မဲခေါင်၊ အောက်တိုဘာ ၂၀
စစ်တပ်က ရှမ်းပြည်မြောက်ပိုင်း၊ ကျောက်မဲမြို့နယ်နှင့် နမ့်ဆန်မြို့နယ်တို့တွင် အောက်တိုဘာလ ၁၈ရက် ညပိုင်းက လေယာဥ်နှင့် ဗုံးကြဲရာ ကလေးငယ်တစ်ဦးနှင့် သံဃာတစ်ပါး အပါအဝင် ပြည်သူ ၇ ဦးသေဆုံးကြောင်း ဒေသပြည်သူများထံမှ စုံစမ်းသိရှိရသည်။
အောက်တိုဘာ ၁၈ရက်နေ့ည ၈ နာရီ ၄၅ မိနစ်အချိန်ခန့်တွင် TNLA ထိန်းချုပ်ထားသည့် နမ့်ဆန်မြို့နယ်၊ ကွမ်ဟယ်ကျေးရွာသို့ စစ်တပ်ကလေယာဉ်ဖြင့် ကျေးရွာ အလယ် လူနေအိမ်များပေါ်သို့ ဗုံးကြဲချခဲ့ရာ ဗုံးပေါက်ကွဲမှုကြောင့် ကလေးငယ်တစ်ဦး အပါအဝင် ပြည်သူ ၆ ဦးသေဆုံးခဲ့ကြောင်း၊ ဒဏ်ရာရရှိသူ ၈ ဦးနှင့် အိမ်၁၀လုံးကျော်ပျက်စီးကြောင်း ဒေသခံများထံက သိရှိရသည်။
“ရွာလယ်က လက်ဖက်ခြောက် အခြောက်ခံစက်ရုံနားကိုကျတာ”ဟု ဒေသခံတစ်ဦးက ပြောသည်။
အလားတူ အောက်တိုဘာလ ၁၈ရက် ညပိုင်း ၈ နာရီ ၄၀ မိနစ်ဝန်းကျင်တွင် စစ်တပ်ပြန်လည်ထိန်းချုပ်ထားသည့် ကျောက်မဲမြို့နယ်၊ မိုင်းငေါ့၊ နမ့်မန်ကျေးရွာဘုန်းကြီးကျောင်းကို စစ်တပ်က လေယာဉ်ဖြင့် ပေါင် ၅၀၀ ဗုံးကြဲချခဲ့ရာ သံဃာတော်တစ်ပါး ထိခိုက် ပျံလွန်တော်မူသွားပြီး ဘုန်းကြီးကျောင်းမှာလည်း ပျက်စီးသွားကြောင်း သိရှိရသည်။
“ဆရာတော်က ဒဏ်ရာပြင်းထန်လို့ ဆေးကုဖို့လုပ်တုန်း ပျံလွန်တာလို့သိရတယ်”ဟု ကျောက်မဲမြို့ ၈ ရပ်ကွက်နေသူတစ်ဦးက မဲခေါင်သို့ပြောသည်။
စစ်ကောင်စီသည် နောင်ချို၊ ကျောက်မဲ၊ သီပေါမြို့တို့ကို TNLA လက်မှ ပြန်လည်ထိန်းချုပ်နိုင်သည်ဆိုသော်လည်း မြို့နယ်ဧရိယာများအတွင်း လေယာဥ်ဖြင့် အများပြည်သူနေအိမ်များ၊ သံဃိက အဆောက်အဦများကို ဗုံးကြဲတိုက်နေဆဲဖြစ်သည်။
သီပေါမြို့နယ်အတွင်း မြေပြင်စစ်ကြောင်းများက နမ္မတူမြို့ဘက်သို့ ဆက်လက်ထိုးစစ်ဆင်နေပြီး ယခင် ခလ၂၃ ရှိသည့်နေရာသို့ အောက်တိုဘာလ ၁၈ရက်ညနေပိုင်းက စစ်ကောင်စီတပ်များရောက်ရှိနေသည်ဟု မြေပြင်သတင်းများအရ သိရသည်။
စစ်ကောင်စီက ရှမ်းပြည်မြောက်ပိုင်းဏှိ ၎င်းလက်လွှတ်ဆုံးရှုံးခဲ့ရသည့် နယ်မြေများကို ပြန်လည်သိမ်းပိုက်ရေး ထိုးစစ်ဆင်များ ဆင်နွှဲနေပြီးနောက် ပြည်သူများနေထိုင်သည့် ကျေးရွာများကို လေကြောင်းတိုက်ခိုက်မှုများ ဆက်တိုက် လုပ်ဆောင်နေသဖြင့်ပြည်သူများ ထိခိုက်သေဆုံးမှုများ တောက်လျှောက်ဆိုသလိုဖြစ်ပွားလျက်ရှိကြောင်း TNLA ၏ သတင်းထုတ်ပြန်ချက်အရ သိရှိရသည်။
#MeKongNews
#စစ်ကောင်စီ
#ဗုံးကြဲ
#ကျောက်မဲ
#နမ့်ဆန်
