မဲခေါင်၊ ဖေဖော်ဝါရီ ၂၂
ရှမ်းပြည်တောင်ပိုင်း၊ အင်းလေးဒေသအတွင်း စစ်အုပ်စုကို တော်လှန်လှုပ်ရှားနေသည့် မဟာမိတ်အင်အားစုများ စုပေါင်း၍ အင်းလေးဒေသ လွတ်မြောက်ရေးအဖွဲ့ – Inle Region Liberation Organization (IRLO) ကို ယနေ့ ဖေဖော်ဝါရီ ၂၂ရက် တွင် အဆင့်မြင့်တင်၍ တရားဝင် ဖွဲ့စည်းလိုက်ကြောင်း ထုတ်ပြန်ချက်အရ သိရသည်။
ယင်းဖွဲ့စည်းလိုက်သည့် IRLO အဖွဲ့တွင် အင်းလေး ပြည်သူ့ကာကွယ်ရေးတပ်ဖွဲ့ – IPDF၊ အင်းလေးအမျိုး သမီးသမဂ္ဂ – IWU၊ အင်းလေး ဖယ်ဒရယ်ဒီမိုကရေစီလှုပ်ရှားမှု – IFDM၊ ညောင်ရွှေမြို့နယ် ပညာရေးဘုတ်အဖွဲ့ – Boe Nyaung Shwe နှင့် အင်းလေးဆေးအဖွဲ့ – Inle Medical Team အပါအဝင် အင်းလေးလူထုလှုပ်ရှားမှုအဖွဲ့ – Inle Peoples Movement ၏ မဟာမိတ်အင်အားစု အားလုံးစုပေါင်း ပါဝင်ကြောင်း သိရသည်။
ယင်းသို့ အမည် ပြောင်းလဲ ဖွဲ့စည်းပြီးနောက် ရှေ့လုပ်ငန်းစဥ်များ အဖြစ် ကိုယ်တိုင်ဖန်တီး စီမံနိုင်သော ဒေသန္တရအုပ်ချုပ်ရေး – Local Self-Governance ကို အကောင်အထည်ဖော် တည်ဆောက်သွားရန်၊ အင်းလေးဒေသနှင့် ထိုက်တန်သော တန်းတူညီမျှမှု၊ ငြိမ်းချမ်းစွာ အတူယှဉ်တွဲနေထိုင်မှုနှင့် လူ့အခွင့်အရေး ပြည့်ဝမှုကို အခြေခံ၍ တည်ဆောက်သွားရန်၊ ပျက်စီးယိုယွင်းနေသော အင်းလေးကန်ကြီးကို ပြန်လည် ကုစားရန်နှင့် သဘာဝပတ်ဝန်းကျင် ရေရှည် တည်တံ့စေရန် အစွမ်းကုန် ကြိုးပမ်းဆောင် ရွက်သွားရေးတို့ကို ချမှတ်ထားကြောင်း ဖော်ပြထားသည်။
ထို့ပြင် အကြမ်းဖက် စစ်အာဏာရှင်စနစ်ကို ဖယ်ရှားကာ စစ်မှန်သည့် ဖယ်ဒရယ်ဒီမိုကရေစီ ပြည်ထောင်စု တည်ဆောက်ရေးကို ဆက်လက် တိုက်ပွဲဝင်သွားမည်ဟု IRLO က အသိပေးထားသည်။
အင်းသား၊ တောင်ရိုး၊ ရှမ်း၊ ပအိုဝ်း စသည့် တိုင်းရင်းသားအားလုံး တန်းတူညီမျှ ပါဝင်နိုင်သော ဒေသန္တရ အုပ်ချုပ်ရေးစနစ်ကို အကောင်အထည် ဖော်သွားမည်ဟုလည်း IRLO က ဆိုသည်။
ထို့နောက် အင်းလေးဒေသ ကိုယ်ပိုင်ပြဌာန်းခွင့်နှင့် လွတ်မြောက်ရေးအတွက် အဖွဲ့နှင့်အတူ ပူးပေါင်း ပါဝင်ကြရန် ပြည်သူလူထုနှင့် နိုင်ငံတကာရောက် အင်းလေးနွယ်ဖွားများ အားလုံးကို IRLO က တိုက်တွန်းလိုက်သည်။
#MeKongNews
#အင်းလေး
#မဟာမိတ်အင်အားစု
#စုပေါင်း
#IRLO
