မဲခေါင်၊ ဩဂုတ် ၅

ရှမ်းပြည်မြောက်ပိုင်းမှ ကုန်စည် သယ်ဆောင်လာသည့် ကုန်တင်ယာဉ် အစီး ၁၀၀ ဝန်းကျင်ခန့်ကို မန္တလေးတိုင်း မြစ်ငယ်ကားကွင်းတွင် ဩဂုတ်လ ၄ ရက်က ဖမ်းဆီးထိန်းသိမ်းထားကြောင်း ဖမ်းဆီးခံရသည့် ယာဉ်မောင်းများနှင့် ပိုင်ရှင်တချို့ထံမှ သိရသည်။

ဖမ်းဆီးထားသည့် ကုန်တင်ယာဉ်များကို မန္တလေးတိုင်း မြစ်ငယ်ကားကွင်းအတွင်း ရပ်တန့်ခိုင်းထားပြီး အခွန်မဆောင်ထားသည့်အတွက် တရားမဝင်ကုန်စည်အဖြစ် ဖမ်းဆီးထားခြင်း ဖြစ်ကြောင်း ယာဉ်ပိုင်ရှင်များနှင့် နီးစပ်သူတစ်ဦးက ဆိုသည်။

ကုန်စည်များကို လားရှိုးဘက်မှ လမ်းကြောင်းရှင်း အပြီးအစီးဆိုသည့် ပုံစံဖြင့် တင်ဆောင်လာကြခြင်းဖြစ်ပြီး အခွန်ကိစ္စကို ဖမ်းဆီးခံရမှသာ သိရကြောင်း ယာဉ်မောင်းတစ်ဦးက ဆိုသည်။

“လားရှိုးဘက်ကနေ ဂျူတီ(အခွန်) ဆောင် မပေးတာပါ။ ရောက်ခါနီးမှ ဒီလိုဖြစ်သွားတာပါ” ဟု ၎င်းက ပြောသည်။

ဖမ်းဆီးရာတွင်လည်း စစ်ဆေးခြင်းမရှိဘဲ လာသမျှ ကုန်တင်ကားများကို ကားဝန်းအတွင်း ထိုးခိုင်းခြင်းဖြစ်ကြောင်း၊ ယာဉ်နှင့် ကုန်များကို ထိန်းသိမ်းထားပြီး ယာဉ်မောင်း၊ ယာဉ်နောက်လိုက်များကို ပြန်လွှတ်လိုက်ကြောင်း ကိုယ်တိုင်ကြုံတွေ့သူများထံမှ သိရသည်။

တရားမဝင်ကုန်စည် တိုက်ဖျက်ရေး စီမံချက်ဖြင့် ပထမအကြိမ် ရှမ်းပြည်တောင်ပိုင်း၊ ဟိုပုံးမြို့တွင် ကုန်တင်ယာဉ် စီးရေ ၁၀၀ ဝန်းကျင်ကိုလည်းကောင်း၊ ဒုတိယအကြိမ်အဖြစ် မြဝတီမှ သယ်ဆောင်လာသည့် ကုန်တင်ယာဉ် ၁၃၂ စီးကို ကရင်နှင့် မွန် ဒေသများတွင်လည်းကောင်း စစ်ကောင်စီက ဖမ်းဆီးခဲ့သည်။

စစ်ကောင်စီသည် တရားမဝင်ကုန်စည်စီးဆင်းမှုကို အရေးယူရန်အတွက် သတင်းပေးများကို မှီခိုလျက်ရှိပြီး ကရင်နှင့် မွန်ဒေသများတွင် ဖမ်းဆီးရမိမှုသည် မြဝတီမှ ရန်ကုန်သို့ တရားမဝင်ကုန်စည်တင်ဆောင်လာသည့် ကုန်တင်ယာဉ် ၁၄၄ စီးအနက် ၁၃၂ စီးကို ဖမ်းဆီးနိုင်ခဲ့ခြင်း ဖြစ်ကာ ဖမ်းဆီးမိသည့် ကုန်စည်တန်ဖိုး၏ ရာခိုင်နှုန်းအချို့ကို ပေးမည်ဟု ထုတ်ပြန်ထားသည်။

ဖေသန်း
#MeKongNews
#မန္တလေး
#မြစ်ငယ်ကားကွင်း
#တရားမဝင်ကုန်စည်
#ရှမ်းမြောက်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)