မဲခေါင်၊ ဇူလိုင် ၃၀
ရှမ်းပြည်တောင်ပိုင်း၊ မိုင်းကိုင်မြို့နယ်မှ ကျားဖြန့်လုပ်ကိုင်သည့် လူ ၁၀၀၀ ကျော်သည် ပြီးခဲ့သည့်လက လဲချားမြို့နယ်အတွင်းသို့ ဝမ်ပန်ပြည်သူ့စစ် (၇၅၈) အဖွဲ့မှ ခေါ်ဆောင်လာပြီး လုံခြုံရေး ယူပေးနေကာ ကျားဖြန့်လုပ်ငန်းများ လုပ်ဆောင်နေကြောင်း ဒေသခံများထံမှ သိရသည်။
ယင်းငွေလိမ်ဂိုဏ်းသည် မိုင်းကိုင်မြို့နယ်၊ မိုင်းခွန်ဘက်မှ လဲချားမြို့နယ်၊ ဝမ်ဟင့်အုပ်စု၊ ဝမ်ပန်ရွာတောနက်ထဲ ပြောင်းရွှေလာပြီး အဖွဲ့ ၂ ဖွဲ့ခွဲထားကာ ကွတ်တောင်းနား၊ လွယ်တီးမြောက်ဘက် ဝမ်ပုံကန်းနှင့် မိုင်းယိုင်းအနီးတွင် တစ်ဖွဲ့၊ လွယ်ငမ့်တွင် တစ်ဖွဲ့စီ ရွှေ့ပြောင်းလုပ်ကိုင်နေကြကြောင်း သိရသည်။
“နမ့်တိန်းချောင်း အရှေ့ဘက်ကျမယ်။ အဲမှာ သူတိုချည့်ပဲ။ တရုတ်တွေပါ။ ဒေသခံတွေက ဟင်းသီးဟင်းရွက်ရောင်းရတယ်ပေါ့။ စျေး တကယ်ဝယ်တာတော့ မိုင်းကိုင်ဖက် နီးပေမယ့် နမ့်တိန်းချောင်း ၂ ခါဖြတ်ရတာရယ်၊ အုပ်ချုပ်ရေးပိုင်း အဆင်ပြေတဲ့ လဲချားဘက်ပဲ သွားကြတယ်” ဟု မိုင်းကိုင်ဒေသခံတစ်ဦးက မဲခေါင်ကို ပြောသည်။
လဲချားမြို့နယ်၊ ဝမ်ပန်ပြည်သူ့စစ် (၇၅၈) ခေါင်းဆောင် ဦးတေန၏သား စိုင်းဆေးစင့်က လုံခြုံရေးတာဝန်ယူထားပေးပြီး ပြည်သူ့စစ်အဖွဲ့ နာမည်ခံကာ လုပ်စားနေကြောင်း၊ ၎င်းတို့သည် လဲချားစစ်ကောင်စီနှင့် ခိုလမ်တိုင်းမှူးထံ ပိုက်ဆံ ကျပ်သိန်းထောင်ချီ အခွန်ဆောင်နေကြောင်း ဒေသခံတစ်ဦးက ပြောသည်။
၎င်းကျားဖြန့်များ လဲချားတောထဲသို့ ပြောင်းရွှေ့ရောက်ရှိနေသည်မှာ ပြီးခဲ့သည့် ဇွန်လ ၂၈ ရက်နေ့ကဟု သတင်းရင်းမြစ်ထံမှ သိရပြီး ယနေ့ ဇူလိုင် ၃၀ ရက်ဆိုလျှင် တစ်လကျော် ရှိနေခဲ့ပြီ ဖြစ်သည်။
#MeKongNews
#ကျားဖြန့်
#လဲချား
#ပြည်သူ့စစ်
#မိုင်းကိုင်
#ခိုလမ်တိုင်းမှူး
#ရှမ်းပြည်တောင်ပိုင်း
