မဲခေါင်၊ သြဂုတ် ၃၀
စစ်မှုထမ်းလူသစ် အများစု ပါဝင်ပြီး ကရင်နီပြည်နယ်၊ ဒီးမော့ဆိုမြို့နယ်၊ ငွေတောင်ရွာသစ်တွင်အင်အား ၁၀၀ ကျော်ဖြင့် တပ်စွဲထားသည့် စစ်ကောင်စီတပ်အား ရှမ်းတောင်၊ ကရင်နီ တော်လှန်ရေးတပ်ပေါင်းစုများ ပူးပေါင်းတိုက်ခိုက်မှုကြောင့် စစ်တပ်ဘက်မှ ၁၅ ဦးထက်မနည်းသေဆုံးပြီး သေနတ်၆လက် ရရှိခဲ့ကြောင်း ရှမ်းတောင်၊ ကရင်နီစစ်တိုင်း ဗျူဟာအမှတ် ၁၁ က ဩဂုတ်လ ၃၀ ရက် ညနေပိုင်းတွင် ထုတ်ပြန်သည်။
သြဂုတ်လ ၂၉ ရက်၊ နံနက် ၁၀နာရီမှစတင်တိုက်ပွဲဖြစ်ပွားခဲ့ရာ တိုက်ပွဲအတွင်း စစ်ကောင်စီဘက်မှ ၁၅ ဦး ထက်မနည်းသေဆုံးပြီး ၃၀ကျော်ခန့် ထိခိုက်ဒဏ်ရာရရှိခဲ့ကြောင်း၊ တော်လှန် ရေးတပ်ပေါင်းစုဘက်မှ ၂ ဦး မစိုးရိမ်ရသည့် ထိခိုက်ဒဏ်ရာရကြောင်း ဗျူဟာအမှတ် ၁၁ ဗျုဟာမှူး နတ်ဆိုးက မဲခေါင်သို့ ပြောသည်။
တိုက်ပွဲအတွင်းရန်သူ့လက်နက် MA-1 ၄ လက်၊ MA-2 တစ်လက် နှင့် MA-3 တစ်လက် စုစုပေါင်း (၆) လက်နှင့် ခဲယမ်းအချို့ကို သိမ်းဆည်းရရှိခဲ့ကြောင်း ၎င်းက ပြောသည်။
“လူသစ် ပစ တွေများတယ်။ လူဟောင်းက နဲနဲပဲပါတယ်။ သူတို့က လမ်းပြင်ရင်းစစ်ကြောင်းထိုးလာတာ၊ ကျနော်ဦးဆောင်ပြီး ရွာထဲဝင်တိုက်တာ၊ ထွက်ပြေးကုန်တာ ပြန်ခံပစ်တာနည်းတယ်”ဟု ဗျူဟာမှူးနတ်ဆိုးက မဲခေါင်သို့ ပြောသည်။
ယင်းတိုက်ပွဲတွင် ရှမ်းတောင် ၊ ကရင်နီ စစ်တိုင်းဗျူဟာ(၁၁) နှင့် ကရင်နီပြည်နယ်ရှိ တပ်ပေါင်းစုများက ပူးပေါင်းပါဝင် တိုက်ခိုက်ခဲ့ကြပြီး ဒရုန်းတပ်ဖွဲ့များဖြစ်သည့် ရှမ်းတောင် ဒရုန်းတပ်ဖွဲ့ ၊ ဗျူဟာ (၁၁) ဒရုန်းတပ်ဖွဲ့ ၊ DMO Local ဒရုန်းတပ်ဖွဲ့၊ UAV ဒရုန်းတပ်ဖွဲ့ နှင့် KNA ဒရုန်းတပ်ဖွဲ့တို့က ပူးပေါင်းပါဝင် တိုက်ခိုက်ခဲ့ခြင်းဖြစ်ကြောင်း သိရသည်။
တော်လှန်ရေးတပ်ပေါင်းစုဘက်မှာ ကျားတက်ထိုးရာတွင် စစ်ကောင်စီဘက်မှ သေနတ်မောင်းပင်မတင်နိုင်သူများ၊ သေနတ်ချပြီး ထွက်ပြေးသူများပင်ရှိကြောင်း အခြားရှေ့တန်းသတင်းရင်းမြစ်တစ်ဦးက ပြောသည်။
“ကရင်နီအင်အား ၂၀၀ ခန့် ညာသံပေးပြီးကျားတက်ထိုးတော့ သေနတ်မောင်းမတင်နိုင်သူရှိတယ်။ သေနတ်ပစ်ချပြီး ထွက်ပြေးသူများတယ်။ ခံပစ်သူနည်းပါတယ်။ တဝင်းပူမျဉ်းစောင်းတွေက ဆရာကြီးတွေလုပ်ပြီး ၂နှစ်သားစစ်သည်တွေဆိုတာ တိုက်ပွဲအတွေ့ကြုံနည်းတော့ တိုက်ပွဲဖြစ်တာနဲ့ ပြေးကြတာ။ ဒီးမော့ဆိုမြို့ သိမ်းနိုင်ပြီဆိုပြီး လိုင်းပေါ်မှာစစ်တပ်ကကြွားလုံးထုတ်ပေမယ့် မြေပြင်မှာတော့ စစ်တပ်အင်အားအနည်းငယ်နဲ့ မြို့စောင့်ထားပြီး သံချပ်ကာကားကအစ လွိုင်ကော်ပြန်ဆုတ်ထားနေတာ” ဟု ၎င်းကပြောသည်။
ဒီးမော့ဆိုမြို့နယ်တဝိုက်တွင် စစ်ကောင်စီ၏ စစ်ရေးလှုပ်ရှားမှုများရှိနေသည့်အတွက် လွိုင်ကော်-ဒီးမော့ဆို-ဖရူဆို လမ်းမကြီးကို ရက်အကန့်အသတ်မရှိ ပိတ်ထားမည်ဖြစ်ကြောင်း KNDF က ဩဂုတ်လ ၁၀ ရက်နေ့တွင်ထုတ်ပြန်ထားသည်။
မဟာ
#MeKongNews
#ရှမ်းတောင်
#ကရင်နီ
#ဗျူဟာအမှတ်၁၁
#ဗျူဟာမှူး
#ဗျူဟာမှူးနတ်ဆိုး
