မဲခေါင်၊ ဇန်နဝါရီ ၂၁

တောမီးမှတစ်ဆင့် မီးလောင်မှုကြောင့် တောင်ကြီးမြို့နယ်၊ ပုန်းအင်းကျေးရွာ အနီးရှိ တောင်သူများ စိုက်ပျိုးထားသော ပြောင်းနှင့် ပဲစင်းငုံ ဧက ၅၀ကျော် ပျက်စီးသွားခဲ့ကြောင်း ဒေသခံများထံမှ သိရသည်။

ရှမ်းပြည်တောင်ပိုင်း၊ ကွန်လုံကျေးရွာအုပ်စုတွင် ဇန်နဝါရီ ၁၉ ရက်ညက မီးလောင်မှုဖြစ်ခဲ့ပြီး တောမီးရှို့သူကို မဖမ်းမိသေးဘဲ စိုက်ပျိုးခင်း တစ်ဧကလျှင် ကျပ်သိန်း ၂၀ ကျော် ဆုံးရှုံးခဲ့ရကြောင်း ဒေသခံများက ပြောသည်။

“ရက်စက်လိုက်တာ၊ တောမီးမရှိူ့ရဘူး ဆိုတာ ရွှာတိုင်း စည်းကမ်း ထုတ်ထားပြီးသားကို စာနာစိတ် မရှိလိုက်ကြတာ။ တစ်နှစ်လုံးလုံး ကြိုးစားလုပ်နေရတာလေ ခုတော့ တစ်ညတည်းနဲ့ မီးလောင်ပြီး ပျက်စီးကုန်တယ်။ ဝမ်းနည်းလို့မဆုံးဘူး အနည်းဆုံး တစ်ဧကကို သိန်း ၂၀ အထက်ဆုံးရှုံးတယ်”ဟု တောင်သူတစ်ဦးက မဲခေါင်သို့ ပြောသည်။

ယခုကဲ့သို့ မီးလောင် ပျက်စီးသွားခြင်းကြောင့် တောင်သူများအနေဖြင့် လာမည့်နှစ်တွင် မိသားစု စားဝတ်နေရေး အတွက် စိုးရိမ်ကြရကြောင်း ၎င်းက ဆက်ပြောသည်။

တောင်သူများ စိုက်ပျိုးထားသော ပြောင်း၊ ပဲစင်းငုံခြံတချို့သည် အကြွေးယူပြီး စိုက်ထားသဖြင့် မီးလောင်သွားသောကြောင့် အရင်းနှီး ဆုံးရှုံးသည့်အပြင် အကြွေးမဆပ်နိုင်သည့် အခက်ခဲ ဖြစ်နေကြရကြောင်း ဒေသခံများက ဆိုသည်။

ပုန်းအင်းကျေးရွာ တစ်ဝိုက်တွင် စိုက်ပျိုး‌ရေး သိမ်းချိန်ဖြစ်သော ယခုလို‌ ဆောင်းရာသီတွင် တောင်းယာကွင်း ဧရိယာအတွင်း စိုက်ပျိုးရေး အကြွင်းအကျန်များကို မီးရှို့ခြင်း ခွင့်မပြုသော်လည်း စည်းကမ်းမဲ့ မီးရှို့သူများကြောင့် ပြောင်း၊ ပဲစင်းငုံခြံများ နှစ်စဉ် မီးလောင်ပျက်စီးရကြောင်း ဒေသခံများက ပြောသည်။

#MeKongNews
#တောင်ကြီး
#ပုန်းအင်း
#ပြောင်း
#ပဲစင်းငုံ
#မီးလောင်ပျက်စီး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)