မဲခေါင်၊ ဖေဖော်ဝါရီ ၁
ရှမ်းပြည်မြောက်ပိုင်း၊ သီပေါမြို့နယ်အတွင်း စစ်ကောင်စီတပ်နှင့် လက်နက်ကိုင်တပ်ဖွဲ့တစ်ခုက ဒေသခံပြည်သူများ အပေါ် လူ့အခွင့်အရေး ချိုးဖောက်မှုများကို ပြင်းထန်စွာ ကန့်ကွက်ရှုတ်ချကြောင်း ရှမ်းကျောင်းသားသမဂ္ဂက ယနေ့တွင် ထုတ်ပြန်သည်။
ယင်းထုတ်ပြန်ချက်တွင် လက်နက်ကိုင်တပ်ဖွဲ့တစ်ခုမှာ MNDAA ဟု ရည်ညွှန်းထားပြီး ယင်းအဖွဲ့များသည် ပြည်သူများကို နှိပ်စက်သတ်ဖြတ်ခြင်း၊ ဖမ်းဆီးရိုက်နှက်ခြင်းနှင့် ပစ္စည်းလုယူခြင်းများ ကျူးလွန်ခဲ့သည်ဟု ဖော်ပြထားသည်။
ယခုနစ် ဇန်နဝါရီလ ဒုတိယပတ်အတွင်း ရှမ်းပြည်မြောက်ပိုင်း၊ သီပေါမြို့နယ် မန်ပန်း ကျေးရွာအုပ်စု အတွင်းသို့ ရောက်ရှိနေသော စစ်ကောင်စီတပ်သားများက ကျေးရွာတစ်ခုတွင် ဒေသခံပြည်သူများ နေအိမ်အတွင်းသို့ အဓမ္မ ဝင်ရောက်ကာ အိမ်မွေးတိရစ္ဆာန်များကို သတ်ဖြတ် စားသောက်ခြင်း၊ ဆိုင်များအတွင်းများမှ ပစ္စည်းများအား လုယူခြင်း၊ ယာဥ်များ လုယူစီးနင်းခြင်း၊ ရွှေ အပါအဝင် တန်ဖိုးကြီးပစ္စည်းများကို အဓမ္မ ယူဆောင်ခြင်းများ ပြုလုပ်ခဲ့ကြောင်း ထုတ်ပြန်ချက်တွင် ပါရှိသည်။
ထို့ပြင် ပိန်းညောင်ကျေးရွာမှ အမျိုးသားတစ်ဦးအား ဖမ်းဆီးရိုက်နှက်ခြင်းနှင့် အမျိုးသား တစ်ဦးနှင့် အမျိုးသမီး တစ်ဦးအား ဖမ်းဆီးကာ ကားသိမ်းယူခြင်းများ ပြုလုပ်ခဲ့ပြီး လက်ရှိအချိန်အထိ စစ်ကောင်စီတပ်ဖွဲ့သည် ယင်းကျေးရွာများအတွင်း ပြည်သူလူထု၏ ပစ္စည်းများကို လုယူခြင်း ရိုက်နှက်ခြင်းများ ပြုလုပ်နေဆဲဖြစ်သည်ဟု ဆိုသည်။
အလားတူ ပင်ဇန်နဝါရီ ၂၉ ရက်တွင် သီပေါမြို့နယ်၊ ပန်မြိုင်းကျေးရွာအနီးတွင် စစ်ဆေးရေးဂိတ် ဖွင့်လှစ်ထားသော MNDAA တပ်ဖွဲ့က ကျေးရွာအပြင်ဘက်ရှိ တောင်ယာသို့သွားသော ဒေသခံပြည်သူ လုံးပန်ကို ဖမ်းဆီးရိုက်နှက်ခဲ့ရာ နေအိမ်သို့ ပြန်ရောက်ပြီးနောက် ရိုက်နှက်ခံရသော ဒဏ်ရာများဖြင့် သေဆုံးသွားခဲ့ကြောင်း ထုတ်ပြန်ချက်က ဆိုသည်။
“သီပေါကနေ ဆောင်ကြဲ မိုင်းရယ် သွားလမ်းမှာဖြစ်တာ၊ သေသူက အသက် ၄၀ ရှိတဲ့ ပြည်သူတစ်ဦးပါ။ ခုလို တရားမဲ့ ရိုက်နှက်လို့ သေဆုံးရတာမျိုး မဖြစ်သင့်ဘူး”ဟု ရှမ်းကျောင်းသားသမဂ္ဂ တာဝန်ခံတစ်ဦးက မဲခေါင်သို့ ပြောသည်။
ထိုကဲ့သို့ အရပ်သားပြည်သူများ၏ ပစ္စည်းဥစ္စာကို လုယူခြင်း၊ ပြည်သူများကို ရိုက်နှက် သတ်ဖြတ်ခြင်းသည် စစ်ရာဇဝတ်မှု ကျူးလွန်ခြင်းဖြစ်ပြီး ရှမ်းကျောင်းသားသမဂ္ဂမှ ပြင်းထန်စွာ ကန့်ကွက်ရှုတ်ချသည်ဟု ၎င်းက ဆိုသည်။
#MeKongNews
#သီပေါ
#စစ်ကောင်စီတပ်
#လက်နက်ကိုင်တပ်ဖွဲ့
#လူ့အခွင့်အရေး
#ချိုးဖောက်
