မဲခေါင် ၊ ဖေဖော်ဝါရီ ၂၄
TNLA နှင့် MNDAA တပ်ဖွဲ့များအနေဖြင့် နှစ်ဘက်တပ်ဖွဲ့များအကြား ဖြစ်ပွားနေသည့် တင်းမာမှုအတွင်း လူထုအပေါ် ဦးတည်တိုက်ခိုက်မှု မပြုလုပ်ရန် တအာင်းအရပ်ဖက်အဖွဲ့အစည်းများက ယနေ့တွင် စုပေါင်းတောင်းဆိုလိုက်သည်။
၁ဝ၂၇စစ်ဆင်ရေးနောက်ပိုင်း TNLA ထိန်းချုပ်သည့် ရှမ်းမြောက် ကွတ်ခိုင်မြို့တွင် TNLA နှင့် MNDAA တို့အကြား ၂ဝ၂၆ ခုနှစ်၊ ဖေဖော်ဝါရီလ ၁၃ ရက်နေ့မှ စပြီး မြေပြင်တွင် တင်းမာမှုဖြစ်ပွားခဲ့သည်မှာ တစ်ပတ်ကျော် ကြာခဲ့ပြီဖြစ်ပြီး တင်းမာမှုအတွင်း ဒေသခံလူထုများပါ ရိုက်နှက်ခံရမှုများ ရှိနေသည်။
နှစ်ဖက်တပ်ဖွဲ့ကား ဖြစ်ပေါ်နေသည့် တင်းမာမှုအတွင်း အပြန်အလှန်ရိုက်နှက်မှုကြောင့် နှစ်ဖက်တပ်ဖွဲ့ဝင်များ ထိခိုက်ဒဏ်ရာရခြင်း၊ တပ်ဖွဲ့ဝင်ချင်း ဖမ်းဆီးထိန်းသိမ်းခြင်းများစသည့် ရန်လိုမှုအပြုအမူများ ဖြစ်ပွားနေသည်ကို သိရှိရသည်မှာ များစွာ စိတ်မကောင်းဖြစ်ရသည်ဟု တအာင်းအရပ်ဖက်အဖွဲ့အစည်း ထုတ်ပြန်ချက်တွင်ဖော်ပြထားသည်။
“နှစ်ဖက်တပ်ဖွဲ့ကြား အငြင်းပွားမှုနောက်ဆက်တွဲအနေဖြင့် တင်းမာမှုအကြား မြေပြင်ရှိ ပြည်သူလူထုများသည် ကြားညှပ်ပြီး ဓားစာခံအဖြစ် ခါးစည်းခံရလျက်ရှိသည်” ဟု တအာင်းရပ်ဖက်အဖွဲ့အစည်းများကပြောသည်။
နှစ်ဖက်တပ်ဖွဲ့တင်းမာမှု၏ နောက်ဆက်တွဲပြဿနာကြောင့် လူထုအား ပစ်မှတ်ထား ရိုက်နှက်ခြင်း၊ ဖမ်းဆီး ခြင်း၊ ဖြတ်သန်းသွားလာခွင့် ကန့်သတ်ခြင်း၊ ကုန်စည်စီးဆင်းမှု ပိတ်ဆို့တားဆီးခြင်း စသည့် လူထုအား ပစ်မှတ်ထားသည့်လုပ်ရပ်များအပြင် အွန်လိုင်းစာမျက်နှာများတွင်လည်း အမုန်းစကားဖြန့်ဝေခြင်း၊ မဟုတ်မမှန် ဓာတ်ပုံ/ဗီဒီယိုများ အသုံးချကာ သွေးခွဲခြင်းစသည့် လူမျိုးရေးပဋိပက္ခ အသွင်ဆောင်သည့် ပြဿနာဖန်တီးနေသည့် အပြုအမူများ ဖြစ်ပွားလျက်ရှိသည်ကို တွေ့မြင်နေရကြောင်း ထုတ်ပြန်ချက်တွင်ဖော်ပြသည်။
TNLA နှင့် MNDAA တပ်ဖွဲ့တို့သည် စစ်အာဏာရှင်စနစ်ပြုတ်ကျရေး၊ တိုင်းရင်းသားလူမျိုးများ အဖိနှိပ်ခံ ဘဝမှ လွတ်မြောက်ရေးနှင့် သက်ဆိုင်ရာနယ်မြေအသီးသီးရှိ ပြည်သူလူထုများအား ကာကွယ်ရေး စသည့် ရည်မှန်းချက်များဖြင့် တော်လှန်တိုက်ပွဲဝင်ခဲ့ကြသည့်အလျောက် မဟာမိတ်တပ်ဖွဲ့ချင်း ဖြစ်ပွားနေသည့် ပြဿနာများကို ပြည်သူလူထုအပေါ်ပုံချကာ ရန်လိုခြင်း၊ ဖမ်းဆီးရိုက်နှက်ခြင်း၊ သွားလာခွင့်ပိတ်ပင်ခြင်း၊ ကုန်စည်သယ်ဆောင်ခွင့်တားဆီးခြင်းနှင့် လုထုအား အကြမ်းဖက် ခြင်းများ မပြုလုပ်ရန် တောင်းဆိုအပ်ပါသည်ဟု ထုတ်ပြန်ချက်တွင် ဖော်ပြထားသည်။
ပြီးခဲ့သည့် ဖေဖော်ဝါရီ ၁၃ ရက်နေ့တွင် ကွတ်ခိုင်မြို့ ပေါ်အတွင်း MNDAA နှင့် TNLA နှစ်ဖက်အကြား အပြန်အလှန် ဖမ်းဆီး၊ ထိုးကြိတ်မှုများ စတင်ဖြစ်ပွားခဲ့ရာမှ ယနေ့အချိန်ထိ နှစ်ဖက်တပ်အကြား တင်းမာမှု ဖြစ်ပွားနေလျက်ရှိသည်။
ထို့ကြောင့် နှစ်ဖက်တပ်ဖွဲ့အကြား ဖြစ်ပွားနေသည့် အငြင်းပွားမှုများကို ဆွေးနွေးညှိနှိုင်းမှု လမ်းစဉ်ဖြင့် မဟာမိတ်ချင်း အမြန်ဆုံးပြေလည်မှုရရှိနိုင်ရေး ဖြေရှင်းကြပါရန် တအာင်းအရပ်ဖက် အဖွဲ့အစည်းမျာက တိုက်တွန်းထားသည်။
ယခုတောင်းဆိုချက်ကို တအာင်းအရပ်ဖက်အဖွဲ့အစည်းများဖြစ်သည့် တအာင်းကျောင်းသားနှင့် လူငယ်များအဖွဲ့ – TSYU ၊ တအာင်းအမျိုးသမီးအဖွဲ့အစည်း – TWO ၊ တအာင်းဥပဒေအထောက်အကူပြု ဖောင်ဒေးရှင်း – TLAF၊ တအာင်းကျန်းမာရေးအဖွဲ့အစည်း – THO၊ တအာင်းသဘာဝပတ်ဝန်းကျင် စောင့်ကြည့်ရေတးအဖွဲ့ – TEWG၊ တအာင်းပညာရေးအင်စတီကျူ – TEIတို့က စုပေါင်းထုတ်ပြန်ခြင်းဖြစ်သည်။
#MeKongNews
#TNLA
#MNDAA
#တအာင်းအရပ်ဖက်အဖွဲ့အစည်း
#မဟာမိတ်
