မဲခေါင်၊ နိုဝင်ဘာ ၂၂
ရှမ်းပြည်တောင်ပိုင်း၊ ဆီဆိုင်မြို့၌ စားသောက်ကုန်များကို ပြည်သူများ လိုသလောက် ဝယ်ယူခွင့်မရဘဲ အိမ်ထောင်စုဦးရေဖြင့် ပစ္စည်းအရေအတွက်ကို စိစစ်ပြီးမှသာ စစ်ကောင်စီတပ်နှင့် ပအိုဝ်းပြည်သူ့စစ် – PNO က ဝယ်ခွင့်ပြုထားကြောင်း ဒေသခံများထံမှ သိရသည်။
ဇွန်လကတည်းက စတင်ကန့်သတ်ခြင်း ဖြစ်ပြီး အချိန်ကြာလာသည်နှင့်အမျှ ပြည်သူများ အခက်ခဲဖြစ်လာပြီး အာဟာရ ချို့တဲ့သည်အထိ ဖြစ်ပွားနေကြောင်း ၎င်းတို့ထံမှ သိရသည်။
“ပိုက်ဆံ ဘယ်လောက်ရှိရှိ အများကြီးဝယ်လို့မရဘူး၊ ဆိုင်တွေအကုန်လုံး စစ်ကောင်စီက စည်းကမ်းထုတ်ထားတာ။ ဆေးပေးမဝယ်ဘူး၊ ဆန်တွေလည်း အဲလိုပဲ။ ပြည်သူတစ်ဦးကို ဆန်၂ ပြည် ၊ ဆီတစ်ပိဿာပဲ ဝယ်ခွင့်ပြုတယ်။ ဆေးလိပ်ဆိုလည်း လူတစ်ယောက်ကို ၁၀ လိပ်ပဲ ဝယ်ခွင့်ပေးတယ်” ဟုဒေသခံတစ်ဦးက ပြောသည်။
ယင်းအပြင် အသီးအရွက်များ၊ ကုန်ခြောက်များကိုလည်း မြို့အဝင်အထွက် ဂိတ်များတွင် စစ်ဆေးပြီး ၎င်းတို့ ကန့်သတ်ထားသည့် ကုန်များ ပါပါက ဂိတ်တွင် ပစ္စည်းသိမ်း၊ လူဖမ်း ပြုလုပ်ကြောင်း၊ ကျေးရွာဖက်တွင် နေထိုင်သည့် ဒေသခံများမှာ နေ့စဉ်နေ့တိုင်း ဈေးမလာနိုင်သည့်အတွက် ပိုမိုခက်ခဲကြောင်း ဒေသခံများက ပြောသည်။
“စိုက်မရပျိုးမရ ဝယ်မရပေါ့ အရမ်း ဒုက္ခရောက်တယ်” ဟု ဒေသခံတစ်ဦးက မဲခေါင်သို့ ပြောသည်။
တော်လှန်ရေးအဖွဲ့များအတွက် လိုအပ်သည့် ဆေးဝါး၊ လူသုံးကုန်နှင့် အစားအသောက်များ ဝယ်ယူပေးမည်ကို စိုးရိမ်သည့်အတွက် ယင်းကဲ့သို့ ကန့်သတ်ခြင်းဖြစ်ကြောင်း၊ စစ်ရေးတွင် အသာမရသည့်အတွက် ဖြတ်လေးဖြတ်စနစ်ကျင့်သုံးခြင်းဖြစ်ပြီး ပြည်သူလူထုကိုပါ ဒုက္ခရောက်စေကြောင်း ဒေသခံများက ပြောသည်။
ထို့ပြင် ဆီဆိုင်မြို့ဝင်ဂိတ်တွင် စိုက်ပျိုးရေးအတွက် ဝယ်လာသော မြေဩဇာအိတ်များကို ဂိတ်များတွင် ဖောက်စစ်ခြင်း၊ ခရီးသွားများကို အချိန်ကြာစစ်ဆေးခြင်းလည်း ပြုလုပ်နေကြောင်း ဒေသခံများထံမှ သိရသည်။
ဆီဆိုင်၌ တိုက်ပွဲအခြေအနေ ငြိမ်သွားပြီးနောက် စီးပွားရေး၊ စိုက်ပျိုးရေးလုပ်ငန်းများ ပြန်လည် လည်ပတ်နေသော်လည်း စစ်ကောင်စီနှင့် PNO တို့၏ ကန့်သတ်မှုများကြောင့် ပြည်သူများ အခက်အခဲ ကြုံနေကြရကြောင်း ဒေသခံများထံမှ သိရသည်။
#MeKongNews
#ဆီဆိုင်
#စားသောက်ကုန်
#ကန့်သတ်
#စစ်ကောင်စီ
