မဲခေါင်၊ စက်တင်ဘာ၂၅

TNLA ထိန်းချုပ်နေဆဲမြို့များဖြစ်သည့် ရှမ်းပြည်မြောက်ပိုင်းမှ ကျောက်မဲနှင့် သီပေါမြို့များတွင် စစ်ကောင်စီတပ်မှ သတင်းရယူရန် စေလွှတ်ထားသည့် စစ်ဘက်ရေးရာလုံခြုံရေးတပ်ဖွဲ့(စရဖ)နှင့် သတင်းပေး(ဒလန်)၁၀ ဦးကျော်တို့ကို TNLA မြို့နယ်ရဲတပ်ဖွဲ့နှင့် ဌာနဆိုင်ရာတို့မှ ပူးပေါင်းပြီး ရှောင်တခင် စစ်ဆေးမှုများ ဆောင်ရွက်စဥ် ဖမ်းဆီးရမိခဲ့သည် ဟု ယနေ့စက်တင်ဘာ၂၅ရက်မှာ TNLA သတင်းနှင့် ပြန်ကြားရေးဌာနက ထုတ်ပြန်သည်။

၎င်းတို့သည် စစ်ကောင်စီ ပြန်လည်ထိန်းချုပ်နေသည့် လားရှိုးမြို့ရှိ စစ်ကောင်စီတပ်၊ TNLA အုပ်ချုပ်သော မြို့နယ်များအတွင်းရှိ TNLA ၏ ဂိတ်နေရာများ၊ ဂိတ်တွင်းရှိ လူအင်အား၊ လက်နက်အင်အားများ၊ ဌာနဆိုင်ရာအင်အားများ၊ တပ်စခန်းနေရာများ၊ လူစုလူဝေးများသည့် နေရာများကို သတင်းရယူပြီး လေကြောင်း ပစ်ခတ်မှုပြုလုပ်သွားပြီးနောက်တွင် ထိရောက်မှုရှိမရှိကို စုံစမ်းထောက်လှမ်းရယူခဲ့ခြင်းများ ပြုလုပ်နေသည်ဟု ဖော်ပြထားသည်။

ယင်းလုပ်ငန်းများအပြင် စစ်ကောင်စီတပ် လွယ်ကူစွာဝင်ရောက်နိုင်မည့် လမ်းနှင့် ထောက်ပို့လမ်းကြောင်း အခြေအနေများကိုလည်း အဓိကထောက်လှမ်းပြီး သတင်းပေးပို့ခဲ့သည်ဟု ပြောသည်။

၎င်းတို့သည် သတင်းများရယူရာတွင် မြို့အတွင်းသို့ လမ်း‌လျှောက်၍သော် လည်းကောင်း၊ ဆိုင်ကယ်ဖြင့်၊ လိုင်းကား၊ အိမ်ကားများ အသုံးပြုခြင်းတို့ဖြင့်သော်လည်ကောင်း၊ သူဌေးယောင်၊ သူတောင်းစားယောင်၊ ခရီးသွားယောင်ဆောင်၍သော်လည်းကောင်း ပုံစံအမျိုးမျိုးဖြင့် ဝင်ရောက်ပြီး သတင်းများ ထောက်လှမ်းယူခဲ့သည် ဟု ဖော်ပြထားသည်။

၎င်းတို့အချင်းချင်း ဆက်သွယ်မှုပြုလုပ်ရာတွင်လည်း လက်ဟန်အမူအရာ၊ လက်ဖက်ရည်ဆိုင်၊ လမ်းဘေးကွမ်းယာဆိုင်နှင့် လူရှင်းသည့်နေရာများတွင် လူချင်းတွေ့ပြီး တစ်ဦးနှင့် တစ်ဦးသတင်းပေးပြီး စစ်ကောင်စီတပ်ထံ အွန်းလိုင်းပလက်ဖောင်းဖြစ်သည့် Viber/ Facebook/ Wechat/ Telegram များဖြင့် သတင်းပေးပို့ခဲ့ကြသည်ဟု ပြောသည်။

လက်ရှိဖမ်းဆီးရမိသူများကို လုံခြုံစိတ်ချသည့်နေရာတွင် ကောင်းမွန်စွာထိန်းသိမ်းထားပြီး ပြစ်မှုကျူးလွန်ကြောင်း ထင်ရှားပေါ်လွင်ပါက TNLA ဥပဒေနှင့်အညီ အရေးယူသွားမည်ဖြစ်သည်ဟု PSLF/TNLA သတင်းနှင့် ပြန်ကြားရေးဌာနက ထုတ်ပြန်ထားသည်။

#MeKongNews
#TNLA
#ဒလန်
#စစ်ကောင်စီသတင်းပေး
#ကျောက်မဲ
#သီပေါမြို့
#ဖမ်းဆီးအရေးယူ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)