မဲခေါင်၊ သြဂုတ် ၂၅
ရှမ်းပြည်တောင်ပိုင်း၊ မိုးနဲမြို့၊ ပေါ်မိုင်းရပ်ကွက်တွင် မိုးနဲမြို့မရဲစခန်းမှူး ဒုရဲမှူးထွန်းမင်းထွန်း ကိုယ်တိုင် ရှယ်ယာပါဝင်နေသည့် ပိုက်ကျူးဝိုင်း လောင်းကစားငွေ ကျပ်သိန်းရာချီဆယ်ချီပြုလုပ်နေကြောင်း ဒေသခံများက မဲခေါင်သို့ သတင်းပေးပို့လာသည်။
ယင်းပိုက်ကျူးဝိုင်းကို ပေါ်မိုင်းရပ်ကွက်မှ ကြီးကွေ ခေါ် ဦးတင်ခိုင်ဆိုသူ၏ ခြံဝန်းအတွင်းရှိအဆောက်အအုံ၌ ပြုလုပ်နေခြင်းဖြစ်ကြောင်း၊ ယင်း ခြံဝန်းမှာ ဦးတင်ခိုင် ဆိုသူပိုင်သည့်မြေအပြင် အနီးရှိ ရှေးဟောင်းဘုရားကိုပါ ဖြိုဖျက်ပြီး ခြံခတ်ထားသည့် ဝန်းဖြစ်ကြောင်း ဒေသခံတစ်ဦးက ပြောသည်။
“အဲနေရာက ရှေးဟောင်းဘုရားတစ်ဆူကို သူ့သဘောနဲ့သူ ခြံဝန်းထဲပါလို့ဆိုပြီး ဖျက်ချပြီးမှ အဲဒီနေရာအပေါ်မှာအိမ်ဆောက်ထားတာ။ ဘုရားဖြိုတာက တစ်နှစ်လောက်ရှိပြီ။ ပိုက်ကျူးဝိုင်းကတော့ လပိုင်းလောက်ရှိပြီ” ဟု ၎င်းက ပြောသည်။
ယင်းနေရာမှာ မိုးနဲ အားကစားကွင်း ဘော်လုံးကွင်းတောင်ဘက်ရှိပြီး ရှေးဘုရားစေတီ ၄ ဆူ မှ ပေ ၂၀ လမ်းသာခြားသည့် စေတီကို အိမ်ခြံဝန်းအတွင်း ဖြိုချကာ အဆောက်အအုံဆောက်ထားခြင်းဖြစ်ကြောင်း သိရသည်။
“မိုးနဲဟာ ရှမ်းပုဂံလို့တောင် အမည်တွင်လို့ ရှေးဟောင်းအမွေအနှစ်ကို ထိမ်းသိမ်းရမယ့်အစား ဖြိုချဖျက်ဆီးပြီး အဲပေါ်မှာ လောင်းကစားလုပ်နေတာ လွန်လွန်းတယ်။ ပြီးတော့ စခန်းမှူးကိုယ်တိုင် ရှယ်ယာပါနေတာ။ ဥပဒေကို ဘယ်လို ထိန်းမလဲ” ဟု လွိုင်မြေရပ်နေသူတစ်ဦးက ဆိုသည်။
မကြာမီက ယင်းပိုက်ကျူးဝိုင်းတွင် ရှုံးနိမ့်သူ ခိုလန်မှ ကုလား ခေါ် ရှဖီး ဆိုသူမှာ ၎င်း၏ အိမ်စီးကားကို ထားခဲ့ရသည်အထိ အနိုင်အရှုံး များပြားကြောင်း သိရသည်။
ယင်း လောင်းကစားဝိုင်းတွင် ရဲစခန်းမှူးကိုယ်တိုင် ဒိုင်အနေဖြင့် ပါဝင်ကာ ကစားနေသလို ငါးဂိမ်းခုံ ၂ ခုံ နှင့်လည်း လောင်းကစားနေကြကြောင်း သိရပြီး ဒေသခံလူထုက မလိုလားသော်လည်း မတိုင်ရဲကြကြောင်း သိရသည်။
#MeKongNews
#မိုးနဲမြို့
#လောင်းကစားဝိုင်း
#ရှေးဟောင်းဘုရား
#မိုးနဲရဲစခန်းမှူး
#ရှမ်းတောင်
