မဲခေါင်၊ ဇန်နဝါရီ ၁
ရှမ်းပြည်မြောက်ပိုင်း၊ သီပေါတံတားတွင် တပ်စွဲထားသည့် MNDAA တပ်များ ယနေ့ နံနက်ပိုင်းက ဆုတ်ခွာသွားပြီး စစ်ကောင်စီတပ်က ဝင်ရောက် တပ်စွဲလိုက်ပြီဖြစ်ကြောင်း ဒေသတွင်း သတင်းရင်းမြစ်များထံမှ သိရသည်။
ယနေ့ ဇန်နဝါရီ ၁ ရက် နံနက်ပိုင်းတွင် သီပေါတံတား၊ လားရှိူးဘက်ခြမ်း ရှိ MNDAA တပ်များထွက်ခွာသွားပြီး ယင်းနေရာတွင် သီပေါတွင် လက်ရှိ အထိုင်ချနေသည့် ခမရ – ၅၀၆ က ဝင်ရောက် တပ်စွဲလိုက်ခြင်း ဖြစ်ကြောင်း သိရသည်။
“ဒီမနက်ပဲ ကိုးကန့်တပ်တွေ အလံတွေပါ ဖြုတ်သိမ်းသွားကြလို့ တံတားတစ်ခုလုံး စစ်တပ် တပ်စွဲလိုက်ပြီ၊ မိုင်းတို့ ဘာတို့ နေရာရှင်းလင်းရေး လုပ်နေတယ်။ တံတားလည်း မကြာဘူး တစ်ရက် ၂ ရက်အတွင်း ဖွင့်မယ်ထင်တယ်”ဟု သီပေါ သတင်းရင်းမြစ်က မဲခေါင်သို့ ပြောသည်။
၁၀၂၇ စစ်ဆင်ရေးကတည်းက သီပေါတံတားတွင်တပ်စွဲထားသည့် MNDAA တပ်များ ယနေ့ ဆုတ်ခွာသွားကာ ပြီးခဲ့သည့် နိုဝင်ဘာ ၁၄ ရက်က ပိတ်ထားသည့် သီပေါတံတား တစ်ခုလုံး စစ်ကောင်စီတပ် ထိန်းချုပ်မှုအောက် ရောက်ရှိသွားပြီ ဖြစ်သည်။
ထို့ပြင် သီပေါနှင့် လားရှိုးကြားက ၉ မိုင်လမ်းခွဲထိ ကိုးကန့်တပ်များ ဆုတ်ခွာသွားပြီ ဖြစ်ကြောင်းလည်း သတင်းရင်းမြစ်က ဆိုသည်။
“ကိုးကန့်က အကုန် စုပြုံဆုတ်တာ မဟုတ်ဘဲ နည်းနည်းချင်း ဆုတ်ပေးနေတာ။ ၉ မိုင်လမ်းဆုံအထိ ပေးလိုက်ပြီ၊ တရုတ်ကိုယ်တိုင် နယ်နိမိတ် လာသတ်မှတ်တာ” ဟု ၎င်းကပြောသည်။
ယင်းမှာ ပြီးခဲ့သည့် ဒီဇင်ဘာ ၂၉ ရက်က လားရှိူးမြို့၊ ဆင်နှစ်ကောင်ဟိုတယ် တွေ့ဆုံပွဲမှ ရလဒ်များ ဖြစ်ပြီး လက်ရှိတွင် လားရှိုးပတ်လည်အထိ စစ်တပ် ထိန်းချုပ်လာနိုင်ပြီ ဖြစ်ကြောင်း ၎င်းက ဆက်ပြောသည်။
လက်ရှိတွင် သီပေါတံတား ၉ မိုင်လမ်းခွဲနှင့် လားရှိုးမြို့ပြင် မယ်ဟန်ဂိတ်ထိ MNDAA ဂိတ်များ ရုပ်သိမ်း ပေးလိုက်ရပြီး ပြည်ထောင်စု လမ်းမကြီးပေါ်တွင် နှစ်ဘက် မည်သည့်အဖွဲ့မှ ဂိတ်မထိုင်ရန် သဘောတူထားကြောင်း MNDAA တပ်တွင်း သတင်းအရင်းအမြစ်ကို ကိုးကား၍ ဒေသတွင်းသတင်း Wa News Land ကလည်း ဖော်ပြသည်။
ဆင်နှစ်ကောင်ဟိုတယ် တွေ့ဆုံမှုတွင် သီပေါ – လားရှိူးလမ်းကြောင်းနှင့် တန့်ယန်း – မိုင်းရယ် – လားရှိုး အထိ ကိုးကန့်တပ်များကို ၎င်းတို့၏ ရွေးကောက်ပွဲ အပိုင်း – ၂ ပြုလုပ်မည့် ဇန်နဝါရီ ၁၁ ရက်မတိုင်မီ စစ်ကောင်စီက ဆုတ်ခွာခိုင်းထားပြီး သိန္နီမြို့အထိ စွန့်ခွာရန် တရုတ် အကူအညီဖြင့် ဖိအားပေးနေသည်ဟု သတင်းရင်းမြစ်များက ဆိုသည်။
#MeKongNews
#သီပေါတံတား
#MNDAA
#ဆုတ်ခွာ
#စစ်ကောင်စီ
