မဲခေါင်၊ သြဂုတ် ၂၅
ဓာတုဆေးရည်များ တင်ဆောင်လာသည့် ၁၂ ဘီးယာဉ်တစ်စီး တာချီလိတ်-ကျိုင်းတုံလမ်း၊ ကျိုင်းတုံမြို့အဝင်ဖြစ်သည့် ပန်ကွဲတောင်အဆင်းတွင် ဘရိတ်ပေါက်ကာ ရှေ့မှ ၁၂ ဘီးကားကို ဝင်ရောက်တိုက်မိပြီး မီးလောင်ခဲ့ကြောင်း သိရသည်။
သြဂုတ်လ ၂၂ ရက်၊ မွန်းလွဲ ၁ နာရီခွဲခန့်တွင် ရှမ်းပြည်အရှေ့ပိုင်း၊ ကျိုင်းတုံ-တာချီလိတ်သွား ကားလမ်း မိုင်တိုင်အမှတ် ၄၀၄/၆ နှင့် ၇ အကြားတွင် ယာဉ်တိုက်မှု ဖြစ်ပွားပြီး လမ်းယာဘက်သို့ ထိုးကျတိမ်းမှောက်ကာ မီးလောင်ခြင်းဖြစ်ကြောင်း၊ လူ ၂ ဦးဒဏ်ရာရပြီး ယင်းထဲမှ လူနာတစ်ဦးမှာ ဓာတုဆေးရည်ထိထားကြောင်း မီးသတ်နှင့် ပရဟိတအဖွဲ့များထံက သိရသည်။
“၂ နာရီခွဲမှာ မီးငြိမ်းတယ်။ လူ ၂ ဦး ဒဏ်ရာရတယ်။ ကျိုင်းတုံဆေးရုံကို ပို့ပါတယ်။ ဓာတုဆေးရည်က ETHYL ACETATE ပါ” ဟု ပရဟိတအဖွဲ့ဝင်တစ်ဦးက ပြောသည်။
ယင်းပန်ကွဲတောင်အဆင်းမှာ ယာဉ်တိုက်မှု၊ ယာဉ်တိမ်းမှောက်မှုများ မကြာခဏဖြစ်လေ့ရှိပြီး ယခုတစ်ကြိမ်မှာ ထိခိုက်မှုနည်းပါးကြောင်း ကိုယ်တိုင်ကြုံတွေ့သူတစ်ဦးက ပြောသည်။
“အဲ့ပန်လော့အဆင်းက အမြဲဖြစ်နေတာ၊ ပွဲပေးလဲ မရဘူး။ ခုလည်း ကံကောင်းလွန်းလို့။ ကျွန်မတို့ ကားနဲ့သီသီလေးပဲလွတ်တာ။ ဘရိတ်ရူး ပေါက်တော့ ရှေ့က ၁၂ ဘီးကားနှစ်စီးကို ကျော်ပစ်တာ။ ကုန်းအဆင်းကြီးကို အဲ့ကားဆရာတော်တော် တော်ပါတယ်” ဟု အခင်းဖြစ်ချိန် ကိုယ်တိုင်သိမြင်ခဲ့သူတစ်ဦးက မှတ်ချက်ပြုသည်။
ယင်းပန်ကွဲတောင်အဆင်းသည် အဆင်းရှည်ပြီး မတ်စောက်သဖြင့် မကြာခဏ ကားများ ဘရိတ်ပေါက်ခဲ့ရာ ပြီးခဲ့သည့် မတ်လ ၂၀ ရက်က ကုန်ကားတိမ်းမှောက်သဖြင့် တစ်ဦးသေ၊ ၃ ဦး ဒဏ်ရာခဲ့သလို ၂၀၂၄ ခုနှစ်၊ ဇူလိုင်လ ၁၅ ရက်နေ့ကလည်း အိမ်စီးကားကို ကုန်ကားမှ ဝင်တိုက်သဖြင့် အိမ်စီးကားပေါ်တွင် စီးနင်းလိုက်ပါလာသည့် ကလေးငယ်များ အပါအဝင် အမျိုးသား ၄ ဦးနှင့် အမျိုးသမီး ၂ ဦး စုစုပေါင်း ၆ ဦး သေဆုံးခဲ့ကာ ကုန်တင်ယာဥ်မှ ယာဥ်မောင်းအပါအဝင် ၂ ဦးမှာ စိုးရိမ်ရဒဏ်ရာများ ရရှိခဲ့သည့်ဖြစ်စဥ်းများ ဖြစ်ပွားခဲ့သေးသည်။
#MeKongNews
#ရှမ်းအရှေ့
#ကျိုင်းတုံ
#ကားမှောက်
#ဓါတုဆေးဝါး
#ထိခိုက်ဒါဏ်ရာရ
