မဲခေါင်၊ ဒီဇင်ဘာ ၂
ရှမ်းပြည်မြောက်ပိုင်း၊ သီပေါမြို့နယ်၌ ဒေသခံနေအိမ် ၂ အိမ်ကို စစ်ကောင်စီတပ်သား ၂ ဦးက အိမ်ရှင်များအား သေနတ်ထောက်ပြီး ဓားပြတိုက်သွားကြောင်း SSPP က သတင်းထုတ်ပြန်သည်။
ပြီးခဲ့သည့် နိုဝင်ဘာ ၂၈ ရက် နံနက် ၂ နာရီ ၂၀ မိနစ်တွင် သေနတ်ကိုင် စစ်ကောင်စီတပ်သား ၂ ဦးသည် သီပေါမြို့နယ်၊ မိုးတေကျေးရွာအုပ်စု၊ ကွန်စံလိတ်ကျေးရွာတွင် နေထိုင်သည့် လုံးကော၏ နေအိမ်တွင်းသို့ ကျုးကျော် ဝင်ရောက်ပြီး အိမ်ရှင်ကို သေနတ်ဖြင့် ထောက်ကာ အိမ်နှင့် စျေးဆိုင်အတွင်းရှိ ပစ္စည်းများအား မွှေနှောက်၍ ကျပ် ၇ သိန်းတန်ဖိုးရှိ ပစ္စည်းအချို့နှင့် ပိုက်ဆံများ ယူဆောင်သွားကြောင်း ထုတ်ပြန်ချက်အရ သိရသည်။
ထို့ပြင် ၎င်းတို့သည် ယင်းနေအိမ်အား ဓားပြတိုက်ပြီးနောက် နံနက် ၄ နာရီဝန်းကျင်တွင် ဦးမောင်လေး နေအိမ်ကိုလည်း ဝင်ရောက်ကာ အိမ်ရှင်ကို သေနတ်ဖြင့်ထောက်၍ စျေးဆိုင်နှင့် နေအိမ်အတွင်းရှိ ပစ္စည်းအချို့ကို မွှေနှောက် ယူဆောင်သွားခဲ့သည်ဟု ဆိုသည်။
“၂ အိမ်စလုံးက ဆိုင်ဖွင့်ထားတဲ့အိမ်တွေ ဟုတ်တယ်။ အိမ်ရှင်ကို သေနတ်နဲ့ ထောက်ထားပြီးတော့ ငွေတွေ၊ ပစ္စည်းတွေ ဆိုလာပြားတွေကိုပါ ဓားပြတိုက်သွားတာဗျ။ ငွေကတော့ သိန်း ၂၀ ကျော်ပါသွားတယ်လို့ သိရတယ်ဗျ”ဟု အမည်မဖော်လိုသည့် ဒေသခံ သတင်းရင်းမြစ်တစ်ဦးက ပြောသည်။
ယင်းအပေါ် ဒေသဆိုင်ရာ စစ်ကောင်စီ အရာရှိများထံ ရပ်ကျေး တာဝန်ရှိသူများက တိုင်ကြားထားရာ ပြစ်မှုကျုးလွန်သူ တပ်သားနှစ်ဦး ယူဆောင်သွားသည့် ဘက်ထရီနှင့် ဆိုလာပြားကို စစ်ကောင်စီဘက်က အိမ်ရှင်ထံ ပြန်ပေးခဲ့ပြီး အစားအသောက်များနှင့် ငွေကြေး အချို့ကိုလည်း တာဝန်ယူ ဆောင်ရွက်ပေးမည်ဟု ပြောဆိုခဲ့ကြောင်း SSPP ထုတ်ပြန်ချက်တွင် ဖော်ပြထားသည်။
သို့ရာတွင် ဆိုလာပြားနှင့် ဘက်ထရီကိုသာ စစ်ကောင်စီတပ်က ပြန်ပေးခဲ့ပြီး ကျန်ဆုံးရှုံးမှုများအား ယနေ့အထိ ဖြေရှင်းပေးခြင်း မရှိသေးကြောင်း ဒေသခံများထံမှ သိရသည်။
“အခုထိ မဖြေရှင်းပေးဘူးဗျ၊ ဆိုလာနဲ့ ဘက်ထရီပဲပြန်ပေးတယ်။ ဓားပြတိုက်တဲ့ တပ်သားကို အရေးယူတာလည်း မတွေ့ဘူး။ သူတို့ ရောက်လာကတည်းက ပြည်သူတွေလည်း သွားရလာရတာ ကြောက်နေရတယ်”ဟု အခြား ဒေသခံတစ်ဦးကလည်း ဆိုသည်။
မိုးတေကျေးရွာအုပ်စုကို ပြီးခဲ့သည့် အောက်တိုဘာလတွင် စစ်ကောင်စီတပ်က ထိုးစစ်ဆင် ဝင်ရောက်ခဲ့ပြီး လက်ရှိအချိန်ထိ တပ်စွဲထားသည်။
သီပေါမြို့နယ်အား တအာင်းအမျိုးသားလွတ်မြောက်ရေးတပ်မတော် – TNLA က တစ်နှစ်ကျော် ထိန်းချုပ်ထားခဲ့ပြီး ယခုနှစ် အောက်တိုဘာလတွင် စစ်ကောင်စီက တရုတ်အားကိုးဖြင့် ပြန်လည် ထိန်းချုပ်နိုင်ခဲ့ခြင်း ဖြစ်သည်။
#MeKongNews
#သီပေါ
#စစ်ကောင်စီ
#ဓားပြတိုက်
#မိုးတေ
