မဲခေါင်၊ သြဂုတ် ၁၄
စစ်ကောင်စီ ထိန်းချုပ်ခွင့် ရထားသည့် လားရှိုးမြို့တွင် ကိုးကန့် MNDAA နှင့် စစ်ကောင်စီတို့ ယနေ့ ဩဂုတ်လ ၁၄ ရက်နေ့တွင် ထပ်မံတွေ့ဆုံကြကြောင်း သတင်းအရင်းအမြစ်ထံက သိရသည်။
ယနေ့ သြဂုတ်လ ၁၄ရက်< နံနက်၁၀နာရီတွင် လားရှိုးမြို့ရှိ ဆင်နှစ်ကောင်ဟိုတယ်သို့ MNDAA တပ်ဖွဲ့ ကိုယ်စားလှယ်များကို စစ်ကောင်စီမှ ရှေ့ပြေးယာဥ်ထိန်းရဲ အပါအဝင် လုံခြုံရေးအပြည့်ဖြင့် ခေါ်ဆောင်လာကြောင်း သတင်းအရင်းအမြစ်က ပြောသည်။
“ကြားတာက သိန္နီကိစ္စရော၊ ဟိုယ-တန့်ယန်းလမ်းကြောင်းက MNDAA တပ်တွေ ဖယ်ပေးဖို့ရော ကြားတယ်။ ကိုးကန့်ဖက်ကတော့ ကွတ်ခိုင်ကို ဗုံးကြဲတဲ့ကိစ္စမကြည်လင်သလို သိန္နီမှာ တရုတ်သူဌေးတွေ အခြေချလာတာတွေ၊ အခိုင်အမာလုပ်ဆောင်နေတာတွေက ပြန်ပေးဖို့ ဆန္ဒမရှိဘူးလို့ ကြားနေတယ်။ ပြီးတော့ ကိုးကန့်ခေါင်းဆောင်တွေရဲ့ ဘဏ်အကောင့်တွေ တရုတ်က ပိတ်ထားတယ်လို့လည်း ကြားတယ်” ဟု ၎င်းက မဲခေါင်သို့ ပြောသည်။
ယခု တွေ့ဆုံမှုမှာ ၃ ကြိမ်မြောက်ဖြစ်ပြီး ပြီးခဲ့သည့် ဇူလိုင်လကလည်း ဒုတိယအကြိမ်တွေ့ဆုံခဲ့ကြောင်း သိရသည်။
ဟိုယလမ်းမှ ကိုးကန့်တပ်များ ဖယ်ရှားရေးနှင့်ပတ်သက်ပြီး MNDAA နှင့် နီးစပ်သူ သတင်းအရင်းအမြစ်က “အရင်ကတည်းကခင်ဗျ။ လားရှိုးအတွက် တိမ့်ရှီကျွမ်းစာချုပ်မှာ လက်မှတ်ထိုးတဲ့အထဲ ယာယီ အခြေပြုရုံ ခွင့်ပြုထားမည် ဖြစ်ပြီး စစ်ရေးအရ လိုအပ်ပါက ဆုတ်ခွာပေးရမယ်လို့ ပါတယ်” ဟု မဲခေါင်၏ မေးမြန်းချက်ကို ဖြေကြားသည်။
ယင်းဆွးနွေးချက်များအပြင် ယခု ကိုးကန့်ဒေသမှတ်ပုံတင်ကို တရုတ်ပြည်ထဲအထိ တရားဝင်သွားလာခွင့်၊ ကုန်သွယ်ရေး၊ ဆက်သွယ်ရေး၊ ရေ နှင့် လျှပ်စစ်ဓာတ်အားပေးရေး ကိစ္စများလည်း ထည့်သွင်းဆွေးနွေးကြောင်း သိရသည်။
ပြီးခဲ့သည့် သီတင်းပတ်မှ စပြီး ဟိုယဖက်သို့ ကိုးကန့်တပ်သားသစ်များ အင်အားထပ်တိုးချထားခဲ့ပြီး ယမန်နေ့ သြဂုတ်၁၃ရက် ညကပင် ဟိုယဖက်မှ ကိုးကန့် စစ်ကားကား၁၀ စီး နမ့်ပေါင်ဖက် တက်သွားကြောင်း သတင်းရင်းမြစ်က ဆိုသည်။
ယခု တွေ့ဆုံမှုနှင့်ပတ်သက်ပြီး MNDAA ကိုးကန့်၊ စစ်ကောင်စီနှင့် တရုတ်တို့မှ တရားဝင် တစုံတရာ ထုတ်ပြန်မှု မတွေ့ရသေးပေ။
မဟာ
#MeKongNews
#MNDAA
#လားရှိုး
#စစ်ကောင်စီ
#သိန္နီ
#ဟိုယ
