဲတွေ စစ်တပ်ကလူတွေကတော့ လိုသလောက် ရောင်းပေးရတယ်။ ပြည်သူကတော့ တန်းစီပြီး ဝယ်ရတယ်၊ တန်းမစီနိုင်ရင် အပြင်မှောင်ခိုဝယ်သုံးရတယ်”ဟု လားရှိုးမြို့ခံတစ်ဦးက ပြောသည်။
ထို့ပြင် တရုတ်ဘက်က ဆီတင်သွင်းခွင့် ပြန်မဖွင့်သေးသဖြင့် ရှမ်းပြည်မြောက်ပိုင်းရှိ နမ့်ခမ်းမြို့နယ်ဘက်တွင်မူ တလီတာလျှင် ၂ သောင်းခွဲကျပ်အထိ ဝယ်သုံးနေရသည်။
“နမ့်ခမ်းမှာက ဆီကားတွေ တရုတ်ကနေ ထပ်မဝင်လာသေးလိ ထင်တယ်။ ဆီပန့်ဆိုင်တွေ အကုန်ပိတ်ထားတယ်။ အပြင်မှာပဲ ဝယ်သုံးရတာ တစ်လီတာဗူး ၂၅၀၀၀ ပေးရတယ်”ဟု ဒေသခံတစ်ဦးက ပြောသည်။
ထို့ပြင် ကိုးကန့်တပ်ဖွဲ့က ထိန်းချုပ်ထားသည့် ကွတ်ခိုင်၊ သိန္နီမြို့များတွင်လည်း ဆီတစ်လီတာ ၁၆၀၀၀ ကျပ်အထိ ပေးဝယ်ရသည်။
“အခုက မြို့နယ်တိုင်းလိုလိုမှာ ပျမ်းမျှ တစ်သောင်းခွဲပေးဝယ်ပြီး သုံးနေရတာပေါ့ဗျာ။ ပန့်ဆိုင်မှာက လူတိုင်းဝယ်လို့ မရဘူးလေ။ ထမင်းက နေ့တိုင်းစားဖို့လိုတော့ အလုပ်က နေ့တိုင်းလုပ်ရတယ်မလား၊ ဆီလည်း နေ့တိုင်းသွားလာဖို့ သုံးရတယ်လေဗျာ”ဟု သိန္နီဒေသခံတစ်ဦးက ပြောသည်။
ကွတ်ခိုင်မြို့တွင်မူ ဆီပန့်ဆိုင်များတွင် တစ်လီတာကို တစ်သောင်းခွဲကျပ်ဖြင့် ရောင်းချပေးလျက်ရှိပြီး လမ်းဘေးဆိုင်များတွင်မူ တစ်လီတာခွဲတစ်ဗူး ၂ သောင်းခွဲကျပ်ဖြင့် ရောင်းချနေကြသည်ဟု သတင်းရင်းမြစ်တစ်ဦးက ပြောသည်။
ရှမ်းပြည်မြို့တော် တောင်ကြီးမြို့တွင်မူ ဆီပန့်ဆိုင်များတွင် ဓာတ်ဆီ၊ ဒီဇယ်တစ်လီတာ ကျပ် ၆ ထောင်ဝန်းကျင် ရည်ညွှန်းဈေးဖြင့် ရောင်းချသော်လည်း လူတိုင်း၊ ယာဉ်တိုင်း ဝယ်ယူခွင့်ရရန် ခက်ခဲသဖြင့် မှောင်ခိုဈေးကွက်တွင် ကျပ်တစ်သောင်းကျော်အထိ ဝယ်သုံးနေရသည်။
“ပန့်ဆိုင်မှာ တန်းစီနိုင်ရင်တော့ ရည်ညွှန်းဈေးနဲ့ ရနိုင်ပါတယ်။ ဒါပေမယ့် ဆီသွားတန်းရင်လည်း အလုပ်ကို ပစ်ထားရပြန်ရော၊ ကျူအာကုဒ်နဲ့ပဲ ရောင်းတော့မယ်လို့လည်း စာတွေ ကပ်ထားကြတယ်။ ရှမ်းပြည်မှာ သုံးတဲ့ ကား၊ ဆိုင်ကယ် အများစုက လိုင်စင်မဲ့တွေ များပါတယ်။ ဒါကြောင့် မှောင်ခိုဈေးကွက်တွေပဲ ကြီးထွားဦးမှာပါ”ဟု တောင်ကြီးမြို့ခံတစ်ဦးက ပြောသည်။
လောင်စာဆီများ စက်သုံးဆီများ အဆမတန် ဈေးနှုန်း မြင့်တက်လာခြင်းကြောင့် တောင်သူလယ် သမားလူတန်းစား အများဆုံးဖြစ်သည့် ရှမ်းပြည်တွင် လယ်ယာထွက်ကုန်များ ကူးသန်း ရောင်းဝယ်ရေး ကဏ္ဍကိုပါ ထိခိုက်လာပြီး အထွေထွေ လူမှုစီးပွား ပိုမို ကျပ်တည်းလာနေသည်။
#MeKongNews
#ရှမ်းပြည်
#စက်သုံးဆီ
#တစ်လီတာ
#ပျမ်းမျှဈေး
