မဲခေါင်၊ ဒီဇင်ဘာ ၃
ရှမ်းပြည်တောင်ပိုင်း၊ ပင်လုံမြို့၊ ပင်လုံတက္ကသိုလ်ရှေ့ရှိ၊ စစ်ကောင်စစ်ဂိတ်မှ တပ်သားများ စလော့ဂိမ်းစွဲနေပြီး ကားသမားများထံမှ ငွေတောင်းကြမ်းနေကြောင်း သတင်းရင်းမြစ်များထံမှ သိရသည်။
ယင်းဂိတ်၌ အိမ်စီးကားများ၊ ခရီးသည်တင် ကားငယ်များနှင့် ကုန်တင်ကားကြီးများ မကျန် ငွေတောင်းနေခြင်းဖြစ်သည်။
“စလော့ဂိမ်း ဆော့နေရင်းကို တောင်းတာ လူတောင် သေချာမကြည့်ဘူး။ ဂိမ်းဆော့နေရင်းကို ၅ သောင်းပေးခဲ့ တစ်သိန်းပေးခဲ့ဆိုပြီး ပြောင်ပြောင်တင်းတင်းပဲ တောင်းစားတာ၊ ကျွန်တော်ရဲ့ ၆ ဘီးကားဆို တစ်ခါ သွားတိုင်း ၅ သောင်းပေးရတယ်။ ၁၂ ဘီးကားတွေကိုကျ တစ်သိန်းတောင်းတယ်”ဟု ကိုယ်တိုင်ပေးခဲ့ရသည့် ကားသမားတစ်ဦးက ပြောသည်။
ထို့ပြင် အိမ်စီးကားငယ်များ ကုန်တင်ယာဉ်ငယ်များကို တစ်သောင်းကျပ်မှ ၃ သောင်းကျပ်အထိ တောင်းသည်ဟု သတင်းရင်းမြစ်များက ပြောသည်။
“တရားမဝင် ပစ္စည်းတင်တာလည်း မဟုတ်ဘူး၊ ခြံထွက် သီးနှံတွေ ကုန်စိမ်းတွေကို ပရိုဘောက်နဲ့ တင်တာတောင်မှ ၃ သောင်းတောင်းတယ်။ ၂ သောင်းနဲ့ အဆင်ပြေလိုက် သုံးသောင်းနဲ့ အဆင်ပြေလိုက်နဲ့ ညှိပြီး သွားနေရတာပဲ”ဟု ခြံထွက်သီးနှံ သယ်သူတစ်ဦးက ပြောသည်။
လမ်းပေါ်တွင်ရှိသည့် စစ်ကောင်စီဂိတ်မှ အချို့ တပ်ဖွဲ့များသည် စလော့ကျွဲဂိမ်းဆော့နေကြသည်ကို မကြာခဏမြင်ရပြီး ယင်းကဲ့သို့ ဂိမ်းဆော့ခြင်းသည် ငွေတောင်းကြမ်းခြင်း အကြောင်းအရင်း တစ်ခုဖြစ်သည်ဟု ကားသမားတစ်ဦးက ဆိုသည်။
“ရှမ်းတောင်မှာရှိတဲ့ ဂိတ်တော်တော်များများမှာ တွေ့ရတယ်။ စစ်သားတွေက ဂိတ်စောင့်ရင်း စလော့ဂိမ်းတွေ ဆော့နေကြတာ။ အဲ့ဂိမ်းဆော့လို့ ငွေတောင်းကြမ်း လာတာလားလို့လည်း တွေးမိတယ်လေနော်။ ဂိမ်းကြောင့် ငွေလိမ်တာတွေ ငွေခိုးတာတွေလည်းခဏခဏ ကြားဖူးလို့ သူတို့လည်း ငွေလိုလို့ ပိုပြီး အတောင်းကြမ်း လာတယ်လို့ ထင်တယ်ပေါ့နော်”ဟု ၎င်းက ပြောသည်။
ပင်လုံမြို့သည် လဲချား ၊မိုင်းကိုင်၊ ကျေးသီး၊ မိုင်းရှုးမြို့များသို့ သွားရောက်ရာတွင် အဓိကကျသည့် အချက်အချာဖြစ်ကာ ရှမ်းမြောက်မှ ရှမ်းတောင်သို့ ကုန်စည်စီးဆင်းသည့် လမ်းကြောင်းပေါ်တွင် တည်ရှိသည့်မြို့လည်း ဖြစ်သည်၊
#MeKongNews
#ပင်လုံ
#စလော့ဂိမ်းစွဲ
#ငွေတောင်းကြမ်း
#ရှမ်းပြည်
