မဲခေါင်၊ ဖေဖော်ဝါရီ ၁၇

ကရင်နီပြည်၊ ဖားဆောင်းမြို့တွင် တိုက်ပွဲအပြင်းအထန် ဖြစ်ပွားပြီးနောက် ယနေ့နံနက်ပိုင်းတွင် သံလွင်မြစ်ကူးတံတား တိုက်ခိုက်ဖျက်ဆီးခံရပြီး ကျိုးပျက်သွားကြောင်း ဒေသခံ သတင်းရင်းမြစ်များထံမှ သိရသည်။

ယနေ့နံနက်တွင် ကျယ်လောင်သည့် ပေါက်ကွဲသံကြားရပြီးနောက် တံတားကျိုးကျသွားသည်ကို သိရခြင်းဖြစ်သည်ဟုလည်း သတင်းရင်းမြစ်တစ်ဦးကပြော သည်။

“ပေါက်ကွဲသံ အကျယ်ကြီး ကြားရပြီးတော့ တံတားကျိုးကျသွားတယ် ဆိုတာကို သိရတာ။ ဘယ်သူက လုပ်တာလည်းတော့ မသိရသေးဘူး။ စစ်ရေးအခြေအနေအရ တံတားပေါ် သွားလာခွင့်လည်း ပိတ်ထားတယ်လေ၊ ဖားဆောင်းမြို့ထဲလည်း စစ်ကောင်စီတွေက ရှိတယ်”ဟု ကရင်နီ ဒေသခံတစ်ဦးက ပြောသည်။

ယင်းတံတား ကျိုးပျက်မှုနှင့်ပတ်သက်ပြီး လက်ရှိအချိန်ထိ မည်သည့် အဖွဲ့အစည်းကမှ တရားဝင် ထုတ်ပြန်ခြင်း မရှိသေးပေ။

သို့ရာတွင် ယခင်ရက်များတွင်လည်း စစ်ကောင်စီတပ်က ဖားဆောင်းတံတားကို အသေခံဒရုန်းဖြင့် တိုက်ခိုက်ခြင်း လက်နက်ကြီးများဖြင့် ပစ်ခတ်ခြင်းများ ပြုလုပ်သဖြင့် လက်နက်ကြီးကြောင့် ပြိုကျခြင်းလည်း ဖြစ်နိုင်သည်ဟုလည်း ကရင်နီမြေပြင် သတင်းရင်းမြစ်တစ်ဦးက သုံးသပ်သည်။

“ပေါက်ကွဲတဲ့နေရာရဲ့ ပတ်ဝန်းကျင်ပုံစံကြည့်ရတာ ပတ်ပတ်လည်တဝိုက် တော်တော်ကျယ်ကျယ် သစ်ပင်တွေပါ ကျိုးကျသေဆုံး ခြောက်သွေ့ကုန်တာ တွေ့ရတယ်ပေါ့နော်။ ဒီပုံစံဖြစ်လောက်တဲ့အထိ တော်လှန်ရေးတပ်ဖွဲ့တွေဆီမှာ ပေါက်ကွဲအားပြင်းတဲ့ဗုံး မရှိဘူး” ဟု ၎င်းက ဆို သည်။

ဖားဆောင်း သံလွင်တံတားသည် ဖားဆောင်း – မယ်စဲ့ရှိ ဒေသခံများ အဓိက သွားလာအသုံးပြုသည့် တံတားတစ်စင်းဖြစ်ပြီး ၂၀၁၅ ခုနှစ်တွင် စတင်ဖွင့်လှစ်ခဲ့သည်။

စစ်ကောင်စီတပ်က ယမန်နှစ် စက်တင်ဘာလမှ စတင်ကာ ဘောလခဲ – ထူးချောင်း – ဖားဆောင်း ဆက်သွယ်ရေးလမ်းကြောင်းကို အဓိက အသုံးပြုပြီး ထိုးစစ်ဆင်နေကာ လက်ရှိတွင် ဖားဆောင်းမြို့ထဲ ပြန်လည်ဝင်ရောက်နိုင်ခဲ့သည်။

ဖားဆောင်းမြို့ အပြင်ဘက်ကိုမူ တော်လှန်ရေးတပ်များက ဝိုင်းရံ ပိတ်ဆို့ထားဆဲဖြစ်ပြီး တိုက်ပွဲများပြင်းထန်နေသည်။

#MeKongNews
#ကရင်နီ
#ဖားဆောင်း
#သံလွင်တံတား
#တိုက်ခိုက်
#ဖျက်ဆီး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)