မဲခေါင်၊ နိုဝင်ဘာ ၁၁
ကျိုင်းတုံမြို့တွင် ရှမ်းရွှေသံ သံရည်ကျိုစက်ဖွင့်လှစ်လိုက်ပြီးနောက် ဒေသတွင်း ကီလိုဒိုင်များမှ သံတိုသံစများသာမ အခြားကီလိုကောက်ပစ္စည်းများကိုပါ ပြည်မတင်ပို့ခွင့်ကို ပိတ်ပြီး လက်ဝါးကြီးအုပ်သည့်အတွက် ယင်းလုပ်ငန်းနှင့် ဆက်စပ်လုပ်ကိုင်သူများ အခက်အခဲဖြစ်နေကြောင်း ဒေသခံများထံမှ သိရသည်။
ယခုလဆန်းပိုင်းက အသစ်ဖွင့်လိုက်သည့် သံရည်ကျိုစက်က အခြား သံတိုသံစကီလိုကားများကို သယ်ခွင့်မပေးဘဲ ၎င်းစက်ရုံသို့သာ ပေးသွင်းရန် လက်ဝါးကြီးအုပ် လုပ်လာနေကြောင်း၊ စက်ရုံပိုင်ရှင်အမည်မှာ ဦးအိုက်ရှိန်ဆိုသူဖြစ်ပြီး တြိဂံစစ်တိုင်းမှ အရာရှိတစ်ဦး ရှယ်ယာပါသည့်အတွက် ယင်းကဲ့သို့ အမိန်အာဏာသုံးကာ ပိတ်ပင်ခြင်းဖြစ်ကြောင်း ကီလိုလုပ်ငန်း လုပ်ကိုင်သူများနှင့် နီးစပ်သူတစ်ဦးက ပြောသည်။
“သံရည်ကျိုစက်ရုံ ဖွင့်တာနဲ့ ကီလိုဆိုင်တွေရဲ့ကီလိုကားတွေကို ကျိုင်းတုံ-တောင်ကြီးအထွက် ကျိုင်းဖောင်းဂိတ်မှာ တိုင်းအမိန့်နဲ့ထွက်ခွင့်ပိတ်လိုက်ပါတယ်။ အဲဒီသံရေကျိုစက်ရုံ ရှယ်ယာက တိုင်းပေါ်က အရာရှိတစ်ဦးလည်း ပါတယ်ပြောပါတယ်။ ကီလိုဆိုင်တွေကလည်း နှစ်တိုင်း သက်ဆိုင်ရာအခွန်ကို ဆောင်ပြီးလုပ်ကြတာပါ။ အခုလို အာဏာသုံးပြီး ကားတွေထွက်ခွင့်ပိတ်လိုက်တာ အတော်လေးထိခိုက်နေကြပါတယ်”ဟု ၎င်းကမဲခေါင်သို့ ပြောသည်။
တြိဂံတိုင်းမှ လုပ်ငန်းရှင်တစ်ဦး သံရည်ကျိုစက်တွင် ရှယ်ယာပါသည့် ကိစ္စကို မဲခေါင်သတင်းဌာနမှ သီးခြားအတည်မပြုနိုင်သေးပေ။
သံတိုသံစအပါအဝင် ကီလိုကောက်လုပ်ငန်းမှ ပစ္စည်းများဖြစ်သည့် ကော်တိုကော်စများ၊ စက္ကူအဟောင်း၊ ပုလင်း၊ စာအုပ်၊ ဒန်ဘီယာဗူးခွံစသည့် ကုန်ပစ္စည်းများပါ ပို့ခွင့်မပြုတော့သည့်အတွက် ကီလိုကောက် လက်လုပ်လက်စားများ၊ ကီလိုလုပ်ငန်း လုပ်ကိုင်သူများ အခက်အခဲဖြစ်နေကြောင်း ယင်းလုပ်ငန်းနှင့် နီးစပ်သည့် ဒေသခံများက ပြောသည်။
ရှမ်းရွှေသံ သံရည်ကျိုစက်ရုံမှ သံတိုသံစများဝယ်သော်လည်း ပြည်မသို့ တင်ပို့သည့်ဈေးနှင့် နှိုင်းယှဉ်ပါက တစ်ပိသာလျင် ကားခနှုတ်ပြီး ကျပ် ၃၀၀ မှ ၅၀၀ ကွာခြားကြောင်း၊ ဈေးကွာသည့်အပြင် ပြည်မရှိ ကီလိုဒိုင်များမှ ငွေကြေထုတ်ပေးသည့်အတွက် ရှမ်းအရှေ့ ကီလိုလုပ်ငန်းအများစုမှာ ပြည်မသို့သာ တင်ပို့လိုကြောင်း ကီလိုလုပ်ငန်းနှင့် နီးစပ်သူတစ်ဦးက ပြောသည်။
“သူ့ဆီဘဲ သံတွေသွင်းရမယ်တဲ့။ ဆိုင်တွေ တော်တော်လေး ဒုက္ခရောက်နေပါတယ်။ တခြားမြို့ အေးသာယာစက်မှုဇုံတို့၊ ရန်ကုန်က စက်ရုံတို့လဲရှိပါတယ်၊ အခုလို မြို့ဂိတ်ကို ပိတ်ပြီးဝယ်တာ မရှိပါဘူး။ ကိုယ်ကြိုက်တဲ့ဆီ ရောင်းလို့ရပါတယ်။ အခုမှ ဖွင့်ပြီး ဒီလိုမြို့ဂိတ်ကိုပိတ်ပြီးဝယ်တယ်ဆိုတာ အရမ်းနစ်နာနေပါတယ်” ဟု ၎င်းကပြောသည်။
သံတိုသံစ၊ ကပ်ထူ ကီလို ကောက်ယူသွင်းသည့် အခြေခံ လုပ်ငန်းလိုအပေါ်တွင် ယခုလို အနိုင်ကျင့်ပြီး လက်ဝါးကြီးအုပ်လုပ်မည့်အစား ဈေးပြိုင်ပေးပြီး သံတိုသံစဝယ်ယူကာ အခြားပစ္စည်းများကို ယခင်ကလိုပင် လွတ်လပ်စွာ ရောင်းဝယ်ခွင့်ပြုစေလိုကြောင်း ဒေသခံများထံမှ သိရသည်။
#MeKongNews
#ရှမ်းရွှေသံ
#ကျိုင်းတုံ
#သံရည်ကျိုစက်ရုံ
#ကီလိုလုပ်ငန်း
