မဲခေါင်၊ ဇန်နဝါရီ ၃၀
ရှမ်းပြည်မြောက်ပိုင်း၊ လားရှိုးမြို့တွင် ဇန်နဝါရီ ၂၈ ရက်က သံဃာတော်တစ်ပါးကို သတ်ဖြတ်ခဲ့သည့် ကျောင်းသား ၂ ဦးအား ဖမ်းဆီးရမိကြောင်း ဒေသခံများထံမှ သိရသည်။
ယင်းဖမ်းဆီးရမိသူ ၂ ဦးမှာ အမှတ် (၆) အခြေခံပညာအထက်တန်းကျောင်းတွင် ပညာသင်ကြားနေသည့် အသက် ၁၆ နှစ်ဝန်းကျင်ရှိသာ ရှိသေးသည့် သတ္တမတန်း (Grade-8) ကျောင်းသားများ ဖြစ်ကြကြောင်း သိရသည်။
ဖြစ်စဉ်မှာ ပြီးခဲ့သည့် ဇန်နဝါရီ ၂၇ ရက်က လားရှိုးမြို့၊ (၄) ရပ်ကွက်ရှိ မဟာဗောဓိရုံကျောင်းတိုက် အနီးတွင် ကျောင်းသားတစ်စု ရန်ဖြစ်နေခြင်းကြောင့် ဆရာတော် ဦးကေသရ (သက်တော် ၅၆ နှစ်) က လေးခွဖြင့်ပစ်ကာ တားဆီးခဲ့သည်။
ယင်းသို့ ပစ်ခတ်တားဆီးမှုကြောင့် ကျောင်းသားနှစ်ဦးကို လေးခွစာ ထိမှန်ခဲ့ကြောင်း သိရသည်။
ထို့ကြောင့် ဇန်နဝါရီ ၂၈ ရက် နံနက်ပိုင်းတွင် လေးခွထိမှန်ခဲ့သည့် ယင်းကျောင်းသား ၂ ဦးက အငြိုးအတေးဖြင့် မဟာဗောဓိရုံကျောင်းတိုက်သို့ ပြန်လာကာ ဆရာတော်အား ဆွမ်းလာကပ်သည်ဟု လိမ်လည်ပြောဆိုပြီး ကိုယ်ထိလက်ရောက် လုပ်ကြံသတ်ဖြတ်ခဲ့ခြင်း ဖြစ်သည်။
“အဲဒီနေ့ နံနက် ၆ နာရီဝန်းကျင်လောက်မှာ ကျောင်းသား ၂ ယောက်က ဘုန်းကြီးကို ဆွမ်းကပ်ဖို့ မုန့်ဟင်းခါးနဲ့ ကန်တော့ဖို့ ပန်းတွေပါ ယူလာကြတာ။ ဘုန်းကြီးက ကျောင်းမှာ တစ်ပါးတည်းရှိနေချိန် ကလေး ၂ ယောက်က တူနဲ့ထု၊ ဓားနဲ့ထိုးပြီး သတ်သွားတာ” ဟု (၄) ရပ်ကွက်နေ အမျိုးသားတစ်ဦးက ပြောသည်။
ထို့နောက် အခင်းဖြစ်ပွားရာတွင် ဆရာတော်အား သတ်ဖြတ်ခဲ့သည့် ကျောင်းသား ၂ ဦး၏ ဖုန်းကျကျန်ရစ်ခဲ့ရာမှ တစ်ဆင့် ခြေရာခံမိပြီး ဖမ်းဆီးရမိခဲ့ခြင်း ဖြစ်ကြောင်း သိရသည်။
တရုတ်အားကိုးဖြင့် လားရှိုးမြို့ကို ပြန်လည်ထိန်းချုပ်ပြီး စစ်ကောင်စီ တပ်ဖွဲ့ဝင်များက မြို့တွင်းလုံခြုံရေး ယူထားသည့်ကြားမှ ယခုကဲ့သို့ လူသတ်မှုများအပြင် ခိုး၊ ဆိုး၊ လုယက်၊ သတ်ဖြတ်မှုများ နေ့စဉ်နှင့်အမျှ ဖြစ်ပွားနေမှုအပေါ် ဒေသခံများက ဝေဖန် ပြောဆိုနေကြသည်။
#MeKongNews
#လားရှိုး
#သံဃာတော်
#သတ်ဖြတ်
#ကျောင်းသား
#ဖမ်းမိ
