မဲခေါင်၊ ဇန်နဝါရီ ၁၂
ရှမ်းပြည်မြောက်ပိုင်း၊ သီပေါမြို့နယ်တွင် ကုန်ကား ၇၇ စီးကို ယာဥ်မောင်း ၆၈ ဦး နှင့်အတူ တာလုံ ကူးတို့ဆိပ် အခြေပြု ရမခ၊ ဗျူဟာ – ၁ က ဖမ်းဆီးထားကြောင်း သတင်းရင်းမြစ်များထံမှ သိရသည်။
စစ်ကောင်စီသည် တရုတ်ဘက်မှ ဝင်လာသည့် ကုန်စည်များကို တရားမဝင် ပို့ကုန် သွင်းကုန် ဥပဒေဖြင့် ဆက်တိုက် ဖမ်းဆီးနေခြင်းဖြစ်ပြီး လက်နက်ခဲယမ်းနှင့် မူးယစ်ဆေးဝါးများ သယ်ယူပို့ဆောင်မှု မရှိစေရေး ခေါင်းစဉ်ဖြင့် ပိတ်ဆို့ ဖမ်းဆီးနေခြင်း ဖြစ်ကြောင်း သိရသည်။
ယင်းဖမ်းဆီးမှုများကို အရှေ့မြောက်တိုင်း စစ်ဌာနချုပ်၏ ဗျူဟာ – ၁ က ဦးဆောင်နေကြောင်း သိရသည်။
ယင်းအဖွဲ့အား ယာယီ ဗျူဟာမှူး ဒုဗိုလ်မှူးကြီး သက်ထွဋ်ဝင်း၊ နမ့်လန်တပ်နယ်မှ ဗိုလ်မှူးမျိုးလွင်၊ Drone Team Hexa (L-270) မှ ဗိုလ်ကြီးကောင်းထက်၊ စရဖ ဒုအရခဗ စိုင်းကျော်လိတ်တို့ ပါဝင်သည့် စုပေါင်းအင်အား ၈၆ ယောက်ဖြင့် ဖွဲ့စည်းထားကြောင်း သိရသည်။
ယင်းအဖွဲ့သည် သီပေါမြို့နယ်၊ တာလုံ ကူးတို့ဆိပ်တွင် အခြေပြုထားပြီး ဒရုန်းဖြင့် ကင်းထောက်ကာ မန်ဟုံရွာ အနီးတစ်ဝိုက် ၃ နေရာ မှ စုစုပေါင်း မော်တော်ယာဉ် ၇၇ စီး နှင့် ယာဉ်မောင်း ၆၈ ယောက်တို့ကို ပိတ်ဆို့ဖမ်းဆီးပြီး အသေးစိတ် ဖွင့်ဖောက် စစ်ဆေးမှုများ ပြုလုပ်နေကြောင်း သိရသည်။
“မော်တော်ယာဉ် ၇၇ စီးနဲ့ ယာဉ်မောင်း ၆၈ ယောက် ဆိုတော့ မောင်းသူမဲ့ မော်တော်ယာဉ် ၉ စီးပါဝင်နေပါတယ်။ ပိုင်ရှင်မဲ့ ဘယ်နှစီး ထပ်ဖြစ်မလဲ ဆိုတာကိုပဲ စောင့်ကြည့်ရမှာ ဖြစ်ပါတယ်”ဟုသတင်းရင်းမြစ်တစ်ဦးက ပြောသည်။
ယင်းဖမ်းဆီးမှုကို ပြီးခဲ့သည့် ဇန်နဝါရီ ၃ ရက်နှင့် ၄ ရက်များတွင် ပြုလုပ်ခဲ့ခြင်းဖြစ်ပြီး ဆက်လက်၍လည်း ဖမ်းဆီးနေကြောင်း သိရသည်။
တရုတ် နယ်စပ်ဘက်မှ သယ်ဆောင်လာသည့် ကုန်ပစ္စည်းများကို ရှမ်းမြောက်၌ ရမခနယ်မြေ၊ သီပေါမြို့နယ်၊ တာလုံကူးတို့ဆိပ်၊ ရှမ်းတောင်၌ ရပခနယ်မြေ နောင်ဝိုးနှင့် မိုင်းပွန်၊ ဟိုပုံးတို့တွင် စစ်ကောင်စီက ဖမ်းဆီးနေခြင်း ဖြစ်သည်။
ဖမ်းမိကုန်များ၏ ပိုင်ရှင်များကို ပို့ကုန်သွင်းကုန် ပုဒ်မ – ၈ အပြင် ငွေကြေးခဝါချမှုဖြင့်ပါ အရေးယူနေသဖြင့် ပိုင်ဆိုင်မှု အားလုံးပါ သိမ်းဆည်းခံရနိုင်ကြောင်း သိရသည်။
#MeKongNews
#သီပေါ
#ကုန်ကား
#စစ်ကောင်စီ
#ဖမ်းထား
