မဲခေါင်၊ ဖေဖော်ဝါရီ ၆
ရှမ်းပြည်တောင်ပိုင်း၊ မောက်မယ်မြို့နယ်၊ ကဒူကြီးနယ်မြေရှိ ပအိုဝ်းအမျိုးသား လွတ်မြောက်ရေးတပ်မတော် – PNLA အခြေစိုက် ဗန်းမတ်ကို စစ်ကောင်စီလက်အောက်ခံ PNA က ထိုးစစ်ဆင် တိုက်ခိုက်နေခြင်းသည် ငြိမ်းချမ်းရေးကို ပိုမိုဝေးကွာစေသည့် လုပ်ရပ်ဖြစ်ကြောင်း PNLA က မဲခေါင်သတင်းဌာနသို့ ပြောသည်။
လက်ရှိ ကဒူကြီးနယ်မြေ၊ ဗန်းမတ်ကို PNA က ဆုတ်လိုက်တက်လိုက်ဖြင့် လက်နက်ကြီး အကူအညီယူကာ ထိုးစစ်ဆင်နေမှုအပေါ် PNLA ပြောရေးဆိုခွင့်ရှိသူ ခွန်ရိန်းယံက မှတ်ချက်ပြုခြင်း ဖြစ်သည်။
“နေ့တိုင်း တိုက်ပွဲဖြစ်နေတာ၊ မဖြစ်တဲ့နေ့မရှိဘူး။ PNLA က NCA ထိုးပြီး ဆက်သွယ်ရ လွယ်အောင် ထိုင်းနယ်စပ်ကနေ ဗန်းမတ်ကို ရွှေ့လာတာ။ အခု စစ်ကြောင်းတွေနဲ့ ထိုးစစ်ဆင်နေတာက ငြိမ်းချမ်းရေး အလှမ်းဝေးစေတဲ့ အပြင် အနာဂတ် ဆက်ဆံရေးကိုပါ ထိခိုက်စေတယ်။ တော်လှန်ရေးဆိုတာ နှလုံးသားထဲက လာတာဖြစ်လို့ ဗန်း မတ်ကို တိုက်နေပေမဲ့ မရနိုင်ဘူး” ဟု ၎င်းက ဆိုသည်။
PNA ဘက်မှ နောင်ထောင်၊ ဗန်းမောက်၊ ဟန်းဗွကျေးရွာများကို လက်နက်ကြီး၊ ဒရုန်းများဖြင့် နေ့စဉ် ထိုးစစ်ဆင် တိုက်ခိုက်နေမှုကြောင့် ရွာခံများလည်း ဘေးလွတ်ရာသို့ ထွက်ပြေး ပုန်းအောင်းနေကြရသည်ဟု ဆိုသည်။
ပြီးခဲ့သည့် ဖေဖော်ဝါရီ ၁ ရက်က အင်အားရာချီဖြင့် စစ်ကြောင်းထိုးလာသည့် PNA စစ်ကြောင်းမှာ PNLA ၏ စောင့်ကြို တိုက်ခိုက်မှုကြောင့် အထိနာကာ သေဆုံး အလောင်းများကိုပင် မကောက်နိုင်ဘဲ ဆုတ်ခွာခဲ့ရကြောင်း၊ ထို့နောက်ပိုင်းတွင် အဝေးမှလက်နက်ကြီး၊ ဒရုန်းများဖြင့်သာ တိုက်ခိုက်နေခြင်းဖြစ်ကြောင်း သိရှိရသည်။
ပြီးခဲ့သည့် ဇန်နဝါရီ ၁ ရက်မှစ၍ စစ်ကောင်စီတပ်နှင့် ပအိုဝ်းပြည်သူ့စစ် – PNO တို့က မောက်မယ်မြို့နယ်၊ ဟိုနမ့် ကျေးရွာအုပ်စုမှ PNLA လှုပ်ရှားရာသို့ ထိုးစစ်ဆင်လာခြင်းကြောင့် တိုက်ပွဲများ ဖြစ်ပွားနေကြောင်း သိရသည်။
#MeKongnews
#ဗန်းမတ်
#PNA
#တိုက်ခိုက်
#ငြိမ်းချမ်းရေး
#PNLA
