– ဦးဝင်းနိုင် (မိုးလေဝသပညာရှင်)
လာမည့် ရက်ပိုင်းအတွင်း ရှမ်းပြည် တောင်ပိုင်းရှိ မြို့အချို့တွင် ခရမ်းလွန်ရောင်ခြည် အညွန်းကိန်း မြင့်နေ၍ သတိထားရန် လိုပြီး ရှမ်းပြည်တဝှမ်းလုံးတွင် မိုးအသင့်အတင့် ရွာသွန်းနိုင်သည် ဟု ခန့်မှန်းထားသည်။
ဩဂုတ်လ ၂၉ ရက် ည သန်းခေါင်ကျော်၊ ၃၀ ရက်နေ့ နံနက် အစောပိုင်းက တောင်တရုတ်ပင်လယ်၌ ဖြစ်နေသည့် လေဖိအားနည်းရပ်ဝန်း Tropical Depression 20W(TWENTY) သည် အပူပိုင်းမုန်တိုင်း(Tropical Storm – TS)ဖြစ်လာပြီး အနောက်ဘက်ကို ဆက်လက်ရွေ့လျားနိုင်သည်။
ဩဂုတ်လ ၃၀ ရက် နေ့လည်ပိုင်းတွင် ဗီယက်နမ်ကမ်းခြေကို ဖြတ်ကျော်ဝင်ရောက်ကာ အနောက်ဘက်ကို ဆက်လက်ရွေ့လျား၍ ကုန်းတွင်းလေပွေလှိုင်းအဆင့်ကို အားလျော့သွားနိုင်ပါသည်။
လေပွေလှိုင်းနှင့် မုန်တိုင်း အကြွင်းအကျန် တိမ်တိုက်များသည် လာအိုနိုင်ငံတောင်ပိုင်းနှင့် ထိုင်းနိုင်ငံမြောက်ပိုင်းမှတဆင့် မြန်မာနိုင်ငံအရှေ့ပိုင်း ဖြစ်သည့် ကရင်နီပြည်တောင်ပိုင်း၊ ကရင်ပြည်နယ်မြောက်ပိုင်းနယ်စပ်အနီးမှ ဖြတ်သန်းဝင်ရောက်ကာပဲခူးတိုင်း၊ မန္တလေးတိုင်းတောင်ပိုင်း(နေပြည်တော်)၊ မကွေးတိုင်းနှင့် ရခိုင်ပြည်နယ်အထိ ဆက်လက်ရွေ့လျားဖြတ်သန်းသွားမည် ဖြစ်သည်။
ထိုကြောင့် မြန်မာနိုင်ငံတဝှမ်း မိုးအသင့်အတင့်မှ မိုးအလွန်များနိုင်ပြီး ဖေါ်ပြပါ ပြည်နယ်နှင့် တိုင်းဒေသများသည် ၇၂ နာရီအတွင်း မိုးရေချိန် ၃ လက်မ မှ ၁၀ လက်မအထက်အထိ နေရာကွက်၍ မိုးများနိုင်သည့်ဒေသများရှိနိုင်ကြောင်း ECMWF, ICON စ သည့် ကြိုတင်ခန့်မှန်းရေးမော်ဒယ် များက ခန့်မှန်းထားသည်။
ဩဂုတ်လ ၃၀ ရက်မှ စက်တင်ဘာလ ၅ ရက်အတွင်း မိုးရွာသွန်းနိုင်မည့် အခြေအနေ ခန့်မှန်းချက်
– ရှမ်းပြည်မြောက်ပိုင်းဒေသအချို့၊ မန္တလေးတိုင်းနှင့် ထိစပ်နေသည့် ရှမ်းပြည်တောင်ပိုင်းဒေသအချို့တွင် မိုးအသင့်ရွာသွန်းရရှိနိုင်ပြီး ကျန်ပြည်နယ်ဒေသအားလုံးတွင် မိုးနည်းနေနိုင်ပါမည်။
– ရှမ်းပြည်တခုလုံးတွင် နေ့စဉ်ပျမ်းမျှမိုးရေချိန် ၀.၅ လက်မဝန်းကျင် ရွာသွန်းနိုင်ပြီး ၀.၈ လက်မအထက် ပိုမိုရွာသွန်းနိုင်မည် မဟုတ်ပေ။
– ယခုတပတ်အတွင်း ရောက်ရှိလာနိုင်သည့် မုန်တိုင်းအကြွင်းအကျန် လမ်းကြောင်းပုံစံကြောင့် ရှမ်းပြည်တွင် မိုးများနိုင်ခြင်းမရှိ ဟု ခန့်မှန်းရသည်။
အပူချိန်၊ လေတိုက်နှုန်း၊ လေထုစိုထိုင်းဆနှင့် လေထုညစ်ညမ်းမှုအခြေအနေ
ရှမ်းပြည်အရှေ့ပိုင်းနှင့် မြောက်ပိုင်းတို့၏ အမြင့်ဆုံးနေ့အပူချိန်သည် ၃၀°C ရှိနိုင်ပြီး ရှမ်းပြည်တောင်ပိုင်း၏ အပူချိန်သည် ၂၄°C ရှိနိုင်သည်။
အနိမ့်ဆုံး ညအပူချိန်များ အနေနှင့် ရှမ်းပြည်မြောက်ပိုင်းတွင် ၂၁°C ၊ ရှမ်းပြည်အရှေ့ပိုင်းတွင် ၂၄°C နဲ့ ရှမ်းပြည်တောင်ပိုင်းတွင် ၁၈°C ရှိနိုင်ပါသည်။
ရှမ်းပြည်အတွင်း လေတိုက်နှုန်းအမြင့်ဆုံး တနာရီ ၁၀ မိုင်မှ ၁၅ မိုင်ခန့်အထိရှိနိုင်ပြီး လေထုစိုထိုင်းဆသည် ၈၀% မှ ၉၀% အတွင်းမှာ ရှိနိုင်ကာ ရှမ်းပြည်မြောက်ပိုင်းတွင် ခံစားရသည့် အပူချိန် (Temperature Felt) မှာ ၃၅°C အထိရှိနိုင်သည်။
ရှမ်းပြည်တောင်ပိုင်း တောင်ကြီး၊ ပင်လောင်း၊ ဆီဆိုင်၊ မောက်မယ် စသည့်မြို့များတွင် ဩဂုတ်လ ၃၁ ရက်နေ့ နံနက်ပိုင်း(၁၁ နာရီမှ ၁၂ နာရီအတွင်း) ခရမ်းလွန်ရောင်ခြည်အညွှန်းကိန်း(UV Index) 11 အထိ ရှိနေနိုင်တာကြောင့် ဖော်ပြပါအချိန်များအတွင်း နေရောင်ခြည်နှင့် တိုက်ရိုက်ထိတွေခြင်း၊ နေကို တိုက်ရိုက်ကြည့်ရှုခြင်းများ မပြုလုပ်သင့်ပေ။
#MeKongNews
#မိုးလေဝသခန့်မှန်းချက်
#ရှမ်းပြည်
#ဦးဝင်းနိုင်
#အပူပိုင်းမုန်တိုင်း
