မဲခေါင်၊ နိုဝင်ဘာ ၇
စားနပ်ရိက္ခာနှင့် ဝင်ငွေရလမ်းကြောင်းများကို စစ်ကောင်စီက ပစ်မှတ်ထားတိုက်ခိုက်လာသည့်အတွက် ကရင်နီပြည်နယ်တွင် လူထုနှင့်စစ်ဘေးရှောင်များ ဝင်ငွေရရှိမှုရပ်တန့်ခြင်းနှင့် မိသားစု စားဝတ်နေရေး ဖြေရှင်းရန် စိန်ခေါ်မှုများ ရင်ဆိုင်ခံစားနေရခြင်းကြောင့်အနာဂတ်တွင် အငတ်ဘေး ကြုံတွေ့လာနိုင်သည်ဟု ကရင်နီလူ့အခွင့်အရေးအဖွဲ့ – KnHRG က နိုဝင်ဘာလ ၅ရက်တွင် ထုတ်ပြန်သည်။
လွိုင်ကော်၊ ဒီးမော့ဆို၊ မိုးဗြဲတွင် တိုက်ပွဲများ ဆက်တိုက်ဖြစ်နေပြီး အဓိကစိုက်ပျိုးဧရိယာအနီးတွင် ရောက်ရှိနေသည့် စစ်ကောင်စီသည် စိုက်ပျိုးမြေပေါ်တွင် ပြည်သူများ စိုက်ပျိုး၍ မရအောင်လုပ်ဆောင်ခြင်း၊ စိုက်ပျိုးထားသည့် သီးနှံများကို သွားရောက်ရိတ်သိမ်းသည့်အခါ ပစ်ခတ်သတ်ဖြတ်ခြင်းများ လုပ်ဆောင်ကြသည်ဟု ကရင်နီလူ့အခွင့် အရေးအဖွဲ့- KnHRG ပြောရေးဆိုခွင့်ရှိသူ ကိုဗညားက ပြောသည်။
“ဒါကပြည်သူတွေရဲ့ စားနပ်ရိက္ခာအိုးကို ခွဲတာဖြစ်တယ်။ အခြားတဖက်မှာလည်း ပြည်နယ်အတွင်းကို ဝင်ရောက် လာနိုင်မယ့် စားနပ်ရိက္ခာလမ်းကြောင်းတွေ၊ စီးပွားရေးလမ်းကြောင်းတွေကို စစ်ကောင်စီက ပိတ်ဆို့ထားတာတွေ ကြုံရတယ်။ နိုင်ငံတကာအကူအညီကလည်း ထင်ထားတာထက်ပိုပြီး နည်းတဲ့ဟာကို ကြုံရတယ်။ စိုက်ပျိုးနိုင်မှု ပမာဏကလည်း လျော့ကျလာတယ်။ အဲ့ဒါကြောင့် အငတ်ဘေးကြုံတွေ့လာနိုင်ဖို့ အခြေအနေဖန်တီးလာနေသလို ဖြစ်နေပါတယ်”ဟု ၎င်းကပြောသည်။
အောက်တိုဘာလအတွင်း လူထုနှင့်စစ်ရှောင်များ၏ စိုက်ပျိုးသီးနှံများကို မရိတ်သိမ်းနိုင်စေရန်နှင့် စားနပ်ရိက္ခာများ ပြတ်လတ်စေရန် စစ်ကောင်စီက ရည်ရွယ်ချက်ရှိရှိဖြင့် စိုက်ကွင်းများသို့ လက်နက်ကြီးများပစ်ခတ်ခြင်း စိုက်ပျိုးသီး နှံရိတ်သိမ်းနေသောပြည်သူများအား ဒရုန်းဗုံးသီးအသုံးပြုတိုက်ခိုက်ခြင်းများ ပြုလုပ်ခဲ့ကြောင်းဒေသခံများထံမှ သိရသည်။
ယင်းသို့ တိုက်ခိုက်မှုကြောင့်လည်း ပြည်သူလူထုများ ထိခိုက်သေဆုံးမှုရှိနေသည်ဟု KnHRG က ပြောသည်။
အောက်တိုဘာလအတွင်း စစ်ကောင်စီ၏ တိုက်ခိုက်မှုကြောင့် ကရင်နီပြည်သူ ၂၁ ဦး ထိခိုက်ဒဏ်ရာရရှိပြီး ၇ ဦး သေဆုံးခဲ့ရသည်ဟု KnHRG ၏ ထုတ်ပြန်ချက်တွင် ဖော်ပြထားသည်။
ယင်းထိခိုက် သေဆုံးခဲ့ရသည့် ကရင်နီပြည်သူများတွင် အမျိုးသား ၁၃ ဦး ၊ အမျိုးသမီး ၅ ဦး ၊ ကလေး ၆ ဦးနှင့် ကျား/ မ မသိရသူ ၄ ဦးပါဝင်သည်ဟု ကြေညာချက်တွင် ဖော်ပြထားသည်။
ထို့ပြင် ကရင်နီပြည်နယ်ရှိ စိုက်ပျိုးရေးဧရိယာများသို့ စစ်ကောင်စီက အင်အားအလုံးအရင်းဖြင့် စစ်ကြောင်းထိုးနေခြင်းကြောင့် စိုက်ပျိုးသီးနှံ စိုက်ပျိုးမှုလျော့နည်းလာပြီး လုံခြုံရေးအန္တရာယ်များကြောင့် သီးနှံများအားလုံး မရိတ်သိမ်းနိုင်သည့် အခြေအနေကိုလည်း ရင်ဆိုင်နေရသည်။
စစ်ကောင်စီနှင့် လက်အောက်ခံ PNO ပြည်သူ့စစ်တို့၏ စစ်ကြောင်းထိုးလာမှုကြောင့် ဇူလိုင်လ နှင့် သြဂုတ်လ အတွင်းပြည်သူ ၂၀၀၀၀ ခန့်နေရပ်စွန့်ခွာထွက်ပြေးခဲ့ရသည်ဟု KnHRG ကဆိုသည်။
#MeKongNews
#ကရင်နီ
#အငတ်ဘေး
#စစ်ကောင်စီ
#ပစ်မှတ်ထားတိုက်ခိုက်
