မဲခေါင်၊ နိုဝင်ဘာ ၁၄

အသက် ၄၄ နှစ်အရွယ် စင်ကာပူနိုင်ငံသား ကျားဖြန့်ရာဇဝတ်သား ၂ ဦးဖြစ်သော အွန်ကွမ်ဝီးနှင့် ဆာ့ချ်ကျန်းဟိုတို့အား ထိုင်းနှင့် ကမ္ဘောဒီးယားရဲတပ်ဖွဲ့တို့မှ ဖမ်းဆီး လက်လွှဲပေးပြီးနောက် စင်ကာပူ ရဲတပ်ဖွဲ့က စတင် စွဲချက်တင်လိုက်ပြီဖြစ်ကြောင်း နိုဝင်ဘာ ၁၃ ရက်တွင် ထုတ်ပြန်ကြေညာခဲ့သည်။

၎င်းတို့ ၂ ဦးစလုံးကို နိုဝင်ဘာ ၁၁ ရက်တွင် ဖမ်းဆီးရမိခဲ့ခြင်းဖြစ်ကာ ထိုင်းရဲတပ်ဖွဲ့က ဘန်ကောက်တွင် အွန်ကွမ်ဝီးအား မြန်မာနိုင်ငံ မြ၀တီမြို့ KK Park ကျားဖြန့်ဝင်းမှ ထွက်ပြေးလာစဉ် ဘန်ကောက်၌ ဖမ်းမိ ခဲ့ခြင်းဖြစ်ကာ ဆာ့ချ်ကျန်းဟိုကိုလည်း ကမ္ဘောဒီးယားရဲတပ်ဖွဲ့က ဖမ်းဆီးပြီး စင်ကာပူသို့ လွှဲပြောင်းပေး အပ်ခဲ့ကြခြင်းဖြစ်သည်။

အွန်ကွမ်ဝီးသည် စင်ကာပူနိုင်ငံသားများကို ပစ်မှတ်ထားပြီး အစိုးရအကြီးအကဲများအဖြစ် ဟန်ဆောင် ကာ မြန်မာ KK Park ကျားဖြန့်ဝင်းအတွင်း စီမံခန့်ခွဲသူအကြီးအကဲတစ်ဦးအဖြစ် လိမ်လည်ခဲ့သူဖြစ်ကာ စင်ကာပူဘဏ်အကောင့်ကို မည်သူမှန်းမသိရသော အားဖန်ဆိုသည့် အမည်ဖြင့် ဧပြီလက လွှဲပြောင်း ပေးပြီး ငွေစာရင်းလိုက်ခံရမှုမှ လွတ်မြောက်ရန် ကြိုးစားခဲ့သူဟု သိရသည်။

၎င်းကို တင်ထားသည့် စွဲ ချက်အရ ထောင်ဒဏ် ၂ နှစ်နှင့် ဒဏ်ငွေ သို့မဟုတ် ပြစ်ဒဏ် ၂ ရပ်စလုံး ကျခံရနိုင်ကာ နိုဝင်ဘာ ၂၀ တွင် နောက်ထပ် တရားရုံး ရုံးချိန်းရက် သတ်မှတ်ခဲ့သည်။

ဆာ့ချ်ကျန်းဟိုသည်လည်း ကမ္ဘောဒီးယားကျားဖြန့် ရပ်ဝန်း ကရောင်ဘာဗတ်မှ စင်ကာပူ နိုင်ငံသားများကို ပစ်မှတ်ထားလိမ်လည်ခဲ့သူဖြစ်ပြီး စကားပြန် အဖြစ် ကမ္ဘောဒီးယားကျားဖြန့်လုပ်ငန်းသို့ သွားလုပ်ရာမှ တရားမဝင် ကျားဖြန့် လိမ်လည်ငွေများအား ၎င်း၏ ဘဏ်အကောင့်အတွင်းမှ လွှဲပြောင်းမှု ပြုလုပ်ခဲ့သည်ကို တွေ့ရကြောင်း၊ ဘဏ်စာရင်းထဲတွင် ၂၀၂၁ အောက်တိုဘာနှင့် ဒီဇင်ဘာလအတွင်းမှာပင် စင်ကာပူဒေါ်လာ ၄၇၆၁၆ ဝင်လာသည်ကို တွေ့ရ ကြောင်း၊ စွဲဆိုထားသည့် ပုဒ်မအရ ထောင်ဒဏ် ၃ နှစ်နှင့် စင်ကာပူဒေါ်လာ ၁၅၀၀၀၀ ထက်မပိုသော ငွေဒဏ် သို့မဟုတ် ပြစ်ဒဏ် ၂ ခုစလုံးချမှတ်ခံရနိုင်ကြောင်း သိရသည်။

၂၀၂၅ ခုနှစ် ပထမနှစ်ဝက်ကာလအတွင်း စင်ကာပူနိုင်ငံတွင် ကျားဖြန့် ငွေလိမ်ခံရမှုမှာ ၂၀၂၄ ခုနှစ် ပထမ နှစ်ဝက်ကထက် ၃ ဆ ကျော်ပိုများလာခဲ့ပြီး ၁၉၉ ဒသမ ၂ ရာခိုင်နှုန်း တိုးမြင့်လာခဲ့သည်။

၂၀၂၄ ပထမနှစ်ဝက် က ကျားဖြန့်လိမ်လည်ခံရသည့် အမှုပေါင်း ၅၈၉ ခုသာရှိခဲ့ရာမှာ ၂၀၂၅ ပထမနှစ်ဝက်တွင် ၁၇၆၂ မှုအထိ တိုးလာကာ ထို ၆ လတာကာလအတွင်းမှာပင် စင်ကာပူဒေါ်လာ ၁၂၆ ဒသမ ၅ သန်း လိမ်လည်ခံခဲ့ရသည်ဟု စင်ကာပူစီးပွားကူးသန်းဌာန ညွှန်ကြားရေးမှူး ဒေးဗစ်ချူးက ထုတ်ပြန်ပြောဆိုခဲ့သည်။

ကိုကလင်း
Ref: Asiaone
#MeKongNews
#စင်ကာပူ
#ကျားဖြန့်
#ကမ္ဘောဒီးယား
#မြန်မာ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)