မဲခေါင်၊ ဩဂုတ် ၂၈
တရားမဝင်ကုန်စည်သယ်ဆောင်သည်ဟုဆိုကာ ရှမ်းပြည် တောင်ပိုင်း၊ ဟိုပုံးမြို့တွင် ဖမ်းဆီးထားသည့် ကုန်တင်ယာဉ် အစီး ၆၀ ကျော်ကို စစ်ကောင်စီက ၅ လနီးပါးကြာသည့်အထိ မလွှတ်ပေးသေးကြောင်း အဖမ်းခံထားရသည့် ကုန်တင်ယာဉ်မောင်းများထံမှ သိရသည်။
ယာဉ်များကို ဖမ်းဆီးထားသည်မှာ အချိန် ၅လနီးပါး ရောက်လာပြီဖြစ်သည့်အတွက် ကိုယ်တိုင်လည်း စားဝတ်နေရေးကြပ်တည်းသလို မှီခိုနေသည့် မိသားစုများလည်း ကြပ်တည်းနေကြောင်း၊ အချိန်ကြာမြင့်စွာ ကုန်နှင့် ရပ်နားထားရသည့်အတွက် ကားတာယာဆွေးခြင်း၊ ဘက်ထရီ မကောင်းတော့ခြင်း၊ မိုးကာများ ဆွေးပြီး ကုန်စည်များ ပျက်စီးယိုယွင်းခြင်း စသည့် ပျက်စီးမှုများလည်း ကြုံနေရကြောင်း ကုန်တင်ယာဉ်ဖမ်းဆီးခံထားရသည့် ယာဉ်မောင်းတစ်ဦးက ပြောသည်။
“ခုဆို ၅ လထဲ ရောက်လာပါပြီခမျ။ ယာဉ်မှူးများမှာ အနေအထိုင်၊ အစားအသောက် ကြပ်တည်းစွာနဲ့ ၄ လကျော်ခဲ့ပါပြီခင်ဗျ။ ယာဉ်ပိုင်ရှင်များကလည်း စရိတ်မထုပ်ပေးနိုင်လို့ အခက်အခဲတွေနဲ့ ရင်ဆိုင်နေရပါတယ်။ တာဝန်ခံ ဂိတ်ပိုင်များကလည်း ယာဉ်မှူးများရဲ့ဖုန်းနံပါတ်တွေကို အလွတ်ရနေလို့ ဖုန်းခေါ်တိုင်း လုံးဝ လုံးဝမကိုင်တော့ပါဘူး” ဟု ၎င်းက ပြောသည်။
ယာဉ်မောင်းများအနေဖြင့် ယာဉ်ကို စိတ်မချသည့်အတွက် ယာဉ်နှင့်အတူ စောင့်ကြပ်နေထိုင်သော်လည်း အချို့ရက်များတွင် အာဏာပိုင်များက ယာဉ်နှင့်အတူ နေထိုင်ခွင့်မပြုကြောင်းလည်း ယာဉ်မောင်းများထံမှ သိရသည်။
ဩဂုတ်လ ၂ ရက်နေ့တွင် ဖမ်းဆီးထားသည့် ကုန်တင်ယာဉ်များကို ဟိုပုံးမြို့ ဝန်ထမ်းအိမ်ယာအနီးသို့ ပြောင်းရွှေ့ခိုင်းထားပြီး ဝန်ထမ်းအိမ်ယာဝန်းအတွင်းရှိ လမ်းသွယ်များတွင် အဆင်ပြေသလို ရပ်ထားရကြောင်း၊ မော်တော်ယာဉ်အတွက် ဂိတ်မှူးများကလည်း ဖြေရှင်းပေးခြင်း မရှိကြောင်း ယာဉ်မောင်းများက ပြောသည်။
ပြီးခဲ့သည့် ဧပြီလ ပထမပတ်နှင့် ဒုတိယပတ်တို့တွင် ရှမ်းပြည်အရှေ့ပိုင်း မိုင်းလားနှင့် တာချီလိတ်တို့မှ လာသည့် ကုန်တင်ယာဉ် အစီးရေ ၁၂၀ ခန့်ကို ဟိုပုံးတပ်နယ်တွင် ဖမ်းဆီးခဲ့ခြင်းဖြစ်ပြီး ယင်းထဲမှ အချို့မှာ ပြန်လွတ်ကာ အချို့ကို အဖမ်းပြခဲ့ပြီး ယခုအခါ အစီးရေ၆၀ ကျော် ကျန်ရှိနေခြင်းဖြစ်သည်။
#MeKongNews
#ဟိုပုံး
#ကုန်တင်ယာဉ်များ
#အဖမ်းခံရမှု
#ရှမ်းတောင်
#တရားမဝင်ကုန်စည်
