မဲခေါင်၊ ဇန်နဝါရီ ၈
စစ်ကောင်စီနှင့် ဖြစ်ပွားနေသည့် လက်ရှိ တိုက်ပွဲများအတွင်း စစ်ကောင်စီနှင့် လက်အောက်ခံ PNO တို့ဘက်မှ ၂၀ ဦး ထက်မနည်း သေဆုံးပြီး အလောင်း တစ်လောင်းနှင့် သေနတ်တစ်လက်ကိုလည်း သိမ်းဆည်းမိခဲ့ကာ လူသားဒိုင်းအဖြစ် အသုံးပြုနေသည့် ရွာသား ၂ ဦးကိုလည်း ကယ်တင်နိုင်ခဲ့ကြောင်း PNLA က ယနေ့ ထုတ်ပြန်သည်။
ကယ်တင်ခဲ့သူ ၂ ဦးမှာ မောက်မယ်မြို့နယ်၊ ဟိုနမ့်ကျေးရွာအုပ်စု၊ နောင်မီရဲ့ရွာမှ ခွန်အောင်နှင့် ခွန်ဝင်းတို့ ဖြစ်ကြောင်း သိရသည်။
ယခုလအတွင်း စစ်ကောင်စီနှင့် PNO က ၎င်းတို့ အခြေချ လှုပ်ရှားသည့် တောတွင်းအထိ ထိုးစစ်ဆင်လာခြင်းကြောင့် နေ့စဉ် တိုက်ပွဲ ဖြစ်ပွားနေသည်ဟု PNLA ပြန်ကြားရေးတာဝန်ခံက ဆိုသည်။
“ကျနော်တို့က တောတောင်တွေထဲပဲ နေတာပါ။ ဒါကို သူတို့က လိုက်တိုက်နေတာ၊ သူတို့ လာမတိုက်ရင် တိုက်ပွဲ မဖြစ်ပါဘူး။ ပြီးတော့ ဒေသခံတွေကိုလည်း လူသားဒိုင်းအနေနဲ့ အသုံးချနေတာ အပြင်းအထန် ကန့်ကွက်ပါတယ်”ဟု PNLA ပြောခွင့်ရ ခွန်ရိန်းယံက မဲခေါင်သို့ ပြောသည်။
“PNO ပြည်သူ့စစ်တွေက ကျနော်တို့ ပစ္စည်းသယ်ခိုင်းပြီး ရှေ့ဆုံးကနေ သွားခိုင်းတယ်။ ကျနော်တို့လည်း သွားရင်း တိုက်ပွဲဖြစ်တော့ နောက်ပြန်ဆုတ်လည်း မရတဲ့ အခြေအနေ ဆိုတော့ ပိုနီးတဲ့ PNLA ဘက်ကို ထွက်ပြေးလာလိုက်တာ။ ကျနော်တို့ရွာက တစ်ရက် ၃ ယောက် PNO တွေနဲ့ အတူသွားရတယ်။ ပစ္စည်းတွေ သယ်ရတယ်။ ထမင်းချက် ပေးရတယ်။ ရှေ့ဆုံးကနေ လမ်းကြောင်း ထိုးပေးရတယ်”ဟု လူသားဒိုင်း လုပ်ခံရသူတစ်ဦးက ပြောထားသည့် ရုပ်သံကို PNLA က ထုတ်ပြန်သည်။
အခြား မြေပြင်သတင်းအရ ရွာသား ၆ ဦးကို PNO က လူသားဒိုင်းလုပ်ပြီး သွားခိုင်းရာ တိုက်ပွဲဖြစ်ချိန်တွင် ရှေ့ဆုံးမှ ၂ ယောက်က PNLA တပ်နှင့် ပိုနီးသွားသဖြင့် ၎င်းတို့က ကယ်ထားလိုက်ပြီး ကျန် ၄ ယောက်မှာ ရွာကို ပြန်ပြေးလာကြောင်း သိရသည်။
စစ်ကောင်စီနှင့် လက်အောက်ခံ PNO ပြည်သူ့စစ်တို့သည် PNLO/PNLA ထိန်းချုပ်ထားသည့် ကဒူးကြီးဒေသ အပါအဝင် ထိုင်းနယ်စပ်နှင့် ကရင်နီပြည်၊ ရှားတောအထိ ထိုးစစ်ဆင်နေပြီး စစ်ကောင်စီနှင့် PNO အင်အား ၅၀၀ ကျော် ရှိနေကြောင်း အခြား သတင်းအရင်းအမြစ်အရ သိရသည်။
#MeKongNews
#တိုက်ပွဲ
#PNO
#သေဆုံး
#လူသားဒိုင်း
