မဲခေါင်၊ နိုဝင်ဘာ ၆
တန်ဆောင်မုန်းလပြည့်ညတွင် နေအိမ်သို့ ကြက်လာခိုးသည့် အမျိုးသားတစ်ဦးကို ရိုက်နှက်သတ်ဖြတ်ခဲ့မှုဖြင့် ပြည်သူ့ရှေ့ဆောင်ပါတီ – PPP ၏ ရှမ်းပြည်တောင်ပိုင်း၊ တောင်ကြီးမြို့နယ်၊ အေးသာယာ တိုင်းဒေသကြီး လွှတ်တော်ကိုယ်စားလှယ်လောင်း ဦးစိုင်းရွှေထီးနှင့် သားဖြစ်သူ စိုင်းကျော်စိုးမိုးတို့ကို အေးသာယာရဲစခန်းက ဖမ်းဆီးလိုက်ကြောင်း မြို့ခံများထံမှသိရသည်။
နိုဝင်ဘာ ၄ ရက်၊ တန်ဆောင်မုန်းလပြည့်ည ၈ နာရီခွဲခန့် တွင်အေးသာယာမြို့၊ ရပ်ကွက်- ၁ နယ်မြေ -၂ နေသူ လောတာ(ခ) စိုင်းထွန်းဆာဆိုသူက မြောက်ဘက်ခြံချင်းကပ် ဦးစိုင်းရွှေထီး နေအိမ်ရှိ မန်ကျည်းပင်ပေါ်အိပ်တန်း ဝင်နေသည့် ကြက်များအား ခိုးယူစဉ် ဦးစိုင်းရွှေထီး၊ သားဖြစ်သူစိုင်းကျော်စိုးမိုးတို့ နှင့် အပြန်အလှန် စကားများကြရာမှရိုက် နှက်ခဲ့ကြခြင်းဖြစ်ကြပြီး ၅၂နှစ်အရွယ် စိုင်းထွန်းဆာမှာ ဦးစိုင်းရွှေထီး နေအိမ်ရှေ့ ကွန် ကရစ်ရေမြောင်းပေါ်တွင် ပက်လက်အနေအထားဖြင့် နဖူးပေါက်ပြဲသွေးထွက် ဒဏ်ရာများဖြင့်လဲကျသေ ဆုံးခဲ့ရကြောင်း ဒေသခံတစ်ဦးက မဲခေါင်သို့ ပြောသည်။
“သေသူကလည်း အပျော်ချက်စားဖို့လုပ်ရင်း အပျော်ကလည်းအပျက်ဖြစ်၊ သတ်သူတွေကလည်း ဒေါသကြောင့် လူသေရတာ၊ ခြံထဲမှာပွဲချင်းပြီး ရိုက်သတ်ခံရတာ၊ ရဲဖမ်းသွားပြီ” ဟု ၎င်းကပြောသည်။
လက်ရှိတွင် ဦးစိုင်းရွှေထီး ၅၈ နှစ်နှင့် ၎င်း၏ သား စိုင်းကျော်စိုးမိုး ၃၄နှစ် တို့ကို အေးသာယာနယ်မြေ ရဲစခန်းက ဖမ်းဆီးပြီး လူသတ်မှုပုဒ်မများဖြင့် အမှုဖွင့်ထားကြောင်း ဒေသခံများထံမှ သိရသည်။
ဦးစိုင်းရွှေထီးသည်စစ်ကောင်စီက ကျင်းပမည့် အတုအယောင်ရွေးကောက်ပွဲတွင် အေးသာယာ မဲဆန္ဒနယ်-၁ ပြည်နယ်လွှတ်တော်ကိုယ်စားလှယ်နေရာသို့ ပြည်သူ့ရှေ့ဆောင်- PPP ပါတီမှ ဝင်ရောက် ယှဥ်ပြိုင် အရွေးခံ မည့်ကိုယ်စားလှယ်လောင်း ဖြစ်သည်။
“အမတ်လောင်းတစ်ဦးဟာ လွယ်လွယ်နဲ့ လက်လွတ်စပယ် ဥပဒေမဲ့ပြုကျင့်တာကတော့ အလွန်အံ့ဩဖို့ ကောင်းပါတယ်။ အမတ်လောင်းတွေမှာ ဘာမှနားမလည်၊ စာနာမှုမရှိတဲ့ လူတွေဘယ်လောက်တောင်ပါနေမလဲ။ အဲ့လူခိုးတာကလည်း လပြည့်ညလေ၊ အဲဒီညကခိုးရင် ကျွန်တော်တို့ဘက် (ဒေသ)မှာ အပြစ်မရှိပါဘူး။ အဲဒီနေ့ကခိုးစားကြတာအစဥ်အလာပဲ။ ဒါပေမယ့် ခုကဘယ်လိုစိတ်နဲ့ ရိုက်သတ်ရက်တာလဲတော့ မပြောတတ်ဘူး” ဟု ဒေသခံတစ်ဦးက မဲခေါင်သို့ ပြောသည်။
ဦးစိုင်းရွှေထီးနှင့်သားဖြစ်သူတို့၏ ရိုက်နှက်မှုကြောင့်စိုင်းထွန်းဆာမှ နဖူးပေါက်ပြဲဒဏ်ရာ၊ ခြေသလုံး ညိုမဲဒဏ်ရာနှင့် ညာဘက်တင်ပါး ဖူးရောင်ညိုမဲ ဒဏ်ရာတို့ဖြင့် ပွဲချင်းသေဆုံးခဲ့ကြောင်း သိရသည်။
ယင်းဖြစ်စဉ်အပေါ် PPP ကလည်းအတည်ပြုပြီး လွှတ်တော်ကိုယ်စားလှယ်လောင်းမှာ ဥပဒေအထက်တွင်မရှိကြောင်းနှင့် ဥပဒေအတိုင်းပြစ်ဒဏ် ခံယူရမည်သာဖြစ်ကြောင်း ပါတီပြောရေးဆိုခွင့်ရှိသူ ဒုဥက္ကဌ ဦးစောဟန်အေးကဆိုသည်။
“ဟုတ်ပါတယ်။ သူ့အိမ်ကကြက်ခိုးတော့ ခြေလွန်လက်ဖြစ်သွားတယ်။ ဒါကသူ့ရဲ့ Personal ကိစ္စဖြစ်ပါတယ်။ တရားဥပဒေက အရေးယူသွားမှာပါ။ အခုလည်းအရေးယူပါပြီ။ ကျန်တဲ့ကိစ္စတော့ ဒီအတိုင်းဘဲ ဆက်လက်ဆောင်ရွက်သွားမှာပါ” ဟု ၎င်းက ပြောသည်။
လက်ရှိတွင် ဦးစိုင်းရွှေထီးနှင့်သားဖြစ်သူကို တာဝန်ရှိသူများက ဖမ်းဆီးထားပြီးရာဇသတ်ကြီးပုဒ်မ- ၃၀၂/၁၁၄ ပုဒ်မတို့ဖြင့်အရေးယူထားကြောင်းသိရသည်။
#MeKongNews
#တောင်ကြီး
#PPP
#ကိုယ်စားလှယ်လောင်း
#လူသတ်မှု
