မဲခေါင်၊ သြဂုတ် ၁၆
အာဏာသိမ်းစစ်တပ်၏ ရွေးကောက်ပွဲကော်မရှင်က သြဂုတ်လ ၁၅ ရက်နေ့စွဲဖြင့် မဲဆန္ဒနယ်များထုတ်ပြန်လာရာ “ဝ”နှင့် မိုင်းလားဒေသများလည်း ပါဝင်လာခဲ့သည်။
စစ်တပ်ရွေးကောက်ပွဲကော်မရှင်က ကြေညာသည့် မဲဆန္ဒနယ်များတွင် “ဝ”တိုင်း နယ်မြေများဖြစ်သည့် ပန်၊ မိုင်းမော၊ ပန်ဝိုင်၊ နားဖန်၊ မက်မန်းနှင့် ပန်ဆန်း(ပန်ခမ်း)၊ မိုင်းလားနယ်မြေဖြစ်သည့် မိုင်းလားမြို့တို့ ပါဝင်လာခြင်းဖြစ်သည်။
“ဝ” ကိုယ်ပိုင်အုပ်ချုပ်ခွင့်ရတိုင်းနှင့် မိုင်းလားတို့ မဲဆန္ဒနယ်မြေများတွင် ပါဝင်သည်မှာ ယခုတစ်ကြိမ်မှသာ မဟုတ်ဘဲ ယခင်အကြိမ်များကလည်း ထည့်သွင်းကြေညာဖူးကြောင်း၊ နောက်ပိုင်းတွင်မှသာ ကျင်းပနိုင်ခြင်းမရှိသည့် နယ်မြေများတွင် ပြန်လည်ထည့်သွင်း ကြေညာခြင်းဖြစ်ကြောင်း ရှမ်းအရှေ့ နိုင်ငံရေးသမားတစ်ဦးက မဲခေါင်သို့ ပြောသည်။
“ဒါက အရင် ၂၀၁၀၊ ၂၀၁၅၊ ၂၀၂၀ တွေမှာလည်း ဒီလိုကြေညာတာပါဘဲ၊ နောက်မှ မကျင်းပဖြစ်ရင် အကြောင်းအမျိုးမျိုးပြပြီး မလုပ်ဖြစ်ကြောင်း ထပ်ထုတ်ပြန်ပါတယ်” ဟု ၎င်းကဆိုသည်။
၂၀၀၈ စာအုပ်စိမ်းပါ “ဝ” တိုင်းအဖြစ် သတ်မှတ်ထားသည့် ဟိုပန်၊ မိုင်းမော၊ ပန်ဝိုင်၊ နားဖန်၊ မက်မန်းနှင့် ပန်ဆန်း(ပန်ခမ်း) တို့တွင် ဟိုပန်မှအပ ရွေးကောက်ပွဲ ၃ ကြိမ်စလုံး ကျင်းပနိုင်ခြင်း မရှိသလို အထူးဒေသ – ၄ မိုင်းလားတွင်လည်း ၃ ကြိမ်စလုံး ကျင်းပနိုင်ခြင်း မရှိပေ။
UWSA ထိန်းချုပ် တောင်ပိုင်း မိုင်းတုံတွင်မူ ၂၀၂၀ ရွေးကောက်ပွဲတွင် ပြည်နယ်လွှတ်တော် အမှတ်၂ ၌ “ဝ” ပါတီမှ ဝင်ရောက်ယှဥ်ပြိုင် အနိုင်ရခဲ့ဖူးသည်။
“ဝ” နယ်မြေများတွင် ရွေးကောက်ပွဲကျင်းပဖြစ်ပါက ဝင်ရောက်ယှဉ်ပြိုင်ရန် “ဝ” အမျိုးသားပါတီ ရှိသော်လည်း မိုင်းလားတွင်မူ ပါတီမရှိသည့်အတွက် မည်သို့ဝင်ရောက်ယှဉ်ပြိုင်မည်ကို စိတ်ဝင်စားဖွယ်ရာဖြစ်ကြောင်း နိုင်ငံရေးလေ့လာသူတစ်ဦးက ပြောသည်။
“စိတ်ဝင်စားတာက မိုင်းလားပဲ။ ခုတခါတော့ လုပ်ရတော့မှာ။ အဲဒီမှာ သူတို့ ပါတီမရှိဘဲ ဝင်ပြိုင်မလား၊ အငှားလုပ်မလား၊ လုံးဝ မပါဘူးလား ဆိုတာပဲ” ဟု ၎င်းက မဲခေါင်သို့ပြောသည်။
အာဏာသိမ်းစစ်တပ်အနေဖြင့် ပြည်သူ့လွှတ်တော်အတွက် မဲဆန္ဒနယ် ၃၃၀ အတွက် မဲအများဆုံးရသူအနိုင်ယူစနစ် – FPTP စနစ်ကျင့်သုံးမည်ဖြစ်ပြီး အမျိုးသားလွှတ်တော်တွင်မူ အချိုးကျကိုယ်စားပြု PR စနစ်ကျင့်သုံးမည်ဖြစ်ကြောင်း ထုတ်ပြန်ထားသည်။
အမျိုးသားလွှတ်တော်တွင် မဲဆန္ဒနယ် ၁၁၀ ရှိပြီး မဲဆန္ဒနယ် ၈၄ နယ် ကို မဲအများဆုံးရသူအနိုင်ယူစနစ် FPTPနှင့် ကျင်းပမည်ဖြစ်ကာ ကျန်မဲဆန္ဒနယ် ၂၆ ခုကိုတော့ အချိုးကျကိုယ်စားပြုစနစ် PR စနစ်ဖြင့်ကျင့်သုံးမည်ဟု စစ်ခေါင်းဆောင်ဖွဲ့စည်းထားသည့် အမျိုးသားကာကွယ်ရေးနှင့် လုံခြုံရေးကောင်စီ NDSC က ကြေညာသည်။
NDSC က အမျိုးသားလွှတ်တော်ရွေးကောက်ပွဲစနစ်ကို ရောနှောထားသော ကိုယ်စားလှယ် အချိုးကျစနစ် MMP ဟု သုံးစွဲထားသည်။
ယင်း MMP စနစ်ဖြင့်ပင် တိုင်းလွှတ်တော်နှင့် ပြည်နယ်လွှတ်တော်များကို ကျင်းပမည်ဖြစ်ပြီး စုစုပေါင်း မဲဆန္ဒနယ် ၃၆၄ ခု ရှိမည်ဟု စစ်အုပ်စု၏ရွေးကောက်ပွဲကော်မရှင် ထုတ်ပြန်သည်။
ယင်းတွင် မဲဆန္ဒနယ် ၃၂၂ နယ် ကို မဲအများဆုံးရသူ အနိုင်ယူစနစ် FPTP စနစ်ကျင့်သုံးမှာဖြစ်ပြီး မဲဆန္ဒနယ် ၄၂ ခုကိုမူ အချိုးကျကိုယ်စားပြုစနစ် PR စနစ် ကျင့်သုံးမည်ဖြစ်သည်။
စစ်အာဏာသိမ်းခေါင်းဆောင်က ပြီးခဲ့သည့် ဩဂုတ်လ ၁၂ ရက်နေ့တွင် ရွေးကောက်ပွဲကို မဲဆန္ဒနယ်ရသမျှဖြင့် မဖြစ်မနေကျင်းပမည်ဟု ပြောဆိုခဲ့ထားသည်။
အာဏာသိမ်းစစ်တပ် ကိုယ်စားလှယ်အဖွဲ့အနေဖြင့် ပြီးခဲ့သည့် ဩဂုတ်လ ၅ ရက်မှ ၈ ရက်အထိ “ဝ”နှင့် မိုင်းလားဒေသများသို့ သွားရောက်ခဲ့သည်။
ယင်းမတိုင်မီ ဩဂုတ်လ ၁ ရက်က အရေးပေါ်အခြေအနေ ၆၃ မြို့ကြေညာရာ ယင်းထဲတွင် မိုင်းလားမြို့ကို ထည့်သွင်းကြေညာထားပြီး ရွေးကောက်ပွဲကျင်းပရန် ဖိအားပေးခြင်းဖြစ်နိုင်ကြောင်း လေ့လာသူများက သုံးသပ်ကြသည်။
မဟာ
#MeKongNews
#အာဏာသိမ်းစစ်တပ်
#ရွေးကောက်ပွဲ
#အထူးဒေသ၂
#မိုင်းလား
ပုံအညွှန်း – ရွေးကောက်ပွဲရလဒ်ကို စစ်တပ်ငြင်းပယ်ခဲ့သည့် ၂၀၂၀ ရွေးကောက်ပွဲ မဲပေးမြင်ကွင်း
