မဲခေါင်၊ မတ် ၇

အောင်ပန်း-လွိုင်ကော် ရထားလမ်း၊ အောင်ပန်းဘူတာအနီးရှိ သံလမ်းဘေး မြေနေရာများကို ရထားလက်မှတ်စစ်ဖြစ်သူ ဦးညီညီထွန်းဆိုသူက ကိုယ်ကျိုးအတွက် အသုံးပြုနေကြောင်း ဒေသခံများထံမှ သိရသည်။

ယင်းလက်မှတ်စစ်သည် အောင်ပန်းမြို့၊ ညောင်ပင်သာရပ်ကွက်၊ နယ်မြေ (၅) ဘက်အထွက်ရှိ ရထားလမ်းဘေး မြေနေရာတွင် ၎င်းပိုင် အဆောက်အအုံကို လမ်းပိတ်ဆောက်လုပ်နေခြင်းဖြစ်ပြီး အခြားပြည်သူများ၏ နေအိမ်များကိုမူ ပေ ၅၀ အထိ နောက်ဆုတ်ကာ ဖျက်ခိုင်းကြောင်း ဒေသခံများက ပြောသည်။

“အများပြည်သူကိုတော့ လမ်းဘေး ပေ ၅၀ အထိ နောက်ဆုတ်ခိုင်းပြီး အိမ်တွေဖျက်ခိုင်းခဲ့တာ။ အခု လက်မှတ်စစ်က အဲဒီဖျက်လိုက်ရတဲ့ လမ်းဘေးက အများပြည်သူသွားလမ်းမှာ လမ်းပိတ်ပြီး အိမ်ဆောက်နေတာ။ အထက်က တိုင်းအင်ဂျင်နီယာတွေကလည်း ခွင့်ပြုတယ်လို့ ကြားတယ်။ ရထားမြေပေါ်မှာ ကိုယ်ကျိုးရှာ ဆောက်နေတာဖြစ်သလို အများပြည်သူသွားလမ်းကိုလည်း ပိတ်ထားတာ။ ကန့်ကွက်လည်း ဂရုမစိုက်ဘူး” ဟု ဒေသခံတစ်ဦးက မဲခေါင်သို့ ပြောသည်။

ထို့ပြင် မီးရထားဝန်ထမ်းအိမ်ရာကိုလည်း အောက်ပြည်သာယာဈေး ဆက်စပ်လမ်းအထိ တိုးချဲ့တည်ဆောက်နေခြင်းမှာ ရထားမြေပေါ် ကျော်လွန်လုပ်ဆောင်နေခြင်း ဖြစ်သည်ဟု ဒေသခံများက ပြောသည်။

“မီးရထားမြေကို ပွင့်လင်းမြင်သာမှုမရှိဘဲ ငှားသုံးနေတာ။ မြေငှားခ သွင်းပြီး လုပ်ပိုင်ခွင့်ချပေးရာမှာလည်း တစ်ဦးတည်းကိုပဲ ပေးထားတာ။ တိုင်းအရာရှိတွေက ဦးညီညီထွန်း တောင်းတဲ့ မြေနေရာတွေကိုပဲ လုပ်ပိုင်ခွင့်ပေးပြီး အခြားသူတွေကိုကျတော့ မပေးဘူး။ ဒါဟာ လက်သိပ်ထိုး လုပ်ရပ်ပဲ” ဟု ဒေသခံတစ်ဦးက ပြောသည်။

ယင်းလုပ်ဆောင်ချက်များကို ရထားပို့ဆောင်ရေးဌာန၊ မြို့ပြအင်ဂျင်နီယာဌာနနှင့် စက်မှုအင်ဂျင်နီယာဌာနမှ တိုင်းအရာရှိ ၃ ဦးက လုပ်ဆောင်ခိုင်းခြင်းဖြစ်ကြောင်း သိရသည်။

လက်ရှိတွင် အောင်ပန်း-လွိုင်ကော် မီးရထားလမ်းမှာ ရထားပြေးဆွဲခြင်း မရှိတော့သဖြင့် ယခုကဲ့သို့ ဌာနဆိုင်ရာမှ လူအချို့က ကိုယ်ကျိုးအတွက် လုပ်ဆောင်နေခြင်းဖြစ်သည်ဟု ဒေသခံများက စွပ်စွဲကန့်ကွက်နေကြခြင်း ဖြစ်သည်။

#MeKongNews
#အောင်ပန်း
#ရထားလမ်း
#လက်မှတ်စစ်
#ကိုယ်ကျိုးသုံးစွဲ
#အောင်ပန်းဘူတာ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)