မဲခေါင်၊ ဇန်နဝါရီ ၂၁
လောင်းကစားဂိမ်းရုံတွင် အမှတ်ခိုးထည့်သည်ဟု စွပ်စွဲကာ ဆိုင်လုံခြုံရေး ပြည်သူ့စစ်များက ဝိုင်းဝန်းရိုက်နှက်သဖြင့် ရှမ်းပြည်မြောက်ပိုင်း၊ မူဆယ်မြို့ရှိ ဂိမ်းဆိုင်တစ်ဆိုင်တွင် လာရောက်ကစားသူတစ်ဦး သေဆုံးသွားခဲ့ကြောင်း စုံစမ်းသိရှိရသည်။
ပြီးခဲ့သည့် ဇန်နဝါရီ ၁၉ ရက် မွန်းလွဲ ၁ နာရီခန့်တွင် မူဆယ်မြို့ စွမ်စော (၁)လမ်း၊ ဟုန်ရန်တည်းခိုခန်း၏ အရှေ့ဘက်၊ SKY KTV မှ ၂ လမ်းကျော်ရှိ ခေတ်သစ်ကစားဝိုင်း ဂိမ်းဆိုင်၌ အသက် ၂၈ နှစ်အရွယ် မောင်လှမြင့်က သူငယ်ချင်းဖြစ်သူ အမျိုးသမီးတစ်ဦးနှင့်အတူ လာရောက် ကစားနေစဥ် အမှတ်ထည့်သည့် စာရေးမက ၎င်းအား လက်ညိုးထိုး၍ အမှတ် ခိုးထည့်နေကြောင်း ဆိုင်လုံခြုံရေး ပြည်သူ့စစ်ကို သွားပြောသည်ဟု မျက်မြင်တွေ့သူများက ဆိုသည်။
ထို့နောက် ပြည်သူ့စစ် ၂ ဦးက မောင်လှမြင့်ကို ထိုးကြိတ်ကာ သေနတ်ဒင်များဖြင့် ဆောင့်သည့်အပြင် နောက်ထပ် ပြည်သူ့စစ်တစ်ဦး ရောက်လာပြီး သုံးဦးပေါင်း ရိုက်နှက် ထိုးကြိတ်ခဲ့ရာ ယင်းဂိမ်းဆိုင်အတွင်းပင် သေဆုံးသွားကြောင်း သိရသည်။
“အမှတ်ခိုးမထည့်ဘူး၊ စာရေးမစကားကို ယုံပြီး ပြည်သူ့စစ်တွေက ဝိုင်းရိုက်ကြတာ။ ပြည်သူ့စစ်တစ်ယောက်က ‘ဟေ့ကောင်တွေ တော်တော့ သေပြီ’ ပြောမှ ကြောက်ပြီး ပြန်လာခဲ့တာ။ သူသေပြီဆိုတာ သေချာတယ်။ ၂ ညရှိပြီ၊ အခု နေ့လည်ထိ ပြန်မှမလာတော့တာ”ဟု မျက်မြင်သိသူတစ်ဦးက ဖွင့်ဟပြောဆိုသည်။
ထို့နောက် သေဆုံးသူနှင့် အတူနေ ကိုမြင့်ဆောင်ဆိုသူက နောက်တစ်ရက် နံနက် ၉ နာရီတွင် စခန်းသို့ သွားရောက်တိုင်ကြားရာ ဂတ်စာရေးက ကိုမြင့်ဆောင်၏ ဖုန်းနံပါတ်ယူထားပြီး ဆက်သွယ်မည်ဟု ဆိုသော်လည်း လက်ရှိအချိန်အထိ မဆက်သွယ်လာသေးဘဲ ဂိမ်းဆိုင်လည်း ဖွင့်ထားဆဲဖြစ်ကြောင်း ဒေသခံတစ်ဦးက မဲခေါင်သို့ ပြောသည်။
ခေတ်သစ်ဂိမ်းဆိုင်သည် မြို့မပြည်သူ့စစ်က လိုင်းကြေးတာဝန်ခံယူကာ ဖွင့်ထားသည့်ဆိုင်ဖြစ်ကြောင်း ဒေသခံများထံမှ သိရသည်။
မောင်လှမြင့် အသတ်ခံရမှုနှင့် ပတ်သက်၍ နယ်ထိန်းခေါင်းဆောင် ရဲအုပ်ရဲနောင်က ၎င်းမသိကြောင်း ဆိုသည်။
မူဆယ်တွင် နေ့စဥ်နီးပါး ဓားပြမှု၊ လုယက်မှု၊ ပြန်ပေးဆွဲမှု၊ လူသတ်မှုများ ဖြစ်နေရာ ရဲတပ်ဖွဲ့က ဖော်ထုတ် အရေးယူပေးခြင်းမရှိဘဲ အကြမ်းဖက်သမားများ လုပ်ကြောင်း ခေါင်းစဥ်တပ်၍ အမှုပိတ်နေကြကြောင်း သိရသည်။
မူဆယ်မြို့တွင် တရားမဝင်လုပ်ငန်းများ ဖြစ်သည့် ကျားဖြန့်ရုံ၊ KTV၊ ပြည့်တန်ဆာရုံ၊ အနှိပ်ခန်း၊ လောင်းကစားရုံနှင့် အပေါင်ဆိုင် အများအပြားသည် လိုင်စင်ရသဖွယ် ပြောင်ပြောင်တင်းတင်း လုပ်ကိုင်နေကြပြီး မူဆယ်ရဲတပ်ဖွဲ့နှင့် ဌာနေပြည်သူ့စစ်များက လိုင်းကြေးယူ အကာအကွယ် ပေးနေကြသည်။
ယင်းလုပ်ငန်းများကြောင့် နောက်ဆက်တွဲ ဖြစ်ပွားလာသည့် ရာဇဝတ်မှုများကိုလည်း ခရိုင်မှူး ဒုရဲမှူးကြီး ပြည့်ဝင်းအောင် ဦးဆောင်သည့် မူဆယ်ရဲတပ်ဖွဲ့က လိုင်းကြေး ယူထားသဖြင့် ထိရောက်သည့် စုံစမ်းစစ်ဆေးမှုများ လုပ်ဆောင်ခြင်းလည်း မရှိပေ။
#MeKongNews
#မူဆယ်
#ဂိမ်းဆိုင်
#ပြည်သူ့စစ်
#ဝိုင်းရိုက်
#သေဆုံး
