မဲခေါင်၊ ဇန်နဝါရီ ၁၅
ရှမ်းပြည်တောင်ပိုင်း၊ ပင်လောင်းမြို့နယ်တွင် စစ်သင်တန်းတက်ရသော သင်တန်းသားများ စစ်ရေးလေ့ကျင့်မှုတွင် ပအိုဝ်းပြည်သူ့စစ် – PNO က ကျည်တစ်ထောင့် ၃ ထောင်ကျပ်နှုန်း တောင်းနေကြောင်း သတင်းရင်းမြစ်များထံမှ သိရသည်။
ထီတလီတောင်ခြေ၊ ရင်းမှီးတပ် လေ့ကျင့်ရေးကွင်းတွင် ဖွင့်ထားသော စစ်သင်တန်းတွင် ပြီးခဲ့သည့် နှစ်များက သင်တန်းသားတစ်ဦးလျှင် ကျည် ၅ ထောင့်ဖြင့် လေ့ကျင့်ပစ်ခွင့် ရှိသော်လည်း ယခုတွင် ကျည်တစ်ထောင့် ၃ ထောင်ကျပ်ပေးမှသာ လက်တွေ့ပစ်ခတ်ခွင့်ရကြောင်း သိရသည်။
“အရင်ဆို ပိုက်ဆံပေးဖို့ မလိုဘူး၊ အခုကျ ပိုက်ဆံပေးဖို့လိုတယ်။ အလကားမပေးဘူး အများစုက သေနတ်ပစ်ဖို့အတွက် အိမ်ကမိဘ ထောက်ပံ့ပေးရတယ်။ တချို့ကျတော့ ရွာက ရန်ပုံငွေနဲ့ ထောက်ပံ့တာ ရှိကြတယ်။ ရွာမှာ အလှည့်ကျနဲ့ တက်ရတဲ့သူက ပိုက်ဆံလည်း မရှိတော့ မပစ်ရဘူး”ဟု သတင်းရင်းမြစ်တစ်ဦးက မဲခေါင်သို့ ပြောသည်။
ယင်းစစ်သင်တန်းကို ၁၅ ရက် ပြုလုပ်ပြီး ပင်လောင်းမြို့ တောင်ဘက်ရှိ စင်းတောင်းအုပ်စု၊ ဘန်းဖြာအုပ်စု၊ လိန်းညာအုပ်စု၊ တောင်ထီဗွာ ကျေးရွာအုပ်စုရှိ ကျေးရွာ ၂၀ မှ လူငယ် ၁၀၀ နီးပါး တက်နေရကြောင်း ၎င်းက ဆိုသည်။
သင်တန်းဆင်းပြီးသည့် ဒေသခံများကို တပ်ဖွဲ့အတွင်း စစ်မှုထမ်းရန်နှင့်၊ ကျေးရွာနှင့် အနီးတစ်ဝိုက် အခြေအနေများကို သတင်းပေးပို့ရန်၊ ရွာတွင်းလုံခြုံရေး ဆောင်ရွက်ပေးရန်လည်း ညွန်ကြားထားကြောင်း ၎င်းက ဆက်ပြောသည်။
PNO သည် ပအိုဝ်းဒေသရှိ ပြည်သူများထံ ဆက်ကြေးအမျိုးမျိုး လစဉ် ကောက်ခံနေသည့်အပြင် လူငယ် များကိုလည်း စစ်သားအဖြစ် အတင်းအဓ္ဓ စုဆောင်းနေကြောင်း ဒေသခံများထံမှ သိရသည်။
PNO တပ်ဖွဲ့သည် ယခင်က တော်လှန်ရေးတပ်ဖွဲ့ ဖြစ်ဖူးသော်လည်း ၁၉၉၁ ခုနှစ်က စစ်တပ်နှင့် အပစ်ရပ်ကာ ၂၀၀၉ ခုနှစ်တွင် စစ်တပ်လက်အောက်ခံ ပြည်သူ့စစ်အဖွဲ့အဖြစ် ပြောင်းလဲ ဖွဲ့စည်းခဲ့ပြီး လက်ရှိတွင် စစ်ကောင်စီတပ်နှင့်အတူ တော်လှန်ရေးတပ်ဖွဲ့များကို တိုက်ခိုက်နေသည်။
#MeKongNews
#စစ်ရေးလေ့ကျင့်
#သင်တန်းသား
#PNO
#ပင်လောင်း
